Rom 1
1
1Mwa Pol, mo enn serviter Zezi Kris, enn apot ki Bondie finn swazire ek apele pou pres so Bonn Nouvel, 2ki li ti promet depi bien lontan dan Lekritir sint par so bann profet, 3Bonn Nouvel ki konsern so Garson, ki desandan David antan ki enn imin, 4me dapre Lespri Sin, li deklare Garson Bondie avek enn gran pwisans kan ti resisit li depi bann mor. 5Par li Bondie finn fer mwa lagras pou vinn enn apot pou al apel dimoun parmi tou bann nasion pou krwar e pou obeir, e sa glorifie so nom. 6E zot osi zot parmi seki Bondie ti apele pou Zezi Kris.
7Mo pe ekrir pou tou bann ki dan Rom ki Bondie kontan e ki li finn apele pou swiv Zezi Kris. Ki Bondie nou Papa ek Lesegner Zezi Kris donn zot lagras ek lape.
Lapriyer ek Aksiondegras
8Avan tou mo remersie mo Bondie, par Zezi Kris, pou zot tou, parski lemonn antie pe koz zot lafwa. 9Bondie mo temwin. Mo servi li ar tou mo leker par Bonn Nouvel ki mo anonse ki konsern Zezi Kris. Li kone ki mo pans zot touletan, sak fwa ki mo priye. 10Mo demann Bondie, si sa dan so volonte, ki mo gagn lokazion vinn get zot.
11Mo anvi trouv zot pouki mo kapav partaz ar zot benediksion ki Lespri Bondie done, pou fortifie zot. 12Seki mo oule dir, mo oule ki nou toulede ankouraz nou kamarad par lafwa ki nou ena.
13Bann frer, bann ser, mo anvi ki zot konpran ki souvan mo finn fer plan pou vinn kot zot, me sak fwa kiksoz anpes mwa. Mo ti anvi ki mo travay port so fri kot zot parey kouma kot bann lezot nasion. 14Li mo devwar pou al kot tou dimoun, bann sivilize ek bann ki pa sivilize#1:14 Bann ki partaz sivilizasion grek, ti apel zot sivilize, li enn term kiltirel; bann ki pa partaz sa sivilizasion la, ti apel zot “barbar.” , bann edike, bann ki pa edike. 15Akoz sa mo ena sa dezir pou amenn Bonn Nouvel kot zot, bann abitan Rom.
Pwisans Bonn Nouvel
16Mo ena konfians total dan Bonn Nouvel. Limem lafors ki Bondie servi pou sov tou seki krwar, bann Zwif dabor, me osi bann non-Zwif. 17Bonn Nouvel revel kouma Bondie amenn drwatir. Zis lafwa tousel ki fer sa, depi komansman ziska lafin, parey kouma Lekritir deklare, “Dimoun ki drwat par lafwa, pou viv.”
Limanite koupab
18Depi lesiel lao, Bondie montre so koler kont tou pese e tou linzistis ki dimoun komet, e par sa bann move aksion la zot touf laverite. 19Pourtan Bondie limem finn montre klerman seki kapav kone lor li.
20Depi kreasion lemonn bann kalite invizib Bondie, so pwisans eternel e so divinite, bien vizib letan nou get travay Bondie. Bann imin pena okenn exkiz.
21Malgre ki zot konn Bondie, zot pa glorifie li, e zot pa remersie li; okontrer zot panse finn vinn bet, e zot lespri ki vid, finn plonz dan lobskirite. 22Zot pretann zot saz, me ofet zot finn vinn fou 23letan zot sanz laglwar Bondie imortel pou bann zimaz ki resanble bann imin mortel, bann zwazo, zanimo ek reptil.
24Akoz sa Bondie finn abandonn zot dan zot aksion malprop, dapre dezir zot leker; samem ki zot fer seki pa bizin avek lekor zot kamarad. 25Zot finn ranplas laverite lor Bondie par enn mansonz, e zot finn ador ek servi seki Bondie finn kre olie zot servi Kreater limem, ki beni pou leternite! Amen.
26Akoz sa, Bondie finn abandonn zot dan zot dezir degradan. Mem zot bann fam finn sanz relasion natirel pou relasion ki kont natir. 27Dan mem manier, bann zom osi finn abandonn relasion natirel ar zot fam pou ena dezir pou lezot zom. Zom finn ena relasion indesan ar zom, e zot gagn pinision ki zot merite pou zot erer.
28Anplis, parski zot pa finn gard vre konesans Bondie dan zot lespri, li finn les zot lespri degringole, akoz sa zot fer seki pa bizin. 29Zot ranpli ar tou kalite linzistis, mesanste; zot gourman kiksoz lezot, zot ranpli ar lemal, zalouzi, lespri bagarer, fer krim, fer palab, 30pans dimal lor lezot, zot ennmi Bondie, zot insolan, arogan, vantar, zot invant tou kalite lide pou fer lemal, dezobeir bann paran; 31zot pena konsians, pena lafwa, pena leker, pena pitie. 32Zot konn zizman Bondie: seki viv koumsa merit lamor. Pourtan zot pa selma kontigne fer sa bann zafer la, zot osi ankouraz lezot pou pratik sa.
Currently Selected:
Rom 1: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.