BU HKAWM 1
1
Shawng Hta Ai Israela A Yuptung Jahpan
1Ya Israela amyu masha ni Egutu mung na pru wa ai lahkawng ning e shata lahkawng ngu na langai ya shani hta dai Sina nam mali e nga ai shi a hpung shingkang shanu nga ai Sum hta dai Madu gaw Mawshe hpe ning ngu tsun wu ai. Shi gaw, #Bhk 26:1-51. 2“Nang hte Arun gaw Israela amyu masha ni hta na amyu lakung hte dinghku ni hpe yuptung jahpan hta da na rai myit dai. 3Asak hkun ning hte hkun ning a lahta, hpyen amu shang galaw lu ai lasha ni yawng a mying jahpan hpe hta da na rai myit dai. 4Nan hpe karum na matu amyu baw shagu na amyu lakung du langai ngai hpyi na rai myit dai,” ngu nna tsun wu ai. 5-16Ndai ni gaw shawa hpung kaw na ndai amu hpe galaw na matu lata la hkrum ai lasha shabrang ni hte amyu bawsang kata kaw na ningbaw ni rai nga ma ai:
| Amyu Bawsang | Amyu Lakung Ningbaw |
|---|---|
| Rubin | Shedura a kasha Elizura |
| Simun | Zurishadi a kasha Shelumila |
| Yuda | Aminadab a kasha Nashon |
| Yisahka | Zua a kasha Nehtanela |
| Zebulun | Helon a kasha Eliaba |
| Ehprim | Amihu a kasha Elishama |
| Manashe | Pedazura a kasha Gamale |
| Benyamin | Gidoni a kasha Abidan |
| Dan | Amishadi a kasha Ahiza |
| Ashe | Ohkran a kasha Pagila |
| Gad | Duela a kasha Eliasap |
| Naphtali | Enan a kasha Ahira |
17Ndai masha shi lahkawng karum la ai hte Mawshe yan Arun mung 18shawa hpung ting hpe shata lahkawng ngu na langai ya shani hta shaga zup hpawng nhtawm amyu masha ni yawng hpe amyu lakung hte dinghku hku hkan nna jahpan hta da ma ai. Asak hkun ning hte hkun ning a lahta de na lasha ni yawng a mying ni hpe, 19dai Madu hkang da ai hte maren ka matsing nna hti tawn ma ai. Mawshe gaw dai masha ni hpe Sina Nam mali e jahpan hta la wu ai. 20-46Asak hkun ning hte hkun ning a lahta de na hpyen amu shang galaw lu ai lasha ni yawng gaw amyu lakung hte dinghku hku hkan nna mying jahpan jaw ai hta Yaku a shadang sha alat Rubin a amyu bawsang ni kaw na shawng jaw hpang ma ai. Jahpan yawng gaw ndai chyarang hte maren rai nga ai.
| Amyu Bawsang | Hti hkum |
|---|---|
| Rubin | 46,500 |
| Simun | 59,300 |
| Gad | 45,650 |
| Yuda | 74,600 |
| Yisahka | 54,400 |
| Zebulun | 57,400 |
| Ehprim | 40,500 |
| Manashe | 32,200 |
| Benyamin | 35,400 |
| Dan | 62,700 |
| Ashe | 41,500 |
| Naphtali | 53,400 |
| Yawng: | 603,550 |
47Lewi amyu ni mahtang kaga amyu bawsang ni hte rau mying jahpan bang lu na n rai; 48hpa majaw nga yang, dai Madu gaw Mawshe hpe, “Hpyen amu shang galaw lu ai lasha ni a jahpan hpe nang hta ai shaloi, 49Lewi amyu masha ni hpe shalawm lu na n rai. 50Shing di na malai, nye a hpung shingkang shanu nga ai Sum hte dai hte seng ai arung arai ni yawng hte seng ai amu hta Lewi masha ni hpe hpareng shangun na rai ndai. Shanhte gaw dai Sum hte de a arung arai ni yawng hpe hpai nna dai hta daw jau ai amu gun let Sum a grup yin hta shanhte a dap dabang hpe gap nna but nga na rai ma ai. 51Nanhte dabang htawt ai aten shagu, Lewi amyu ni mahtang Sum run hpya nna dabang nnan ni de bai du shagu dai hpe sharawt shachyaw na rai ma ai. Sum de shani sa wa ai ni kadai mung sat kau ai hkrum na rai wu ai. 52Kaga ngam ai Israela amyu masha ni mung langai hte langai tinang nang a hpung, tinang nang a dap hkan nna tinang hte seng ai dawnghkawn npu e sum gap na rai ma ai. 53Rai ti mung Lewi masha ni gaw Sum a grup yin hkan e but nga nna dai hpe makawp maga na rai ma ai. Dai shara de kadai mung n shani sa lu mu ga, Israela shawa hpung ting mung nye a myit masin hpe pawt shangun nna adup ai kaw n du u ga,” ngu nna tsun wu ai. 54Dai rai nna dai Madu gaw Mawshe hpe hkang da sai hte maren, Israela amyu masha ni lam magup hpe hkan galaw ma ai.
Currently Selected:
BU HKAWM 1: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.