2 KRONIKA 1
1
Salomo Ertoto mindo kepentaren man Dibata
(1Raj 3:1-15)
1Salomo anak Daud enggo paguh kuasana i bas kerajan Israel dingen TUHAN Dibatana masu-masu ia. IbahanNa maka tuhu-tuhu mbelin kal kuasana Salomo.
2Iperentahken Raja Salomo kerina kepala pegawai pasuken seribu ras seratus, kerina pegawai pemerentah, kerina kepala keluarga (dingen kerina rayat) 3gelah lawes radu ku ingan pertoton i Gibeon. Lawes ia kerina ku jah sabap i jah kap ingan Kemah Perjumpan ras TUHAN. Musa, suruh-suruhen TUHAN, nai erbahan Kemah e i bas taneh si mesawang. ( 4Tapi Peti Perpadanen enggo isimpan i Jerusalem i bas kemah si enggo ipajekken Daud sanga Peti Perpadanen e ibaba i Kiryat Jearim nari.) #2Sam 6:1-17; 1Kro 13:5-14; 15:25–16:1 5Batar-batar tembaga si ibahan Besalel anak Uri kempu Hur pe i Gibeon nge. Inganna i lebe-lebe Kemah Perjumpan ras TUHAN. Raja Salomo ras kerina bangsa e ersembah man TUHAN i jah. #Kel 38:1-7 6I lebe-lebe Kemah e ersembah raja man TUHAN alu mpersembahken persembahen i babo batar-batar tembaga e. Igelehna seribu asuh-asuhen jenari itutungna kerina i babo batar-batar e.
7I bas berngi e icidahken Dibata baNa man Salomo nina, “Kai atendu Kubereken man bandu?”
8Nina Salomo, “Gelgel nari tetap icidahkenNdu keleng ateNdu man bapangku Daud, janah genduari enggo ibereNdu aku nggantiken ia jadi raja. 9O TUHAN Dibata, sehken dage padan si enggo ibahanNdu man bapangku. Enggo ibahanNdu aku jadi raja nandangi bangsa si teremna bali ras abu taneh. #Kej 13:16; 28:14 10E maka bereken man bangku kepentaren ras pemeteh si kuperluken guna ngerajai ia kerina. Adi la bage kutera aku ngasup ngerajai bangsaNdu si mbelin enda?”
11Nina Dibata man Salomo, “Enggo payo pilihenndu e. La ipindondu erta ntah kebayaken, kemulian ntah kematen musuh-musuhndu, bage pe labo ipindondu maka kam cawir metua, tapi si ipindondu e me kepentaren ras pemeteh gelah alu bage ngasup kam ngerajai bangsangKu, i ja kam enggo Kubahan jadi raja. 12E maka genduari Kubereken man bandu kepentaren ras pemeteh. Janah tambahenna, Kubereken man bandu tole erta ras kebayaken dingen kemulian lebih asangken kerina raja si enggo leben ntah pudin asa kam jadi raja.”
Kekuasan ras kebayaken Raja Salomo
(1Raj 10:26-29)
13E maka berkat Salomo i Gibeon nari, ingan Kemah Perjumpan ras TUHAN, jenari mulih ia ku Jerusalem. I je ia jadi raja Israel. 14Itambahina gegeh tenterana alu pepulung 1.400 gereta kuda dingen 12.000 tentera si erkuda. Deba itamana i Jerusalem dingen si tadingna itamakenna i kuta-kuta si deban. #1Raj 4:26 15I bas paksa pemerentahenna, pirak ras emas bali buena ras batu i Jerusalem janah kayu aras bali ras batang ara. #Ul 17:17 16Suruh-suruhen raja ngkuasai perbinagan kuda si rehna i Musri ras Kilikia nari, #Ul 17:16 17dingen gereta kuda si rehna i Mesir nari. Kuda ras gereta kuda si iperluken raja Heti ras Siria, Raja Salomo ngelitkenca. Man raja-raja e sada gereta kuda idayakenna alu erga 600 duit pirak, dingen kuda alu erga 150 duit pirak.
Currently Selected:
2 KRONIKA 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.