Santiago 2

Koto kúíchi‑ó ñɨvɨ láꞌví

1Ránoꞌó ñaniꞌ ni̱ꞌ jín ku̱ꞌva ni̱ꞌ, jie̱ꞌe̱ꞌ kúneí iniꞌ rán I̱toꞌoꞌ‑ó Jesús ya̱ kúvi Cristo, ya̱ viiꞌ nasɨ́kuitɨꞌ kúñáꞌnú re̱ꞌ, jee sukuán koto sáꞌá rán kuéntáꞌ na̱sa íyó ɨɨn ɨɨn ñɨvɨ, chisaꞌ ɨɨn nuún ni saꞌá‑ó maáó jín nɨꞌɨ ñɨvɨ. 2Chi retú ki̱vɨ ɨɨn te̱e nu̱u̱nꞌ íyó tútú rán, jee ñúꞌún naꞌá re̱ꞌ xeꞌi oro jee ñúꞌún re̱ꞌ saꞌma máá va̱ꞌa, jee suni ki̱vɨ ɨɨn te̱e láꞌví, ya̱ ñúꞌún saꞌma túꞌú ya̱ núte‑e, 3jee retú kuneen kuéntáꞌ rán te̱e ya̱ ñúꞌún saꞌma va̱ꞌa vá, jee kachiꞌ rán nu̱u̱nꞌ re̱ꞌ: “Kiji nú kuneeꞌ nú nu̱u̱nꞌ va̱ꞌa ka̱ꞌ yaꞌá”, soo retú kachiꞌ rán nu̱u̱nꞌ te̱e láꞌví: “Kuiñɨ yukuán”, áxí: “Kuneeꞌ yatin jie̱ꞌe̱ꞌ ni̱ꞌ.” 4Saájee, ¿á ntu kúníichiꞌ iniꞌ táꞌán rán nteñu maárán, résa? Jee, ¿á nsáꞌ sánáaꞌ rán si̱kɨ̱ꞌ ñɨvɨ jín jiáni niva̱ꞌa xi̱ni̱ꞌ rán résa? 5Ránoꞌó ñaniꞌ ni̱ꞌ jín ku̱ꞌva ni̱ꞌ ya̱ ñúnúunꞌ ni̱ꞌ, teso̱ꞌo yaꞌá: Ndiosíꞌ nka̱ji re̱ꞌ rá ñɨvɨ láꞌví íyó ñɨ̱vɨ́ yaꞌá, sáva kukúká ánímaꞌ ráa kúneí iniꞌ ráa re̱ꞌ, jee sáva ni̱ꞌi̱nꞌ ráa ta̱ꞌvi̱ꞌ ya̱ kɨꞌɨ ráa naꞌá re̱ꞌ nu̱u̱nꞌ tátúníꞌ re̱ꞌ, ya̱ suvivá nchi̱sóyuꞌú re̱ꞌ ya̱ ku̱ꞌva re̱ꞌ nu̱u̱nꞌ rá ñɨvɨ ya̱ ñúnúunꞌ ráa re̱ꞌ. 6Soo nsi̱kánuun rán te̱e láꞌví. ¿Á nsú rá ñɨvɨ kúká ví ya̱ xínɨ́ꞌɨ ránoꞌó jín ya̱ jiánaka ráa ránoꞌó nu̱u̱nꞌ rá te̱e jiéꞌnéꞌ kua̱chi? 7¿Á nsú suviráa vá káꞌánꞌ niva̱ꞌa si̱kɨ̱ꞌ súví Jesús máá viiꞌ ñunkúún stakuníꞌ rúja? Jee jie̱ꞌe̱ꞌ súví Jesús naní rán ñɨvɨ Cristo.

8Va̱ꞌa sáꞌá rán, retú maá na̱a̱ꞌ nijia síkúnkuvi rán tu̱ꞌun ley kúñáꞌnú ka̱ꞌ tátúníꞌ Cristo, ya̱ káchíꞌ sánikua̱ꞌ káchíꞌ Tu̱ꞌun Ndiosíꞌ ya̱ níso nu̱u̱nꞌ Tutuꞌ Ííꞌ ya̱ naní Escritura: “Íyó kunu̱u̱nꞌ nú ñanitáꞌán nú kuéntáꞌ ñúnúunꞌ nú maánú.” 9Soo retú sáꞌá rán kuéntáꞌ na̱sa íyó ɨɨn ɨɨn ñɨvɨ, saájee sáꞌá rán kua̱chi, jee síjíta ley Ndiosíꞌ ránoꞌó ya̱ kúvi rán ñɨvɨ jiáꞌa sáꞌá rán nu̱u̱nꞌ ley vá. 10Chi retú ɨɨn ñɨvɨ síkúnkuvi nɨꞌɨ ya̱ tátúníꞌ ley vá, soo retú ti̱vɨ́‑ɨ ɨɨn tiñu ya̱ tátúníꞌ ley vá, saájee nkenta íyó si̱kɨ̱ꞌ ñɨvɨ vá nu̱u̱nꞌ nta̱ká rá tu̱ꞌun ya̱ tátúníꞌ ley vá. 11Chi maá Ndiosíꞌ ya̱ nkachiꞌ: “Koto sáꞌá téní nú”, jee suni nkachiꞌ re̱ꞌ: “Koto jiáꞌníꞌ nú ñɨvɨ.” Saáva retú ntu sáꞌá téní nú soo sáꞌá nú ni̱yɨ, saájee nkenta kúvi nú ñɨvɨ jiáꞌa sáꞌá nú nu̱u̱nꞌ tu̱ꞌun tátúníꞌ ley.

12Saáva íyó kaꞌanꞌ rán jee íyó saꞌá rán sánikua̱ꞌ jíníꞌ rán ya̱ sanáaꞌ Ndiosíꞌ nɨꞌɨ rá tiñu sáꞌá rán, jee sanáaꞌ re̱ꞌ sánikua̱ꞌ káchíꞌ tu̱ꞌun ley Jesús vá, jee nsa̱ꞌá tu̱ꞌun vá nakui̱ñɨ̱ꞌ núne‑ó nu̱u̱nꞌ xinóꞌo re̱ꞌ yó jie̱ꞌe̱ꞌ kua̱chi‑ó. 13Chi ki̱vɨ̱ꞌ sanáaꞌ re̱ꞌ kua̱chi, jee nsáꞌ kunáꞌví iniꞌ re̱ꞌ kune̱ꞌyá re̱ꞌ ñɨvɨ ya̱ ntu nkúnáꞌví iniꞌ‑i nne̱ꞌyá‑a ñanitáꞌán‑a. Jee ñɨvɨ ya̱ nku̱náꞌví iniꞌ nne̱ꞌyá‑a ñanitáꞌán‑a jee kusɨ̱ɨ̱ꞌ iniꞌ‑i ya̱ kunáꞌví iniꞌ re̱ꞌ kune̱ꞌyá re̱ꞌ maa ki̱vɨ̱ꞌ sanáaꞌ re̱ꞌ kua̱chi.

Ntu íyótiñu ya̱ káchíꞌ‑ó ya̱ kúneí iniꞌ‑ó retú ntu sáꞌá‑ó ya̱ váꞌa

14Ránoꞌó ñaniꞌ ni̱ꞌ jín ku̱ꞌva ni̱ꞌ, ¿na̱ nu̱u̱nꞌ vá íyótiñu, retú ɨɨn ñɨvɨ káchíꞌ ya̱ kúneí iniꞌ‑i Jesús, jee retú ntu sáꞌá‑a tiñu váꞌa rúja? Retú suꞌva kúneí iniꞌ ñɨvɨ vá, ¿á kúvi natavaꞌ‑a ñɨvɨ vá nu̱u̱nꞌ kua̱chi ñɨvɨ vá sikáku‑u ñɨvɨ vá résa? 15Jee retú ɨɨn ñaniꞌ áxí ɨɨn ku̱ꞌva ya̱ kúneí iniꞌ‑i Jesús, jee kúmániꞌ saꞌma kuꞌun‑u jín ya̱ kajiꞌ‑i ni ki̱vɨ̱ꞌ, 16jee retú ɨɨn rán káchíꞌ nu̱u̱nꞌ‑u: “Kuáꞌán va̱ꞌa nú”, jee: “Na̱ ka̱ꞌ nuvixinꞌ nú jee na̱ ka̱ꞌ kuchitú nú”, soo retú ntu jiáꞌa nú ya̱ jíniñúꞌún yɨkɨkúñu ráa, ¿na̱ nu̱u̱nꞌ vá íyótiñu yaꞌá, résa? 17Jee sukuán jee, retú káchíꞌ ñɨvɨ ya̱ kúneí iniꞌ ráa Jesús, jee suni retú ntu sáꞌá‑a tiñu váꞌa, saájee kuéntáꞌ níꞌiꞌ ya̱ kua̱chi kúneí iniꞌ‑i, chi ntu tékúꞌ ya̱ ínúꞌ iniꞌ‑i. 18Soo sa̱naanꞌ jee kachiꞌ ɨɨn ñɨvɨ ya̱: “Noꞌó chi kúneí iniꞌ nú Jesús, jee nuꞌuꞌ chi sáꞌá ni̱ꞌ tiñu váꞌa.” Stúvi nu̱u̱nꞌ nuꞌuꞌ ya̱ kúneí iniꞌ nú Jesús, soo ni nsú jín tiñu váꞌa sáꞌá nú, jee jín rá tiñu váꞌa sáꞌá ni̱ꞌ stúvi ni̱ꞌ nu̱u̱nꞌ nóꞌo ya̱ kúneí iniꞌ ni̱ꞌ re̱ꞌ. 19¿Á jínúꞌ iniꞌ nú ya̱ íyó métúꞌún ni Ndiosíꞌ? Va̱tu̱ni sáꞌá nú. Soo suni ne̱ rá ta̱chi̱ꞌ kíni jínúꞌ iniꞌ maa, jee ne̱ nɨ́ꞌɨn ráa ya̱ yúꞌví ráa.

20Te̱e naanꞌ, ¿á kuíni nú ya̱ stúvi kájí ni̱ꞌ nu̱u̱nꞌ nú ya̱ ntu íyótiñu ya̱ jínúꞌ iniꞌ ɨɨn ñɨvɨ soo ntu sáꞌá‑a tiñu váꞌa? Kuéntáꞌ níꞌiꞌ ya̱ jínúꞌ iniꞌ ñɨvɨ vá. #2:20 Kéꞌín tutuꞌ káchíꞌ: númáꞌ, ya̱ kuíni káchíꞌ ntu íyótiñu. 21Abraham, ya̱ kúvi tátáꞌ jííꞌ‑ó yanaꞌán, ¿á nsáꞌ ntɨɨn kuéntáꞌ Ndiosíꞌ ya̱ nkino̱o na̱a̱ꞌ‑a nu̱u̱nꞌ re̱ꞌ jie̱ꞌe̱ꞌ tiñu nsa̱ꞌá‑a sáá nka̱níjiá‑a ya̱ nkachiꞌ Ndiosíꞌ ya̱ kaꞌniꞌ‑i se̱ꞌya yɨ́ɨ́‑ɨ, Isaac, so̱ko̱ꞌ‑o vá nu̱u̱nꞌ Ndiosíꞌ, jee nchi̱só‑o vá nu̱u̱nꞌ altar rúja? #2:21 Génesis 22:1‑18: Ɨɨn ni nñu̱ꞌun iniꞌ Abraham kaníjiá re̱ꞌ Ndiosíꞌ jee kaꞌniꞌ re̱ꞌ se̱ꞌya yɨ́ɨ́ re̱ꞌ jee so̱ko̱ꞌ re̱ꞌ maa nu̱u̱nꞌ Ndiosíꞌ soo ntu njiáꞌa Ndiosíꞌ ya̱ kaꞌniꞌ re̱ꞌ maa. 22Jee jíníꞌ nú, ya̱ kúneí iniꞌ Abraham Ndiosíꞌ ví ya̱ nsa̱ꞌá‑a ya̱ saꞌá re̱ꞌ tiñu váꞌa. Jee jie̱ꞌe̱ꞌ tiñu váꞌa nsa̱ꞌá re̱ꞌ nchu̱chítú ya̱ jíjia iniꞌ re̱ꞌ kúneí iniꞌ re̱ꞌ Ndiosíꞌ. 23Jee suꞌva nkuvi ya̱ nkachiꞌ Tu̱ꞌun Ndiosíꞌ níso nu̱u̱nꞌ Tutuꞌ Ííꞌ ya̱ káchíꞌ:

Ni̱nu̱ꞌ iniꞌ Abraham Ndiosíꞌ,

jee jie̱ꞌe̱ꞌ vá nkuna̱a̱ꞌ iniꞌ Ndiosíꞌ ya̱ kínóo na̱a̱ꞌ re̱ꞌ nu̱u̱nꞌ‑u,

jee nna̱ní re̱ꞌ te̱e ma̱ni̱ꞌ jín Ndiosíꞌ. 24Jee néꞌyá rán jie̱ꞌe̱ꞌ tiñu váꞌa sáꞌá ɨɨn ñɨvɨ ya̱ stúvi ya̱ kínóo na̱a̱ꞌ ñɨvɨ vá nu̱u̱nꞌ Ndiosíꞌ jee nsú jie̱ꞌe̱ꞌ ya̱ kua̱chi ínúꞌ iniꞌ‑i, jee ntu sáꞌá‑a tiñu váꞌa.

25Jee suni ɨɨn nuún sukuán, Rahab, ñaꞌan ya̱ sɨ̱ɨ̱ꞌ iniꞌ jín te̱e nkuvi ña, jee, ¿á nsáꞌ ntɨɨn kuéntáꞌ Ndiosíꞌ ya̱ ɨɨn ñaꞌan na̱a̱ꞌ ví ña nu̱u̱nꞌ re̱ꞌ jie̱ꞌe̱ꞌ tiñu nsa̱ꞌá ña rúja?, sáá njia̱ꞌa ña veꞌi ña nkino̱o rá te̱e núkútúꞌun nta̱jí Josué, jee nta̱jí ña ráa kua̱ꞌa̱nꞌ ráa inka ichi ka̱ku ráa nu̱u̱nꞌ rá te̱e nukú kaꞌniꞌ ráa. 26Chi ni̱yɨ ví ñunéꞌyúꞌ‑ó retú ni nsú jín ta̱chi̱ꞌ káꞌánꞌ‑ó, jee suni suꞌva kuéntáꞌ níꞌiꞌ ya̱ ínúꞌ iniꞌ‑ó Ndiosíꞌ retú ni nsú jín tiñu váꞌa sáꞌá‑ó.

Currently Selected:

Santiago 2: meh

Highlight

Copy

Compare