Ngalate 4
4
1Mono ma jii mi kalyele: ntini eli nga wanda okini obuzu, nde kamaka mva oyiga. Ŋaa, nde aje kaka mfumu wanda lwori. 2Ŋaa nde anyima baari ba baakyele nde ŋa amaami a nde, tii cugu le kuri taara nde#4.2 Ma lemigi le opami le Ngereke ma ntini yia, taara mbuuru wo kiigi mpa esibi e mwana balaga aka nde yiga nga mbuuru.. 3Bizi se, ntini ye kiigi bizi baana, bizi se kiigi ayiga ampari ba okiri. 4Ŋaa ntini ye akuri eto, Njyami tumi Mwana nde. Nde akuli ma okaazi ŋa nde ki ma Ngiri. 5Nde yi ma kavuzuga ba kiigi ncina Ngiri, mabuni bizi lekiriga baana a Njyami.
6Ŋa kabila be baana a nde, Njyami tumi nca etuma e bizi a be Oduduma Mwana nde, Oduduma eli asa bizi a be kalyele ndi: «Aba, Taara!» 7Ŋa bwa, we ka oyiga ŋi, ŋaa mwana Njyami. Ŋa aka we se mwana nde, Njyami aje kampa we wanda eli nde ma akyele ma baana a nde.
Ocimiŋi o Poole wo kabaga ma baari a Ngalate
8Ŋaa kalakala be kiigi ya Njyami ŋi, ŋa be kiigi ayiga ba elogo eli ka anjyami ajaajaa ŋi. 9Ŋaa yiga be leyayi Njyami, sikali Njyami yayi be. Ŋaa be buni lebuna nyima ka enyarigi ka ampari eli omfumu kali ŋa ka oca? Ŋa be lejii kaka ayiga a bo ba anyarigi? 10Be le maalege etuma e be kuna ma ecugu, ma angondo, ma evu bila esibi#4.10 Poole awobo ma maawuana acinda ma aJife, se amaami ma baali ki ayaligi ŋi ŋa ondigi bila ba baabwono anyari.! 11Mi ŋa obwogo ma osala wo si mi ma be ngori!
12Andumu, mi empa be akolokolo, lesa mva mi, ma mi wo mikiriga mva be. Be leki sa mi jaa leebi ŋi. 13Be lekini le baraga meema mi mpi be Ncya Yeemve ma ja ye ncomi: kabila mi kiigi ŋa jaa ma nyuru. 14Nyuru a mi kiigi ove ma kamono kali, ŋa be le ki nyina mi ma katege ŋi, be le ki bele mi ŋi sikali kaciniŋa. Kali, be le yaligi mi mva ntuma Njyami sikali mva Kirisite Jezu ndemankulu. 15Be kiigi nca kase komini! Be yiga jo ema eya? Mi evuta be otemi wu: aka bwa kiigi ba abuna, ke be le cyezi miizi ma kampa mi! 16Ŋa mi yiga, mikiriga nywo be kabila mi elyele be asisyele?
17Baari #4.17 Kamaka baari ba baayiziga Ncya Yeemve kima, eli yeebi. Lekese 1.7ba eli ba akura be ka kata be, ŋaa beeli nca ecu e bo ove kali. Ndi bo kasaga ni bizi a be kiigi lecamaŋa, mabuni be lekata ma bo. 18Ŋa ove ni baari akata abuga aka ecimiŋi e bo ŋa ove, ma antini aso, aka mi li bila be sikali ka bila be ŋi. 19Baana a mi, mi emono mpasi ye enyari ma be, mva okaazi wo akula. Ŋa bwa ye biga tii ntini ye ka be mva Kirisite. 20Mi kiigi jii yomini ma kaka ka mpaana be ma ntini yi, ma kawobo be ma osumbu okima. Okorogo, mi ki ya lemigi le kasa bila be ŋi.
Angare bila Sara ba mvyere ebuga jwele
21Be ba lesaga kaka ncina Ngiri, lelyele mi aka be leyuzuga ma lyele nde. 22Mono kalyele nde: «Abarayame bagi baana ba abalaga bwele: omo wo oyiga, Angare, ŋa woomo wo okaazi wo ama vuzuga, Sara. 23Wo oyiga akuli mva kajii balaga bila okaazi, ŋaa mwana okaazi wo avuzugi akuli ma ndagi ye Njyami. 24Bwa ye mvyere bizi a be kalogo: akaazi ba mva ebuga jwele. Obuga oncomi ba oya ma kakuru ka Sinayi, nde alege omwo baana ayiga: Angare, 25ŋa Angare, kakuru ka Sinayi ka Arabi. Nde amvyere se kangundu ka Jeruzaleme ka lubu eli oyiga bila baana a nde. 26Ŋaa obuga wo ywele Jeruzaleme wo yulu. Nde ovuzugi, ŋa nde nguugu a bizi a be. 27Okorogo, Mpiri ye lyele ndi:
We mono kase, eli baana kali!
ta osarigi ma kase, we eli ki mono mpasi ye kakula ŋi!
Ee, okaazi wo anyini abaga baana kuna
ni okaazi eli ŋa olumi!»
28Ŋa be, andumu bila ankeri, mva Izake, be baana ba akuli ma ndagi Njyami. 29Ŋaa kalakala, mwana wo akuli mva kajii balaga ŋa okaazi ompi mpasi ŋa wooli akuli ma Oduduma Njyami, ŋa yiga, kalogo komi kia. 30Ŋaa Mpiri buni ye lyele? «Cura okaazi oyiga ŋa mwana nde obalaga, kabila mwana obalaga wo oyiga aka baga bugu le wanda le taara bila mwana obalaga wo okaazi ovuzugi ŋi.» 31Ŋa bwa andumu, bizi a be ki yiga baana ba okaazi oyiga ŋi, ŋaa bizi a be baana ba okaazi ovuzugi.
Currently Selected:
Ngalate 4: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
