เลห 36
36
1ปาย ตี อาเบฌาเลน บอ อาโอวโฮวลีอาบ บอ ดูอี เฮา อี แหลว ดี โบง แบน โมยว แบน โมยว, เฆ โลว โบง ดอน โมยว แตห อึณ ปี ปี จัร เฌาพรา เฆ โบง. อึณ มูห เฌาพรา อี แตห เฆ มึห อางยาน ปี โลว เฆ, แตห เฆ ปึอน ดี โบง ทึบ บีก บอด.
2อาโมวแซ แฮะ ฮอต กาลาง โฆรห ตี ดี ดูอี กืน, อัน วี แดะ อาเบฌาเลน ฆาย อาโอวโฮวลีอาบ บอ เฆ ดูอี เฮา อี ปี ดัว เฌาพรา อางยาน, แตห เฆ ปึอน ดี โบง แบน โมยว แบน โมยว. อัน แดะ เฆ ตัห ฌัม โดง กอย อัน. อัน บอ แดะ ดอน อี อี มึห น็อห ซี โบง ฆาน ตึอน. 3อาโมวแซ วี อาบ ดี เฆ โกรว ดอน โมยว ปี หลู เฆ ดูอี อีซาเรลัะ, แตห เฆ วี โบง ทึบ บีก บอด ตึอน. ดอน ซีแง ซีณวัห เฆ ดูอี วี ตัห หลู ดอน โมยว แคะ ซี หลู เฆ. 4ปัน ตี เฆ ดูอี อี โบง ฆาน แบน โมยว แบน โมยว, เฆ วี ตัห ฌัม โดง กอย อาโมวแซ. 5เฆ วี ต็อห ดี อัน, “เฆ ดูอี ตึย โกรวกราม กืน กาเซา, แตห เย โบง ฆาน ปี จัร เฌาพรา เย โบง ดอน โมยว. แปะ แฮะ ตึย เฆ, อึณ แฮะ กาหลึอม แคะ ปี โลว เย.”
6ปัน ตี อาโมวแซ จัร เฆ ดูอี, แตห เฆ วี ฮาว ดอน โปละ แคง โดง คยัะ เฆ กาลาง, แตห ดูอี อีซาเรลัะ ดอน อี กอ นับ. เฆ โลว ต็อห, “เบ อาว ฮู โลว หลู มาเซ, แตห อี โบง ทึบ บีก บอด ตึอน. บอ อีบึณ บอ อีมาย อาว ฮู โลว หลู มาเซ.” 7ปาย ตี เฆ ดูอี อาว ฮู หลู. แคะ แฮะ หลู เฆ, อึณ แฮะ กาหลึอม แคะ ปี โลว เฆ.
ลอง เฆ โบง ทึบ บีก บอด
8วาย อัน ตี เฆ ลักซามา อี มึห อางยาน, เฆ วี โบง ทึบ บีก บอด ตึอน. เฆ โบง บีก ฆึร พืน. อึณ มูห บีก ปี ด็อะ เฆ ตา เซณ กาตัม ลูย อี บัด. เฆ ตา เซณ อี คอง, อี ฆูย คอน บอ อี เรณ แฆ. เฆ ดูอี แหลว ดี ด็อะ, แหลว ดี จีณ, เฆ วี โบง อารึบ อามู อามาด เฌาพรา อี มึห เพียง แดง บีก ตี. 9บีก ฆ็อง ดอน พืน, เฆ โบง แตห อึณ การัม. นา โต็ง อา ฆึร ดี ดา กานีห, นา กาว็อห พวน กานีห. 10บีก พัน พืน เฆ วี จีณ แตห อึณ กาดึก บอ แบน พืน ตาง อู พืน. บีก ปอ พัน พืน เฆ จีณ แตห กาดึก แบน พืน ตาง ปอ อู พืน. 11แฮะ ฮอต, เฆ วี ดึห บีก อี คอง, โบง โหยะ อัน, ดึก ดี บลาก นา เรต บีก พืน ตาง บอ อา พืน. 12โหยะ บีก ตึอน เฆ โบง อู บลาก พัน ฆึร โบ็ง. เฆ ดึก โหยะ ตี ดี โคบ บีก ตาง อา พืน, แตห อึณ กอย กาซืร. 13วาย อัน ตี เฆ วี ดึห ครีว โบง มัง กาเกียบ พัน ฆึร โบง, แตห เฆ ปึอน ดี กาเกียบ โหยะ บีก ตาง อา พืน, แตห ฆาย กาดึก, แตห อึณ แบน ทึบ บีก บอด.
14แฮะ ฮอต, เฆ บอ โบง บีก ตา ฮึก มา แป ฆึร ดี อู พืน, แตห อึณ วี ซีบลึก ทึบ บีก บอด ตึอน. 15บีก ฆึร ดี อู พืน ตี, ตาง เฆ การัม. นา โต็ง โอย ฆึร กานีห, นา กาว็อห พวน กานีห. 16บีก ตี พัน พืน, เฆ วี จีณ แตห เฆ กาดึก แบน พืน ตาง. บีก ปอ เดา พืน, เฆ วี จีณ แตห อึณ กาดึก แบน พืน ตาง ปอ อู พืน. 17เฆ บอ โบง โหยะ อัน พัน ฆึร โบ็ง, ดึก ดี โคบ บีก พืน ตาง อา พืน ตึอน, อู พืน พัน ฆึร โบ็ง. เฆ ดึก แตห เฆ กอย กาซืร ดี ปอ อา พืน. 18วาย อัน ตี เฆ วี ดึห บ็อง, โบง มัง กาเกียบ พัน ฆึร โบ็ง, แตห เฆ วี กาเกียบ โหยะ บีก ตึอน, แตห อัน แบน บีก ตาง อู พืน. 19นา แดง บีก ฮึก มาแป ตี, เฆ วี โบง เบลห ฮูน มาบู อาโล็ง, อี จูด ซีนัม เรณ. วาย อัน ตี เฆ วี ซีบลึก ปอ อู ทาบ, ตา ฮูน มามัก อึม.
20วาย อัน ตี เฆ วี ดึห เฮ กาทีน, โบง แบน วี เบลห กาจ็อง, แตห อึณ แบน แรง ทึบ บีก บอด. 21แบน อู บลัะ เฆ โบง นา จา อัน ฆึร กานีห, นา กาว็อห อัน อู กานีห ดี อู กาซาน. 22แบน ดอน บลัะ บอ มึห โดต อา โดต, แตห ฆาย กอย ลาย กาซืร, แตห อึณ ลาย กาชึบ. ปาย ตี เฆ โบง แบน ดอน บลัะ แตห ลาย การัม. 23บลาก นา เตต เฆ โบง แบน อา ฆึร บลัะ. 24เฆ บอ ดึห รึอน, วี โบง เจณ ดี ดัง แบน ตึอน พวน ฆึร โบ็ง, แตห แบน อู บลัะ มึห เจณ อา โบ็ง. 25บลาก นา กัว เฆ บอ โบง แบน ปอ อา ฆึร บลัะ. 26แฮะ ฮอต เฆ วี โบง เจณ ดี ดัง อัน พวน ฆึร โบ็ง. 27แบน อี กอย บลาก นา เฆต ซีแง, เฆ วี โบง เดา บลัะ. 28แบน ปอ อา บลัะ เฆ วี โบง, แตห ฆาย กอย ดี กาโตะ นา เฆต ซีแง. 29ปาย ตี อึณ มึห แบน อา บลัะ กอย ดี กาโตะ อู กาโตะ, แตห ฆาย ลาย กาดึก ดี กาดัม อัน กอ ฌัม ดี กาแดะ. ดี กาแดะ อัน อา บลัะ อี ลาย กาดึก ตึอน, ฆาย วี ดึก ควัง อู ควัง. บอ อา กาโตะ เฆ โบง ปาย ตี. 30อึณ มึห แบน ดา บลัะ บอ เจณ รึอน ฆึร ดี เดา โบ็ง. แบน อู บลัะ มึห เจณ อัน อา โบ็ง.
31-32วาย อัน ตี เฆ วี ดึห เฮ กาทีน, โบง แรบ กาลัง, แตห เฆ ดึก ดี แบน. เฆ โบง พัน ณ็อง อาดา บลาก เบรต อู บลาก, ปอ พัน ณ็อง อาดา บลาก เบรต ปอ บลาก, ปอ พัน ณ็อง อาดา ดี ปัน อี มูห บลาก นา เฆต ซีแง. 33แรบ กาลัง อี กอย ดี กาแต แบน, เฆ โบง แตห อัน โต็ง แคะ กาว็อห แรง, แตห อัน กอย กาแต นา จา แบน แรง. 34แบน ตึอน เฆ วี ปีด ครีว บอ โบง ควัง ครีว, ดึก นา เรต แบน ตึอน, แตห เฆ ปึอน ดี ปลอะ แรบ, แตห แรง มึห โปลม. เฆ บอ ปีด ครีว ดี แรบ.
35แฮะ ฮอต ปัน ตี เฆ บอ โบง บีก ฆ็อง, ตา เซณ กาตัม ลูย อี คอง, อี ฆูย คอน บอ อี เรณ แฆ. เฆ ด็อะ แตห อึณ มึห ราง อามู อามาด เฌาพรา อี มึห เพียง. 36เฆ บอ ดึห เฮ กาทีน โบง ร็อง พวน ณ็อง. บอ ร็อง ตี, เฆ ปีด ครีว. แฮะ ฮอต, เฆ วี ดึห ครีว โบง ควัง. เฆ บอ โบง เจณ ร็อง ตึอน พวน โบ็ง, ตา รึอน. 37เฆ บอ ดึห เซณ อี คอง, อี ฆูย คอน, อี เรณ แฆ บอ เซณ กาตัม ลูย, โบง บีก ฆ็อง ปี เบลห เฆ ดี อาต มาโลห ทึบ บีก บอด. อึณ มูห ดูอี อี แหลว ดี ด็อะ บอ แหลว ดี จีณ โบห เฆ ปัยะ, เฆ โบง บอ บีก ฆ็อง ตี. 38วาย อัน ตี เฆ บอ โบง ร็อง พัน ณ็อง, บอ ควัง อี ดึก ดี ร็อง ตี. เฆ ปีด ครีว ดี ร็อง ตี. เจณ ร็อง พัน โบ็ง ตึอน, เฆ ยี โบง ตา บ็อง.
Currently Selected:
เลห 36: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
