Danyèl 11

1Na myè, g’ômpum̃’ôlônga wi Daryus, ya mwô’Maday, my’avegagi gôre yè gô nunguṉè na gô sindyè. 2Ndô vèṉo mi ke myezo ôrèti.

Vôna, e p’ar’ag’ararô gô tô dwaṉa gô Paras. Na w’anay e be paga vyagaṉô n’am̃ori waôdu; na gô be dwaṉè ni ngulu vo igumbi nyè, e be suga waôdu gô sir’ipangiṉa si Yavan. 3Ndô e be kum̃aṉ’ôga wi ngulu, wi be pangiṉa ni ngulu mpôlô, ko yè denda ga nte tondè. 4Na gô be kum̃aṉè, ipangiṉi sè si be jôṉô ko sô kerô gw’impung’inay y’ôrôṽa; ndô e ze dwaṉe gôr’imbambi sè; e ze dwaṉe kè ni ngulu y’avegagi na yè, konde si be pazangaṉô, aṉozô gôr’awèṉè tômbare pa mongi siṉo.

5Ôga wi Sud e be twe jola. Ndô ôm̃ori w’ivangiṉi yè e be dwaṉa ni ngulu vyagaṉô na yè, avangiṉa, n’ipangiṉi sè si be dwaṉa ni ngulu.

6Na gô ntyay y’impum̃’imyèwo wi be dataṉa ta, n’ômwaṉ’ômwantô w’ôga wi Sud e be bya gôr’ôga wi Nor gô dwaṉiz’ am̃ènjè. Ndô e ze penjavenje ngulu y’ôgo wè, ge yè sindiṉa, ayè, ge ôgo wè; e be piṉô na waô wi re yè baga pa, na reri yè n’ayè yi re yè sindya pa gw’egômbe mèzoṉo.

7Ivar’im̃ori avila gw’irambi yè nyi be kum̃aṉa gô mbôri yè; e be bya gô mbèli, ko yè jingiṉa gw’inagô sinjoli s’ôga wi Nor, aṉwa na waô, ageṽa waô. 8E be bonga kè arwaṉa gw’Egipt inyambyè saô n’ikaṉi saô si njirôgô, ni vagô yaô yi njôni yi sika ya pupu na yi sika ya teṉateṉa. Avila vovo e be dwaṉa yom̃’impum̃a sanjiṉa pa avila gôr’ôga wi Nor. 9Na wiṉo e be kènde gô nwa n’ipangiṉa s’ôga wi Sud, ko yè tô fwinya gô ntye yèmè.

10Awaṉi wè aṉôm̃e wi be kum̃aṉa alatize nkondo mpôlô y’imbèli; ôm̃ori avila gôre waô e be kènda ayambuṉa ga ôlôṽi, e be jingiṉa gô ntye, avila vovo e be tô fwinya; na wi be pang’igoṽi kwanga gô nagô njoli y’ôga wi Sud. 11Ôga wi Sud e be benda, e be kogwa aṉwa n’ôga wi Nor; e be datize nkondo mpôlô, n’inkumba s’ôga wi Nor si be nozô gw’ago mè. 12Nkondo mèyoṉo yi be kôtô n’ekale, n’ôrèm̃a w’ôga wi be penda; e be pôsunya sintozèny, ndô e ze keṽe. 13Konde ôga wi Nor e be tô bya alatize nkondo mpôlô vyagaṉô ni nônga; na gô ntyay ya mw’ôlingô, y’impum̃a ya kwè, e be kènda ni mbèli mpôlô n’igumb’inyenge. 14Na gw’egômbe mèzoṉo awenge wi be kum̃aṉa gô nwa n’ôga wi Sud, n’aṉaga wi mbaô gôr’iṉongo nyo wi be pèdya gô dwaṉiz’ijeṉa, ndô wi be pôswa. 15Yeṉo ôga wi Nor e be bya, avange sanômba ko yè bong’inkal’injoli. Inkumba si Sud n’aṉag’avinje w’ôga wi ze sindiṉe gô nwa, wi be siliṉô ngulu gô nwa. 16Ayè yi be kènda gô nwa na yè e be denda nte be tondè, e zel’ôma wi be keṽè; e be dwaṉa gô ntye mbyamè, njilizage yom̃a yi be pôswa gw’ago mè. 17E be kenja gô bya ni ngulu yôdu y’ipangiṉi sè, na gô kenj’am̃ènjè n’ôga wi Sud; e be jômbizè ômwaṉi wè ômwantô, gô jilizè; ndô igamba mè nyi ze dwaṉe, ge nyô kènda mbyambye. 18E be keguny’ôzô wè gô nkôṽa y’inenge, ko yè bong’inyèwo; ndô ôvangiṉi e be pange ntyoṉi y’aṽelyô yè gô bya gôre yè gô maṉa, ko yè panga yô gô fwinya gôre yè. 19Gambèṉè e be keguny’ôzô wè gô nkôṽa yi mbôra njoli yi ntye yèmè; e be timbyarimbya, ko yè pôswa, e ze tô dèngô nyèṉè.

20Ayè yi be kum̃aṉa gô mbôri yè e be bagiz’ôma wi bong’ôba gô nkôṽa mbyamè y’ipangiṉa; ndô gw’intyugu sa kwè e be jilizô, ndô aranga vo eguṉu ge vo igoṽi.

21E be kum̃aṉ’ôma wi pèdyô gô mbôri yè, e ze dwaṉe n’inyanga ny’ôga; e be bôm̃unya gô gare y’am̃ènjè, awong’ipangiṉa n’ônèmbo. 22Inkumba si be jambuṉa ga eṉingô si be dom̃inyô g’ôzô wè, ayilizô, ga nt’ar’ôvangiṉi wi njeka. 23Njeka pangô pa na yè, e be janja n’item̃iza, konde e be kènda, alènge ngulu n’aṉag’awèwo. 24E be jingiṉa, gô gare y’am̃ènjè, gw’imbôra simbyamè s’elele; e be dend’ôsam̃u wi re ireri sè wi re dende, ge irerè s’ireri sè; e be ker’im̃aṉô, ntambi n’igumba; e be bônd’imôndo g’ômwanja w’imbôr’injoli vo mw’egômbe. 25Gw’ewônjô zi mbèli mpôlô e be fwele ngulu yè ni mpyô yè gô nwa n’ôga wi Sud. N’ôga wi Sud e be pang’igoṽi ni mbèli mpôlômè na yi ngulu mpôlô; ndô e ze sindiṉa konde wi be bônd’imônd’imbe gô sirè. 26Waô wi be ny’inya si tavulu yè wi be jilizè; inkumbi sè si be jambuṉa ga eṉingô, ni bende yi be juwe yenge. 27Irèm̃a y’aga wiṉo aṽaṉi yi be buta gô dende mbe, na gô tavulu mèmô aga wiṉo wi be kamba n’inôka. Ndô ôsam̃u wiṉo wi ze dwaṉe mbyambye, konde ntyay yi be bya kaô gw’egômbe zi re tetô pa.

28E be fwinya gô ntye yè n’igumb’inyenge; n’ôrèm̃i wè wi be bike njeka y’ôrunda, e be sira yô, avila vovo e be fwinya gô ntye yèm̃è.

29Gw’egômbe zi re tetô pa, e be tô kènda gô Sud; ndô nyongo num̃uṉa yiṉo isam̃u yi ze dwaṉe ga gô nyongo nônga. 30Konde am̃atanga mi Kitim mi be bya gô nwa na yè; n’ôrèm̃a pera pa, e be tô fwinya. Avila vovo benda pa g’ômwanja wi njeka y’ôrunda, e ze dwaṉe baru; gw’ifwinyi sè e be pôna gôre waô wi be tige njeka y’ôrunda. 31Imbèli si be bôm̃unya g’ôzômbyô wè; si be fwevize nagô y’ôrunda, nagô njoli; si be tômbe ntyagô yi ntyugw’edu, ko sô dôṽya ôsam̃u ômbe w’ôyilisi. 32E be temiza n’ôṉèmbo igondisi yi njeka. Ndô aṉaga wi be my’Anyambyè yaô wi be dwaṉe jola, 33n’aṉaga w’imyamè gôre waô wi be nènj’awenge. Ndô vo egômbe ar’awèwo wi be pôswa n’ôkwara w’iwora, n’ibam̃iṉa s’ôgôṉi, ni kôtô ikôte, n’ikwèrô im̃aṉô. 34Gw’egômbe zi be pôswa na waô, wi be nunguṉô n’iṉunguṉô ijangô, n’awenge wi be dataṉa gôre waô n’ômbyagwaṉa. 35N’awèwo gôr’aṉaga w’imya wi be pôswa, ko waô mèpizô, jombunyô avangô pupu, kwanga gw’egômbe zi ntyay, konde ntyay yi be bya kaô gw’egômbe zi re tetô pa.

36Ôga e be denda nte belè; e be pendy’ôkuṽi wèmè, azôguny’ôkuṽi wèmè gw’igôṉô ny’inyambyè sôdu, ko yè buly’isam̃u yi re y’aṽekelyô gô sir’Anyambyè y’inyambyè; e be kènda mbyambye kwanga eguṉu z’adwaṉizô, konde ôsam̃u wi re kenjô pa wi be dendô. 37E ze dèng’ipôgiṉa gôr’inyambyè s’ireri sè, ge gôr’anyambyè yi tondy’antô; e ze dèng’ipôgiṉa gôr’anyambyè edu, konde e be pendy’ôkuṽi wèmè gw’igôṉô nya sôdu. 38Ndô e be dub’anyambyè y’inagw’injoli gô mbôri yè y’isaviṉa; gôr’anyambyè mèyoṉo yi re yi pa myô n’ireri sè, e be duba yô ni sika ya teṉateṉa na ya pupu, n’adô ni yom̃a yi njôni. 39Yeṉo e be dendè n’imbôra injoli vo inunguṉa s’anyambyè nyoṉa; e be duba waô wi be mèmè, e be panga waô gô pangiṉ’awenge, e be keriṉa waô intye vo ipa.

40Gw’egômbe zi ntyay, ôga wi Sud e be nwa na yè. N’ôga wi Nor e be bya gôre yè ga ôgulônkangwè, n’intyôṉe na mongi wi panda gw’ikavala, n’am̃atang’am̃enge; e be kènda gw’intye, avôva ga ôloṽi avyagaṉa pokoso. 41E be jingiṉa gw’intye imbyamè, n’awenge wi be jilizô; ndô Edom, Môab, n’ivangiṉ’impôlô y’awaṉa w’Amon wi be sungiṉô avila g’ôgo wè. 42E be nyonyuṉ’ôgo wè gw’intye sinyenge, ni ntye y’Egipt yi ze fange. 43E be bong’igumba nyi sika ya teṉateṉa na yi sika ya pupu, na nyi yom̃a yôdu yi njôni y’Egipt; mongi Libya na mongi Etyop wi be dwaṉa gô nyum̃i yè. 44Intyangô avila gô tongwa ni nkômbe, n’avila gô Nor si be bya gô tyezè, ko yè kènda n’eguṉu evôlô gô jiliza azukiz’awenge vya. 45E be dôṽy’inagô s’akuku si nagô yè y’ôga gw’imbegare, na gô nômba y’ôrunda n’ônjèlènjèlè. Avila vovo e be bya gô ntyay, ôma fo gô nunguṉè.

Currently Selected:

Danyèl 11: MYE

Highlight

Copy