Santiago 1

Tu̱ꞌun kúváꞌa iniꞌ

1Maáníꞌ Jacobo, #1:1 Jacobo ví súví Santiago. ya̱ kúvi ni̱ꞌ musúꞌ Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo, ya̱ ñani Ndiosíꞌ sáva tatúníꞌ nu̱u̱nꞌ nɨꞌɨ, tée ni̱ꞌ tutuꞌ yaꞌá nu̱u̱nꞌ ránoꞌó ya̱ kúneí iniꞌ Jesús, ya̱ kúvi rán sava ni uxúꞌ u̱vi̱ꞌ (12) rá tataꞌ ichiyúkúnꞌ nkene rán nu̱u̱nꞌ Israel, ya̱ ñéte̱nuun nu̱u̱nꞌ ñɨ̱vɨ́ yaꞌá. Tájí ni̱ꞌ tu̱ꞌun káva̱ꞌa nu̱u̱nꞌ rán.

Ya̱ níchí va̱ji ne̱ nu̱u̱nꞌ Ndiosíꞌ

2Ránoꞌó ya̱ kúvi ñaniꞌ maáníꞌ jín ku̱ꞌva ni̱ꞌ, íyó tɨɨn rán ya̱ kusɨ̱ɨ̱ꞌ víꞌí iniꞌ ánímaꞌ rán, sáá kototúníꞌ kéꞌín nu̱u̱nꞌ tu̱nóꞌó táꞌánꞌ si̱kɨ̱ꞌ rán. 3Chi jíníꞌ rán ya̱, sáá kunikɨnꞌ rán kúneí iniꞌ rán Jesús, sáá jítotúníꞌ tu̱nóꞌó ránoꞌó nu̱u̱nꞌ ya̱ ré kúneí nijia iniꞌ rán, jee suꞌva sáꞌá‑á kuni̱ꞌin rán kuiñɨ ni̱ꞌin rán kaka rán ichi re̱ꞌ. 4Jee sáá kúníꞌin rán íñɨ́ ni̱ꞌin rán jee suꞌva chúchítú tiñu sáꞌá‑a iniꞌ rán, sáva kujia iniꞌ rán, jee kuna̱a̱ꞌ rán kueꞌnu rán ichi Ndiosíꞌ, jee ni ntu̱náꞌ kúmániꞌ nu̱u̱nꞌ rán, sáva sikúnkuvi va̱ꞌa rán nu̱u̱nꞌ re̱ꞌ.

5Soo retú néni ɨɨn ránoꞌó kúmániꞌ ta̱nɨ̱ꞌ xi̱ni̱ꞌ‑i, ka̱ka̱nꞌ maa nu̱u̱nꞌ Ndiosíꞌ, jee ku̱ꞌva re̱ꞌ maa nu̱u̱nꞌ‑u. Chi ntu ñúkúꞌvá iniꞌ re̱ꞌ jiáꞌa re̱ꞌ maa nu̱u̱nꞌ nɨꞌɨ ñɨvɨ, jee ni ntu násóyu̱ꞌú re̱ꞌ nu̱u̱nꞌ ñɨvɨ vá jie̱ꞌe̱ꞌ ya̱ jíkánꞌ maa. 6Soo ka̱ka̱nꞌ maa, jee íyó kuneí iniꞌ‑i Ndiosíꞌ, jee koto na̱ tu̱ꞌun jiáni iniꞌ íyó. Chi ñɨvɨ vá ya̱ íyó jín tu̱ꞌun jiáni iniꞌ, kúvi kuéntáꞌ nu̱u̱nꞌ síkɨ́ nteñúꞌún, ya̱ chínaꞌá ta̱chi̱ꞌ víjin jee súkuíkó‑o vá. 7Saájee koto jiáni iniꞌ ñɨvɨ vá ya̱ ni̱ꞌi̱nꞌ‑i na̱ni nantíñú ya̱ jíkánꞌ‑a nu̱u̱nꞌ I̱toꞌoꞌ‑ó. 8Chi u̱vi̱ꞌ nu̱u̱nꞌ jiáni iniꞌ ñɨvɨ vá, jee ntu íñɨ́ kutú‑u nu̱u̱nꞌ ntáká ichi jiáꞌnu‑u.

9Soo ɨɨn ñaniꞌ láꞌví, ya̱ kúneí iniꞌ Jesús, íyó sɨ̱ɨ̱ꞌ kuvi iniꞌ‑i, chi nxi̱náa Ndiosíꞌ maa kúñáꞌnú‑u. 10Jee ɨɨn ñaniꞌ kúká, íyó sɨ̱ɨ̱ꞌ kuvi iniꞌ‑i ya̱ nnu̱un‑u nákuláꞌví iniꞌ‑i ichinúúnꞌ Ndiosíꞌ, chi ɨɨn ya̱ kúká nɨꞌɨ‑ɨ kuéntáꞌ náꞌváꞌ itaꞌ rá yu̱ku̱ꞌ. 11Sáá káa nka̱niiꞌ jee sááꞌ nasɨ́kuitɨꞌ, jee rá yu̱ku̱ꞌ vá náchi, jee jiétéꞌ rá itaꞌ, jee kuíyo ya̱ viiꞌ íyó‑o. Jee suni suꞌva náánꞌ ñɨvɨ kúká ni jíkanuun‑u sáꞌá‑a nta̱ká tiñu‑u.

Rá tu̱nóꞌó‑ó jítotúníꞌ yó jín ya̱ síkúvi iniꞌ‑ó

12Na̱ ka̱ꞌ netuꞌ ka̱ꞌ ví ñɨvɨ kúníꞌin íñɨ́ ni̱ꞌin sáá nóꞌo‑o tu̱nóꞌó ya̱ jítotúníꞌ yó. Chi sáá kuneí kene na̱a̱ꞌ ñɨvɨ vá, jee ni̱ꞌi̱nꞌ‑i ta̱ꞌvi̱ꞌ ya̱ kutekuꞌ‑u nɨ́ɨ́nkání jín Ndiosíꞌ, ya̱ nchi̱sóyuꞌú re̱ꞌ nu̱u̱nꞌ rá ñɨvɨ ya̱ ñúnúunꞌ ráa re̱ꞌ.

13Sáá síkúvi iniꞌ ɨɨn ñɨvɨ saꞌá‑a ya̱ niváꞌa, jee koto káchíꞌ ni ɨɨn ya̱: “Ndiosíꞌ síkúvi re̱ꞌ iniꞌ ni̱ꞌ.” Chi ntu síkúvi ya̱ niváꞌa iniꞌ Ndiosíꞌ, jee ni ntu síkúvi re̱ꞌ iniꞌ ni ɨɨn ñɨvɨ saꞌá‑a ya̱ niváꞌa. 14Chisaꞌ ya̱ níyo iniꞌ ta ñɨvɨ ví ya̱ síkúvi iniꞌ ráa, chi íxtá‑a ráa jee túꞌva ráa maa. 15Saájee sáá kíjiéꞌé níyo iniꞌ ráa jee suꞌva káku kua̱chi iniꞌ ráa. Jee sáá jíjia kua̱chi iniꞌ ráa jee suꞌva kenta kusɨ́ɨ́n ñɨvɨ nu̱u̱nꞌ Ndiosíꞌ jee suꞌva jíꞌíꞌ ráa nu̱u̱nꞌ re̱ꞌ.

16Ránoꞌó ñaniꞌ maáníꞌ ya̱ ñúnúunꞌ ni̱ꞌ, koto stívɨ́ rán ya̱ jiáni iniꞌ rán. 17Chi nta̱ká ya̱ váꞌa kútaꞌviꞌ‑ó jín nta̱ká ta̱ꞌvi̱ꞌ máá viiꞌ níꞌínꞌ‑ó va̱kuun ne̱ antivɨ́ ne̱ nu̱u̱nꞌ Ndiosíꞌ máá Tátáꞌ‑ó, ya̱ nsa̱ꞌá re̱ꞌ rá jiáꞌa nuva ñuꞌunꞌ ya̱ íyó súkún. Maáréꞌ ntu̱náꞌ sáma iniꞌ re̱ꞌ jee ni ntu sáma re̱ꞌ kuéntáꞌ sáma nu̱u̱nꞌ kátɨ́. 18Jee ña̱tíñú re̱ꞌ tu̱ꞌun na̱a̱ꞌ re̱ꞌ, sáva saꞌá re̱ꞌ ya̱ nakaku‑ó ya̱ kuvi‑ó se̱ꞌya re̱ꞌ, sáni kuíni re̱ꞌ. Nsa̱ꞌá re̱ꞌ suꞌva sáva kuvi‑ó rá se̱ꞌya xíꞌnañúꞌún ya̱ ña̱ko̱so̱ꞌ nu̱u̱nꞌ kue̱ꞌe̱ꞌ ka̱ꞌ se̱ꞌya re̱ꞌ, ya̱ va̱ji nu̱u̱nꞌ rá ñɨvɨ ya̱ nsa̱ꞌá re̱ꞌ.

Na̱sa kaka na̱a̱ꞌ‑ó ichi Ndiosíꞌ

19Ránoꞌó ñaniꞌ ni̱ꞌ jín rá ku̱ꞌva ni̱ꞌ ya̱ ñúnúunꞌ ni̱ꞌ, íyó tɨɨn kuéntáꞌ rán ya̱ íyó ñamaꞌ teso̱ꞌo nta̱ká rán, jee koto kúyáchiꞌ yuꞌú rán, jee koto kítɨ́ꞌ ñamaꞌ iniꞌ rán. 20Chi ñɨvɨ kítɨ́ꞌ iniꞌ ntu sáꞌá‑a tiñu na̱a̱ꞌ sáni kúníꞌ Ndiosíꞌ. 21Saáva íyó siyo rán nta̱ká tiñu ntu̱ví íyó ninuꞌun jín rá niváꞌa ya̱ kúkueꞌeꞌ, jee koo vi̱ta iniꞌ rán jee tɨɨn rán Tu̱ꞌun Ndiosíꞌ nchuꞌun re̱ꞌ iniꞌ ánímaꞌ rán, chi tu̱ꞌun vá ya̱ íyó fuersáꞌ ííꞌ níꞌin sáva natavaꞌ‑a ránoꞌó nu̱u̱nꞌ kua̱chi rán sikáku‑u ránoꞌó.

22Jee íyó kuvi rán ñɨvɨ ya̱ síkúnkuvi ya̱ káchíꞌ Tu̱ꞌun Ndiosíꞌ, jee nsáꞌ kua̱chi tésóꞌo rán ni maa, chi suꞌva xínáꞌví rán maárán. 23Chi retú ɨɨn ñɨvɨ tésóꞌo tu̱ꞌun vá, jee ntu sáꞌá‑a ya̱ káchíꞌ tu̱ꞌun vá, jee kúvi‑i kuéntáꞌ ɨɨn te̱e ya̱ néꞌyá re̱ꞌ ñɨɨnúúnꞌ nkaku re̱ꞌ nu̱u̱nꞌ ɨɨn espejo, 24jee ré nne̱ꞌyá re̱ꞌ maáréꞌ, jee kua̱ꞌa̱nꞌ re̱ꞌ, jee íchíni nnaanꞌ iniꞌ re̱ꞌ na̱sa vá íyó re̱ꞌ. 25Soo ɨɨn ñɨvɨ chúꞌun iniꞌ‑i tu̱ꞌun ley na̱a̱ꞌ Jesús, ya̱ sáꞌá‑a ya̱ nakui̱ñɨ̱ꞌ núne‑ó nkɨ́ꞌɨ‑ó nu̱u̱nꞌ kua̱chi‑ó, jee nákuíñɨꞌ ni̱ꞌin‑i, jee nsáꞌ kua̱chi tésóꞌo‑o tu̱ꞌun vá, jee nsáꞌ náánꞌ iniꞌ‑i tu̱ꞌun vá, chisaꞌ sáꞌá‑a ya̱ káchíꞌ tu̱ꞌun vá, saájee na̱ ka̱ꞌ netuꞌ ka̱ꞌ kúvi ñɨvɨ vá jín ya̱ sáꞌá‑a.

26Jee retú néni ɨɨn ñɨvɨ jiáni iniꞌ ya̱ néñu̱ꞌun va̱ꞌa‑a Ndiosíꞌ, soo ntu nákeꞌen‑e yáá‑a, jee xínáꞌví‑i maáa, jee néñu̱ꞌun ka̱ꞌá ñɨvɨ vá Ndiosíꞌ. 27Jee tɨ́ɨn kuéntáꞌ Tátáꞌ‑ó Ndiosíꞌ ya̱ néñu̱ꞌun ninuꞌun‑ó re̱ꞌ, jín ya̱ saɨn iniꞌ‑ó ya̱ néñu̱ꞌun‑ó re̱ꞌ retú sáꞌá‑ó yaꞌá: ya̱ chíneí‑ó rá kuáchí nkino̱o láꞌví jín rá ñaꞌan ya̱ nkino̱o náꞌví ráa, ya̱ kúkuíꞌyáꞌ iniꞌ ráa nu̱u̱nꞌ ya̱ nóꞌo ráa, jee suni ya̱ kúmí‑ó maáó ya̱ ntu sátéꞌén‑ó ánímaꞌ‑ó jín ya̱ niváꞌa ya̱ níyo iniꞌ ñɨvɨ ñɨ̱vɨ́.

Currently Selected:

Santiago 1: meh

Highlight

Copy

Compare