Ngalate 5
5
Lebiza ka kaama ovuzugi o be
1Kirisite ma vuzuga bizi a be mini bizi a be leka avuzugi ba syele. Leka pa, yiga, be lebira kamaka ayiga ba enyari.
2Mi, Poole, mi elyele be ni: aka be lesa ncazi, ŋaa ye Kirisite ka kasa ma be ma oca. 3Mi evura lyele ŋa balaga lwori eli asa ncazi: ave nde abuna nyima Ngiri eso. 4Be eli lesaga amono be tele ma Ngiri, be lemacala ma Kirisite, be lebuna kabaga puga le Njyami ŋi 5Bizi, ŋa ma mpari ye Oduduma ni bizi lejila opami tari ma lemigi le lila. 6Kabila ma wooli omo ŋa Kirisite Jezu, kasa ncazi sikali kabiza kasa kalogo ka oca! Keevuli, lila le lesa ma jya.
7Be kiigi yemiŋi leyeni. Wo kangi be njila na ŋa wo ligi be ma kanyima asisyele? 8Ma alyeli be ma kayalaga ma kaya ma Njyami wo cwolo be ŋi. 9«Anganga nceti ma maasa kaluula farine wuori», mva ka ba lyele. 10Ŋaa Mfumu ampa mi tari ma ba ewuani be: mi syele ni be leje kacimiŋa akima mva mi ŋi. Ŋaa wooli asa be ngimiŋa, mpini mbuuru, aje kabaga opami o nde o Njyami.
11Ŋa mi, andumu, ŋi mi evura lyele ni ave lesi ncazi? Aka syele, meema le selege mpa mi mpasi? Okorogo aka mi elyele bwa, lemaanji le Kirisite le kaka jaa ma mbuuru ŋi! 12Ni ba beeya bila ngimiŋa evura selege kaje laa nca maami a bo: ndi bo acaga ywori.
13Ŋaa be, andumu, be kiigi acwoli ma kavuzuga. Ŋaa ma be ba lema vuzuga, lebira kalwono ajya be maabi. Nkalave, ma jya, leka ma ojanji ba ake bila baamo. 14Kabila Ngiri eso esi nca mbari mutu, yi bu: «Ave we jya buga lengulu mva wemankulu.» 15Ŋaa aka be leca abuga mii ŋa aka be le jwala ake bila baamo, lesa oyeri, be lebiiza abuga!
Lenyina Oduduma Cece kabira be
16Yiga lemono ma lyele mi be: lenyina Oduduma cece kabira omwo o be ŋa be lebira ka ma nyima ajya maabi. 17Ajya maabi ma ajwana bila Oduduma o cece, ŋa Oduduma o cece ajwana bila ajya maabi ma. Mpanaŋa bo, eta, ŋa emani, ndi be lebuna sa ma jii be ŋi. 18Ŋaa aka Oduduma Cece abira be, be ki yiga ncina Ngiri ŋi.
19Bizi a be leyayi ba ebira ajya maabi ŋa baari: ma kabiza sa maami maabi ma baala, eki beebi, ŋa esima ba okuru. 20Bo kabwono anjyami ba oca, bo baasa ampiini. Bo ba abele ake bila baamo, letogo ŋa yala. Bo ŋa nkeri, bo ŋa lebila, ŋa bo ŋa cala ka mpanaŋa bo. 21Bo ajii kabaga beeli ŋa abuga, bo ba aselege nywa mali, bo baasa cinda le eki beebi ŋa bo ba avura sa ekima mva bwa. Mi eyieze be ŋa mi yiga ma mana lyele: ba baasa kalogo kya ba kabaga biri nca omfumu o Njyami ŋi.
22Nkalave, lemono ya yeempa Oduduma Cece: jya, kase, kadusu, kajila, kayamaŋa, ove, tele, 23ŋa samisami, ŋa lemigi le kaka mfumu a weankulu. Se ngiri mon ye yebele elogo esila bya kali. 24Baari baali ŋa Kirisite Jezu ba akomo yila lemaanji ajya maabi a bo. 25Aka bizi a be kaka ma Oduduma, leje se ma Oduduma. 26Lebiza kaka ŋa kamba, bizi a be lebira kajwana, lebira yala kasa se.
Currently Selected:
Ngalate 5: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
