Luke 6:27-49
Luke 6:27-49 TEG
«Ŋaa mi eduga ŋa be baleeyuzuga mi, lejya anyon a be, ŋaa lesa baari baamabele be leve. Leta baari babaabele be okuu ŋa lebwono ma babaasa be maami maabi. Yugu mbuuru mibere we ma kabaa vura mpa nde kabaa keemon se. Ŋaa yugu mbuuru miyaga mfa we mpa se nde ngoyi. Mbuuru kalaa kiila ka we, mpa nde. Ŋaa mbuuru kayaga kiila ka we, we bizi nde kakata. Maami maasaga be ni abuga asa be mon, lesa se abuga mon. Aka be kajya yuozi baari baajyi be, wuura le be leje kaka lema? Ba kini va Njyami ŋi baasa se bwa. Yugu be kasa ove ma baari babaasa be ove, wuura le be leje kaka lema? Ba kini va Njyami ŋi se baasa bwa. Ŋaa aka be kadifa adoro yuozi baari eli be lemalege tari ni bo baavuta be mon, ŋaa wuura le be leje kaka lema? Se baari babaasa obi baadifa abuga a bo, ŋaa bo se ba jila mva lemigi le bo leampi abuga. Lemono lemigi laasa be, lejya anyon a be, lesa bo ove, ŋaa ledifa, lebiza kasaga ni avuta. Ma bwa wuura le be leje kaka leenini ŋaa be leka baana a Njyami o nkara yulu. Okorogo Njyami maasa baari babaabiza yalaga leve ŋa angaa maami maabi, ove. Etuma e be eka baeve mva kali Taara a be.» «Lebiza abuga kapama ma buni Njyami kabiza be kapama. Ŋaa lebiza kasisa abuga ncanke Njyami sisi be. Lebologo abuga a be ŋa Njyami kabologo be se. Lempa, ŋa se ampa be, Baafuga bugu leenini nca njyala e we, baapia baasege, eluula too, kabila bayezege be ma lemigi leejanji be.» Zezi vuri ti bo se ngana ndi: «Be lemoni ngaa miizi kali abuna bira buga eli se miizi kali? Bo abuele nca bila ka va ŋi? Oyigi kibuna vula oyizigi ŋi. Ŋaa aka oyigi wua mi yaa amaami ma yigi nde, nde yiga mva oyizigi. We mema amono mfumfuzu ye eli nca jiizi le duma we, ŋi we akamono mpala oti ye eli nca jiizi le weankulu ŋi? We ti akamono mpala oti yeeli nca jiizi le we ŋi. We mema aduga ndumu a we ni ya micieze mfumfuzu yeeli nca jiizi le we! Kura le be, baana cieze mpala oti yeeli nca jiizi le we, ŋaa se we mono taataa, we yiga abuna cieze mfumfuzu yeeli nca jiizi le ndumu a we.» «Oti woove akakula mburu yeembi ŋi. Ŋaa oti se woobi akakula mburu ye mve ŋi. Oti woove kayaa ma mburu. Baakatolo elili kayila oncincene ŋi, ŋaa baakatolo mbologo kayila oncuma ŋi. Mbuuru woove kasa maami maave mva lemigi le otuma nde we ove. Ŋaa ngaa amaami obi kasa maami maabi mva lemigi le otuma nde we obi se. Okorogo onyua awobo me cimiŋi be kukuna ba otuma.» «Be mema leecwolo mi ma Nkumu! Nkumu! ŋaa ŋi be lekasa maami mi eduga mi be ŋi? Mi emweze be mbuuru we ayalaga mi, eli ayuga maami a mi, ŋa nde maasa mon. Nde mva mbuuru wo cui njo eli abila a nde alabigi ncina ncie. Ŋaa mpila mvula eya njo kibuna va ŋi kabila abila ayo kiigi amalabaga nca ncie taataa. Ŋaa mbuuru wo ayuga, ŋaa nde kabiza sa maami ma lemigi leyugi nde, nde mva mbuuru wo cui njo yila seyi, eli abaani ove onyaŋa. Mpila mvula eya ma nyuru anjo yia esa waa yo evi, ŋaa ebogi eyo beeje kaka beenini.»
Bible App
Bible App for Kids
