Hebreos 10

1Chi tu̱ꞌun ley Moisés kuvi‑i kuéntáꞌ ɨɨn xi̱ne̱ꞌñu̱ꞌ ya̱ xínéꞌénꞌ‑e ya̱ váꞌa ya̱ kiji jín Cristo, soo ntu sáꞌá‑a mákua sáꞌá nijia re̱ꞌ. Chi ni nsáꞌ kúvi saꞌá ley vá ya̱ kino̱o na̱a̱ꞌ rá ñɨvɨ jie̱ꞌe̱ꞌ ya̱ sukuáni yɨ́táꞌán ta kui̱ya̱ꞌ ta kui̱ya̱ꞌ sókóꞌ rá ñɨvɨ sa̱na̱ꞌ ya̱ kúyatin ráa nu̱u̱nꞌ Ndiosíꞌ néñu̱ꞌun ráa re̱ꞌ sukuán. 2Chi sikɨ́kui̱ñɨ̱ꞌ ráa ya̱ sókóꞌ ráa rá sa̱na̱ꞌ vá nékúvi, retánꞌ nkuvi nasánoo‑o ɨɨn íchíni ya̱ kúvi nɨ́ɨ́nkání rá kua̱chi sáꞌá rá ñɨvɨ sókóꞌ ráa rátíꞌ sukuán nékúvi. Chi retánꞌ nkuvi nasánoo‑o sukuán, jee ni ntu ka̱ꞌ íyó kuꞌun kua̱chi ka̱ꞌ iniꞌ ráa ya̱ níso ráa ka̱ꞌ kua̱chi, nékúvi. 3Soo jie̱ꞌe̱ꞌ rá tiñu ya̱ nso̱ko̱ꞌ ráa rá sa̱na̱ꞌ vá ta kui̱ya̱ꞌ ta kui̱ya̱ꞌ sáꞌá‑a ya̱ nákúꞌun iniꞌ ráa jie̱ꞌe̱ꞌ kua̱chi nsa̱ꞌá ráa. 4Chi ni̱ñɨ̱ꞌ rá chelu jín rá chuvátúꞌ lúlí vá ntu kúvi siíyo ráa rá kua̱chi. 5Saáva nkiji Cristo iniꞌ ñɨ̱vɨ́ yaꞌá, jee nkachiꞌ‑i nu̱u̱nꞌ Ndiosíꞌ:

Ntu kuíni nú rá sa̱na̱ꞌ jín rá nantíñú ya̱ so̱ko̱ꞌ rá ñɨvɨ nu̱u̱nꞌ nú.

Chisaꞌ nsa̱ꞌá túꞌva nú yɨkɨkúñu ni̱ꞌ sáva so̱ko̱ꞌ ni̱ꞌ maa.

6Chi rá sa̱na̱ꞌ jiáꞌníꞌ ráa téñuꞌunꞌ ráa sókóꞌ ráa jín rá nantíñú sókóꞌ ráa nu̱u̱nꞌ nú sáva siíyo‑o kua̱chi ráa,

jee ntu kúváꞌa iniꞌ nú jie̱ꞌe̱ꞌ vá.

7Saájee nkachiꞌ ni̱ꞌ: “Ndiosíꞌ, yaꞌá va̱ji ni̱ꞌ sáva sikúnkuvi ni̱ꞌ rá tiñu ya̱ kuíni maánú,

kuéntáꞌ kua̱ꞌ ya̱ káchíꞌ jie̱ꞌe̱ꞌ ni̱ꞌ nu̱u̱nꞌ Tutuꞌ Ííꞌ”,

nkachiꞌ Jesús.

8Soo xíꞌna ka̱ꞌ nkachiꞌ Jesús nu̱u̱nꞌ Ndiosíꞌ: “Ntu nkuíni nú ya̱ sókóꞌ rá ñɨvɨ sa̱na̱ꞌ ni rá nantíñú, ni rá téñuꞌunꞌ ráa sókóꞌ ráa, ni rá sókóꞌ ráa jie̱ꞌe̱ꞌ kua̱chi ráa. Jee ni ntu kúváꞌa iniꞌ nú néꞌyá nú maa”, asúnika̱ꞌ sukuán nso̱ko̱ꞌ ráa sánikua̱ꞌ tátúníꞌ ley maa. 9Jee kuíre nkachiꞌ Jesús: “Ndiosíꞌ, yaꞌá va̱ji ni̱ꞌ sáva sikúnkuvi ni̱ꞌ rá tiñu ya̱ kuíni maánú.” Jee nkachiꞌ Jesús sukuán, chi nsi̱kɨ́kui̱ñɨ̱ꞌ re̱ꞌ ya̱ sókóꞌ ráa rá sa̱na̱ꞌ, jee nna̱kunasɨꞌ re̱ꞌ nu̱u̱nꞌ vá, chi nso̱ko̱ꞌ re̱ꞌ maáréꞌ. 10Jee jie̱ꞌe̱ꞌ ya̱ nsa̱ꞌá re̱ꞌ ya̱ kuíni maá Ndiosíꞌ, saájee nsa̱ꞌá sɨ́ɨ́n re̱ꞌ yó nu̱u̱nꞌ kua̱chi sáva kuvi‑ó ñɨvɨ re̱ꞌ, jie̱ꞌe̱ꞌ ya̱ nso̱ko̱ꞌ Jesucristo yɨkɨkúñu maáréꞌ ni̱ꞌi̱ꞌ re̱ꞌ, ɨɨn ni íchí nu̱u̱nꞌ ntáká tiempúꞌ.

11Jee ntáká rá inka su̱tu̱ꞌ vitan nteenꞌ íñɨ́ ráa sáꞌá ráa tiñu nu̱u̱nꞌ Ndiosíꞌ, jee kue̱ꞌe̱ꞌ víꞌí íchí nánikó ráa sókóꞌ ráa rá sa̱na̱ꞌ ya̱ jiáꞌníꞌ ráa, soo ni nsáꞌ kúvi siíyo yukuán kua̱chi sáꞌá ráa. 12Soo Cristo, jee ɨɨn ni íchí nso̱ko̱ꞌ re̱ꞌ maáréꞌ nu̱u̱nꞌ ntáká tiempúꞌ sáá ni̱ꞌi̱ꞌ re̱ꞌ jie̱ꞌe̱ꞌ kua̱chi‑ó, jee ña̱kuneeꞌ re̱ꞌ ichi kuáꞌá Ndiosíꞌ nu̱u̱nꞌ kúñáꞌnú re̱ꞌ. 13Jee yukuán nééꞌ re̱ꞌ nétu re̱ꞌ ne̱kua̱ꞌ ntáká rá ñɨvɨ ya̱ táꞌvi iniꞌ ráa néꞌyá ráa re̱ꞌ kinaka Ndiosíꞌ ráa nu̱u̱nꞌ re̱ꞌ nachiꞌi Ndiosíꞌ ráa xi̱ntíín re̱ꞌ kuéntáꞌ kua̱ꞌ ɨɨn teyuꞌ nu̱u̱nꞌ yósóꞌ jie̱ꞌe̱ꞌ re̱ꞌ. 14Chi ɨɨn ni íchí nso̱ko̱ꞌ re̱ꞌ maáréꞌ, jee nsa̱ꞌá re̱ꞌ ya̱ nɨ́ɨ́nkání nkino̱o na̱a̱ꞌ rá ñɨvɨ ya̱ násaꞌá sɨ́ɨ́n re̱ꞌ ráa nu̱u̱nꞌ kua̱chi ráa, sáva sáꞌá re̱ꞌ kuvi ráa ñɨvɨ Ndiosíꞌ.

15Jee ne̱ maá Ta̱chi̱ꞌ Ííꞌ stúvi‑i ya̱ naáꞌ nu̱u̱nꞌ‑ó jie̱ꞌe̱ꞌ tu̱ꞌun yaꞌá, chi xíꞌna ka̱ꞌ káchíꞌ‑i:

16Jee suꞌva koo tratúꞌ ya̱ saꞌá ni̱ꞌ jín rá ñɨvɨ,

ne̱ sáá kenta rá ki̱vɨ̱ꞌ yukuán,

káchíꞌ I̱toꞌoꞌ‑ó Ndiosíꞌ,

chuꞌun ni̱ꞌ ley ni̱ꞌ iniꞌ ánímaꞌ ráa.

Jee suni chuꞌun ni̱ꞌ maa iniꞌ ráa kuéntáꞌ tee ni̱ꞌ maa iniꞌ antúníꞌ ráa.

17Jee suni káchíꞌ tuku re̱ꞌ:

Jee ni nsáꞌ naku̱ꞌun iniꞌ ni̱ꞌ ka̱ꞌ jie̱ꞌe̱ꞌ rá kua̱chi ráa jín rá tiñu niváꞌa nsa̱ꞌá ráa.

18Jee saáva, nu̱u̱nꞌ nékáꞌnú iniꞌ Ndiosíꞌ jie̱ꞌe̱ꞌ rá kua̱chi‑ó, jee ntu̱ví jíniñúꞌún‑ó ka̱ꞌ ya̱ so̱ko̱ꞌ‑ó nu̱u̱nꞌ re̱ꞌ jie̱ꞌe̱ꞌ kua̱chi‑ó.

Íyó natuꞌva‑ó nu̱u̱nꞌ Ndiosíꞌ

19Saáva, ránoꞌó ñanitáꞌán, ne̱ yuchí kúkáꞌnú iniꞌ‑ó natuꞌva‑ó nu̱u̱nꞌ Ndiosíꞌ kuéntáꞌ ki̱vɨ‑ó Nu̱u̱nꞌ Ííꞌ Nasɨ́kuitɨꞌ Ka̱ꞌ antivɨ́ nu̱u̱nꞌ nééꞌ Ndiosíꞌ, jie̱ꞌe̱ꞌ ni̱ñɨ̱ꞌ Jesús ya̱ ñatɨ‑ɨ sáá ni̱ꞌi̱ꞌ re̱ꞌ jie̱ꞌe̱ꞌ‑ó. 20Jee nine re̱ꞌ ɨɨn ichi jiáá nu̱u̱nꞌ ki̱vɨ‑ó nu̱u̱nꞌ kutekuꞌ‑ó nɨ́ɨ́nkání jín re̱ꞌ sáꞌá re̱ꞌ. Chi sáá nso̱ko̱ꞌ re̱ꞌ yɨkɨkúñu re̱ꞌ ni̱ꞌi̱ꞌ re̱ꞌ, jee nine re̱ꞌ ichi ki̱vɨ‑ó nu̱u̱nꞌ nééꞌ Ndiosíꞌ kuéntáꞌ jia̱ꞌa‑ó saꞌma nínta jiásɨ́ꞌ iniꞌ Nu̱u̱nꞌ Ííꞌ Nasɨ́kuitɨꞌ. 21Jee kúvi Cristo su̱tu̱ꞌ maa kúñáꞌnú nasɨ́kuitɨꞌ ka̱ꞌ yósóꞌ re̱ꞌ nu̱u̱nꞌ‑ó ya̱ suvió kúvi ñɨvɨ veꞌi Ndiosíꞌ. 22Jee saáva, ne̱ saɨn kúvi iniꞌ ánímaꞌ‑ó natuꞌva‑ó nu̱u̱nꞌ Ndiosíꞌ, jie̱ꞌe̱ꞌ kínóo kutú ánímaꞌ‑ó chi kúneí iniꞌ‑ó Cristo, chi nna̱saꞌá noo Cristo ánímaꞌ‑ó ya̱ kuniꞌ‑ó ya̱ ntu níso‑ó ka̱ꞌ ya̱ niva̱ꞌa. Jee ya̱ nno̱noo‑ó kuéntáꞌ nna̱kete‑ó yɨkɨkúñu‑ó jín nute ninuꞌun. 23Jee saáva kuiñɨ ni̱ꞌin‑ó jín tu̱ꞌun váꞌa ya̱ jiáꞌayuꞌú‑ó ya̱ íyó tu̱neí iniꞌ‑ó kúnáaꞌ iniꞌ‑ó ya̱ ki̱vɨ‑ó nu̱u̱nꞌ nééꞌ Ndiosíꞌ. Jee koto ɨɨn u̱vi̱ꞌ jiáni iniꞌ‑ó, chi Ndiosíꞌ nchi̱sóyuꞌú re̱ꞌ maa nu̱u̱nꞌ‑ó, jee síkúnkuvi na̱a̱ꞌ nijia re̱ꞌ ya̱ káchíꞌ re̱ꞌ. 24Jee íyó kani iniꞌ‑ó na̱ja nachuneí‑ó iniꞌ ɨɨn inka‑ó ya̱ kunu̱u̱nꞌ‑ó ka̱ꞌ ñɨvɨ, jín ya̱ saꞌá‑ó ka̱ꞌ tiñu váꞌa. 25Jee ntu íyó xinóo‑ó nutútú‑ó kuneñu̱ꞌun‑ó Ndiosíꞌ, kuéntáꞌ kua̱ꞌ ya̱ nka̱an sava rá ñɨvɨ sáꞌá ráa ya̱ ni ntu nútútú ráa. Chisaꞌ nakutíñú‑ó nachuneí‑ó iniꞌ ɨɨn inka‑ó, jee saꞌ víꞌí káꞌ chi jíníꞌ‑ó ya̱ kua̱kuyatin ki̱vɨ̱ꞌ nenta I̱toꞌoꞌ‑ó Jesús.

26Soo retú kuíni iniꞌ maáó káñunkúún sáꞌá sáꞌá‑ó kua̱chi, sú ya̱ nni̱ꞌi̱nꞌ‑ó kuniꞌ‑ó tu̱ꞌun na̱a̱ꞌ váꞌa jie̱ꞌe̱ꞌ Cristo, saájee ntu̱né íyó inka ka̱ꞌ ya̱ kúvi so̱ko̱ꞌ‑ó maa kuviꞌ‑i sáva chunáán nkáꞌnú‑ó jie̱ꞌe̱ꞌ kua̱chi‑ó. 27Chisaꞌ kua̱chi kuitɨꞌ vá nétu‑ó kuyu̱ꞌví‑ó ɨɨn tu̱nóꞌó xe̱e̱nꞌ ka̱ꞌ ya̱ kiji si̱kɨ̱ꞌ‑ó kunoꞌo‑ó ki̱vɨ̱ꞌ keꞌneꞌ Ndiosíꞌ kua̱chi, jee kiji ñuꞌunꞌ xéénꞌ ya̱ xináánꞌ‑a ntáká rá jíníꞌ u̱ꞌvi̱ꞌ ráa Ndiosíꞌ. 28Chi ñɨvɨ ya̱ jiáꞌa sáꞌá‑a nu̱u̱nꞌ tu̱ꞌun ley Moisés, jee retú íyó u̱vi̱ꞌ áxí u̱ni̱ꞌ rá ñɨvɨ jiáꞌa ráa ya̱ naáꞌ ya̱ íyó si̱kɨ̱ꞌ ñɨvɨ vá, saájee ya̱ nkuna̱a̱ꞌ ya̱ íyó kaꞌniꞌ ráa ñɨvɨ vá chi ni ntu̱né íyó ka̱ꞌ tu̱náꞌví iniꞌ maa. 29Jee, ¿na̱ja ka̱ꞌ vá jiáni iniꞌ rán na̱ inka ka̱ꞌ tu̱nóꞌó xéénꞌ ka̱ꞌ íyó ni̱ꞌi̱nꞌ rá ñɨvɨ kunoꞌo ráa ya̱ nkuniichiꞌ ráa Se̱ꞌya Ndiosíꞌ? Kúvi kuéntáꞌ nñu̱jiéꞌé ráa maa. Jee nku̱ichi iniꞌ ráa ni̱ñɨ̱ꞌ re̱ꞌ kuéntáꞌ ntu̱náꞌ níyotiñu ya̱ ni̱ꞌi̱ꞌ re̱ꞌ jee ñatɨ ni̱ñɨ̱ꞌ re̱ꞌ, ya̱ ñakɨnꞌ‑ɨ tratúꞌ ya̱ nsa̱ꞌá sɨ́ɨ́n re̱ꞌ ráa nu̱u̱nꞌ kua̱chi ráa. Jee suni ntenu̱u̱nꞌ ráa Ta̱chi̱ꞌ Ííꞌ Ndiosíꞌ ya̱ sáꞌá‑a ya̱ ni̱ꞌi̱nꞌ‑ó ya̱ íyó mániꞌ iniꞌ Ndiosíꞌ néꞌyá re̱ꞌ yó. 30Jíníꞌ‑ó ya̱ maá Ndiosíꞌ ví ya̱ nkachiꞌ: “Nuꞌuꞌ ví ya̱ naxinóꞌo ni̱ꞌ rá ñɨvɨ jie̱ꞌe̱ꞌ kua̱chi ráa, jee nuꞌuꞌ nachunáán maa nu̱u̱nꞌ ráa.” Jee suni tukuni nkachiꞌ: “Maá I̱toꞌoꞌ sanáaꞌ re̱ꞌ jie̱ꞌe̱ꞌ kua̱chi rá ñɨvɨ re̱ꞌ.” 31Saáva, na̱ ka̱ꞌ mánasɨ́ xéénꞌ nasɨ́kuitɨꞌ ka̱ꞌ kuvi jín ráa ya̱ kininkava ráa naꞌá Ndiosíꞌ tékúꞌ sáva xinóꞌo re̱ꞌ ráa.

32Soo naku̱ꞌun iniꞌ rán na̱ja nkuvi tiempúꞌ váji ya̱ta̱ꞌ, sáá sukuáni nka̱jiéꞌé rán nine antúníꞌ rán nsa̱ꞌá Tu̱ꞌun Ndiosíꞌ, sáá ñeꞌneꞌ iniꞌ rán nnoꞌo rán nu̱u̱nꞌ kue̱ꞌe̱ꞌ tu̱nóꞌó xéénꞌ ntaꞌanꞌ rán. 33Chi ntenu̱u̱nꞌ ñɨvɨ ránoꞌó jee nsa̱ꞌá kini ráa ránoꞌó nu̱u̱nꞌ chitú. Jee jíꞌín rán nchi̱neí táꞌán rán jín rá ñanitáꞌán rán ya̱ kúnkunuún nóꞌo sukuán. 34Chi nku̱náꞌví iniꞌ rán rá ñɨvɨ ya̱ yɨ́ꞌɨ́ iniꞌ veka̱a jie̱ꞌe̱ꞌ íñɨ́ ráa jín tu̱ꞌun váꞌa Cristo. Jee suni ne̱ sɨ̱ɨ̱ꞌ ni̱yo iniꞌ rán sáá nka̱neeꞌ rá ñɨvɨ rá nantíñú kúmí rán, chi jíníꞌ rán ya̱ ne̱ antivɨ́ nu̱u̱nꞌ nééꞌ Ndiosíꞌ yukuán ñúꞌún ta̱ꞌvi̱ꞌ váꞌa nasɨ́kuitɨꞌ rán ka̱ꞌ ya̱ koo nɨ́ɨ́nkání.

35Jee saáva koto xínóo rán ya̱ ne̱ yuchí kúkáꞌnú iniꞌ rán Jesús, chi jie̱ꞌe̱ꞌ kúneí iniꞌ rán Jesús jee ni̱ꞌi̱nꞌ rán ta̱ꞌvi̱ꞌ máá ñáꞌnú nasɨ́kuitɨꞌ ka̱ꞌ. 36Chi jíniñúꞌún káꞌnú koo iniꞌ rán kuni̱ꞌin rán kuiñɨ rán jín Jesús, sáva ré nkuvi nsa̱ꞌá rán sáni kuíni re̱ꞌ jee ni̱ꞌi̱nꞌ rán ta̱ꞌvi̱ꞌ ya̱ nchi̱sóyuꞌú Ndiosíꞌ. 37Chi káchíꞌ nu̱u̱nꞌ Tutuꞌ Ííꞌ:

Yakuꞌ tíꞌínꞌ ni ka̱ꞌ tiempúꞌ kúníꞌ,

jee kiji tuku Cristo ya̱ maáréꞌ vá íyó niji.

Jee nsáꞌ kukuéé re̱ꞌ jee tiaaꞌ re̱ꞌ.

38Soo ñɨvɨ ya̱ sáꞌá ni̱ꞌ ya̱ nkino̱o na̱a̱ꞌ‑a nu̱u̱nꞌ ni̱ꞌ,

jee kutekuꞌ‑u nɨ́ɨ́nkání jín ni̱ꞌ chi kúneí iniꞌ‑i nuꞌuꞌ.

Soo retú nanikóyátá‑a, jee nsáꞌ kuva̱ꞌa iniꞌ ni̱ꞌ kune̱ꞌyá ni̱ꞌ maa.

Nkachiꞌ Ndiosíꞌ. 39Soo maáórán, chi ntu kúvi‑ó táꞌán rá ñɨvɨ ya̱ níkóyátá ráa kɨ̱naanꞌ ráa. Chisaꞌ kúvi‑ó ñɨvɨ ya̱ kúneí iniꞌ‑ó Cristo jee sáva koo kutú váꞌa ánímaꞌ‑ó xi̱ntíín re̱ꞌ.

Currently Selected:

Hebreos 10: meh

Highlight

Copy

Compare