ESAIA 17

Karai Kasang Gaw Suri Hte Israela Hpe Ari Jaw Na Ra Ai

1Dai Madu gaw, “Damasku gaw mare langai hku grin nga lu na ra ai n rai; dai gaw marawng marang ai sumpum sha tai mat na ra ai. #Yer 49:23-27; Amo 1:3-5; Zeh 9:1. 2Suri mung na mare ni gaw htani htana katsi katsang shara tai mat na ra ai. Dai mare ni gaw sagu dumsu uhpung ni a udat shara tai mat na ra ai, kadai mung shanhte hpe gawt shapraw kau na n rai. 3Israela gaw dahpran shara kata byin mat na ra ai, Damasku gaw shi a awng dawm shanglawt ahkaw ahkang sum mat na ra ai. Naw ngam nga ai Suri masha ni gaw Israela amyu masha ni zawn myi man sum mat na mara ai. Chyahtum Chyalai N-gun rawng ai dai Madu Ngai nan tsun ni ai,” ngu nna tsun wu ai.

4Dai Madu gaw, “Israela a galu kaba ai gaw htum mat wa nna, shi a sut su ai hpe matsan chyaren re ai hte galai kau hkrum na ra ai nhtoi du sa wa nga ai. 5Israela gaw nsi naisi dan nna shu la ngut sai yi langai hte bung na ra ai, dai gaw Rehpim Kadit e nlim gut la ngut sai yi zawn akrin akraw shara tai mat na ra ai. 6Israela gaw tsanlun hpun na asi yawng di la ngut ai hpang, hpun ndung e lahkawng masum sha hte hpun lakung ni a npu hkan loi li mi naw ngam nga ai zawn loi sha mi re ai amyu masha ni chyu sha asak hkrung nga na mara ai. Dai Madu Israela a Karai Kasang Ngai nan tsun ni ai,” ngu nna tsun ai.

7Dai nhtoi du ai shaloi, amyu masha ni gaw shanhte a Hpan Madu, Israela a chyoi pra ai Karai Kasang hpang de karum la na matu kayin wa na mara ai. 8Shanhte gaw shanhte a lata ni hte galaw da sai tawn hkungri ni hpe galoi mung shamyet shanat na ma ai n rai, shanhte a lata amu ngu ai Ashera karai num a masat dingsat ni hte manam pyaw ai baw nat nawng na tawn hkungri ni hpe kam na ma ai n rai.

9Dai nhtoi du ai shaloi, Israela amyu masha ni a lata kaw nna hprawng mat wa nhtawm kau tawn da ai Hiwi hte Amori ni a mare ni zawn, ngang kang ai mare ni gaw katsi katsang shara tai mat nna hten run taw nga na mara ai.

10Israela e, nang gaw nang hpe hkye mawai la ai hte ja ai lunghkrung zawn nang hpe makawp maga ai Karai Kasang hpe malap kau nga nit dai. Shing rai na malai, nang gaw maigan karai hpe nawku na nga, chyoi pra ai sun ni hpe hkai da nga ndai. 11Rai tim, nang hkai da ai dai ni gaw maku rawt wa nna jahpawt manap e apu pu wa tim, dai yang e mangai shu la na aten naw n nga nga ai. Dai yang e ru yak tsin-yam tsindam hte shamai n lu ai nchyi nmu chyu sha nga nga na ra ai.

Gumlau Masha Amyu Baw Ni Sum Ma Ai

12Daru magam n-gun rawng ai masha amyu baw ni gaw panglai hka wu kadu ai nsen zawn, hka leng kaba ni ngoi kashaw ai nsen zawn garu gachyi nga ma ai. 13Masha amyu baw ni gaw hka leng ni rawt hta wa ai zawn rawt lung wa ma ai, rai ti mung Karai Kasang gaw shanhte hpe daru ai shaloi shanhte gaw bum nhkrem hkan kap ai ga nhpu zawn, bung hpoi hta lawm nang ai yihku zawn htingnut mat wa nna gau kau hkrum nga ma ai. 14Shanhte gaw shana de e hkrit kajawng hpa shabyin dat ma ai, rai ti mung jahpawt manap e, shanhte hkoi mat ma ai. Dai gaw anhte a mung hpe hpya lu hpya sha ai masha shagu hte a hpang jahtum na lam rai nga ai.

Currently Selected:

ESAIA 17: JCLB

Highlight

Copy