HPILEMON 1
1
1Hkristu Yesu a magam gun hpai ai majaw bawng dung hkrum nga ai ngai Pawlu hte anhte a hpu nau wa Timohti gaw,
an a tsaw ra ai jinghku hte amu rau jawm shingtau gun hpai nga ai Philemon hpang de mung, 2an a kajan Ahpia hpe mung, an a hpyen ma manang Arhkipo hpang de mung, na a nta e hkrum zup nna nawku daw jau ai Hkristan hpu nau ni hpang de mung, laika ka dat ga ai.#Rom 16:5; 1Ko 16:19; Kol 4:17; Hpl 2:25.
3Anhte a Wa Karai Kasang hte Madu Yesu kaw na chyeju hte ngwi pyaw ai gaw nanhte hte rau anga nga malit ga law.
Philemon A Tsaw Ra Myit Hte Makam Masham
4Ngai akyu hpyi ai ten shagu hta na a lam tsun nna nye a Karai Kasang kaw chyeju shakawn nngai. 5Hpa majaw nga yang, nang gaw Karai Kasang a amyu masha ni yawng hte hpe tsaw ra nga ai hte, Hkristu Yesu hpe kam sham nga ai lam ngai na chye lu nngai. 6Kam sham ai Hkristan ni rai nga ga ai nang hte anhte gaw Hkristu hta langai sha tai nna asak hkrung ai a marang e anhte hkam la lu ai shaman chyeju nlang hte hpe grau nna sung ai hku chye na myit hkawn lu na matu ngai akyu hpyi nngai. 7Hpu nau wa e, na a tsaw ra ai myit a majaw ngai grai wa kabu gara ai hte myit n-gun lu la nngai law! Nang gaw Karai Kasang a chyoi pra ai masha ni yawng hte a myit masin hpe shangwi shapyaw ya lu nit dai.
Onesimu A Matu Hpyi Nem Ai Lam
8Ndai lam a majaw, ngai gaw Hkristan hpu nau shada hku nna nang mai galaw ai lam galaw na matu htet da na ngai grai nden ja ai ahkang lu nngai. 9Rai ti mung, Hkristu a kasa, dingla wa ngai Pawlu rai nga nngai hte ya e Hkristu a bawng dung ai wa mung rai nga nngai majaw, tsaw ra ai hku she nang hpe hpyi nem dat na ngai grau ra nngai. 10Hkristu hta nye a kasha majing tai wa ai ngai sha Onesimu a matu mara ngai nang hpe hpyi nem dat nngai. Hpa majaw nga yang, bawng dung nga ai shaloi ngai gaw shi a Wenyi lam hku nna kawa tai wa ni ai.#1Ko 4:15; Gal 4:19; Kol 4:9. 11Shi gaw shawng de na a matu akyu n rawng ti mung, ya gaw na a matu mung, nye a matu mung akyu rawng nga ai.
12Ya e shi hkum nan hpe nang hpang de ngai wa shangun dat nngai; dai lam hta nye a tsaw ra myit du nna lawm nga ai. 13Dai Kabu Gara Shiga a majaw bawng dung ai hta, shi gaw na a malai ngai hpe galaw jaw na nang e ngai kaw woi nga mayu nngai. 14Rai ti mung na a myit hkrum ai lam n lu la ai sha kaning n chyum nna n galaw n mai shadut jahkat ai hku hpa mung ngai n galaw mayu nngai. Na a myit ra ai hku san san sha rai u ga. Dai rai nna nang myit n hkrum ai hpa hpe mung ngai n galaw na nngai.
15Onesimu gaw nang hte tut nawng rau bai anga nga lu na matu she, shi nang hte tawng marang mi hka ai rai dam nhten! 16Ya shi gaw yu maya mayam sha n rai mat sai, masha a hkum shan lam hku yu yang mung, madu a lam hku yu yang mung, mayam madang hta jan ai tsaw ra ai Hkristan hpu nau langai mi tai wa sai: shi gaw nye a matu hte na a matu mayam langai mi hku nna mung, Hkristu hta hpu nau langai mi hku nna mung, grau nna hpu reng nga ai.
17Dai re ai majaw, nang ngai hpe na a rau rum kanawn manang zawn nawn ndai rai yang gaw, ngai hpe zawn shi hpe hkap hkalum la u. 18Shi nang hpe lama ma shut kau ai rai yang mung, hka kap ai rai yang mung, dai gaw nye a hka shatai u. 19Ngai Pawlu gaw dai hka wa na ngu nna nye a lata hte nan ka dat nngai. (Rai ti mung nang hkum nan pyi Hkristu a majaw lu la ai asak hkrung lam ningnan a matu ngai hpe hka wa ra nga ndai ngu nna tsun shapraw dan ra na zawn n shadu nngai.) 20Dai re ai majaw nye a hpu nau wa e, dai Madu a myi man hpe tau nna chyeju hte ndai ngai hpyi nem nga ai lam galaw ya rit. Hkristu hta hpu nau shada rai nga ai hku nna nye a myit masin hpe shangwi shapyaw ya rit.
21Nang gaw ngai hpyi nem ai hte maren galaw na ra ai ngu nna myit mu myit hkut let ndai laika hpe ka dat nngai. Kaja wa ngai tsun ai hta n ga galaw na rin dai hpe ngai chye nngai. 22Dai hta n ga nye a matu nga shara lajang tawn u; hpa majaw nga yang, Karai Kasang gaw nanhte yawng hte a akyu hpyi ai ga hpe madat ya na ra ai rai nna, nanhte hpang de bai du sa shangun na ra ai hpang jahtum shakram dat ai ga ni ngu nna ngai myit mada nga nngai.
Hpang Jahtum Shakram Dat Ai Lam Ni
23Hkristu Yesu a lam hkaw tsun ai a majaw nye a bawng dung manang rai nga ai Epahpra gaw nang hpe shakram dat ai.#Kol 1:7; 4:12. 24Dai hte maren nye a shingdep shingtau ni rai nga ai Marku, Aristarku, Dema hte Luka mung, nang hpe shakram dat ma ai.#Kas 12:12,25; 19:29; 27:2; Kol 4:10,14; 2Tm 4:11.
25Madu Yesu Hkristu a chyeju gaw nanhte yawng hte rau anga nga u ga law.
Currently Selected:
HPILEMON 1: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.