USOLWELO 22
22
1Mba wangulwezele lwiji wa meya a mwono, wa kutemuka ngwe kristale, kanatuhuka mu ngunja ya Zambi ni mwe Mwana-panga. 2Mukachi ka tapalo lialio, ni ha sali lino lia lwiji, ni ha sali lize, mutondo wa mwono wakwima kumi lia mihuko ni mihuka yiali, wakwima mihuko yawo kakweji ha kakweji: mafwo ja mutondo a kuwuka no mavungu. 3Ni kukuchi kapwa nawa shingo; ni ngunja ya Zambi ni mwe Mwanapanga kumuyikapwamo: ni ndungo jenyi kumakamulingila. 4O kumakamona meso jenyi; ni jina lienyi kumulikapwa ha mahuma jo. 5Kukuchi kapwa nawa ufuku; o kafupile pangu lia ndeya, chipwe lia tangwa, ka; mumu Mwene Zambi kumakapanguka hali ayo; o kumakayula ndo ku miaka yeswe ya mutolo.
6Iye wambile kuli yami ngwenyi, Maliji ano amwenemwene keshi mahuza: ni Mwene Zambi ya maspiritu ja aprofeta hanatumu mungelo wenyi mukulweza kuli ndungo jenyi chize chatamba kupwa nikawashi. 7Talenu, nguneza nikawashi.
Kawaha yoze mafunga maliji a uprofeto wa mukanda uno.
8Ni yami Yoano nevwile, namwene yino yuma. Mba muze nevwile, namwene, nafulamanyine hanga nguwayile ku molu ja mungelo yoze wangulwezele yino yuma. 9Iye yamba kuli yami ngwenyi, Kanda uchilinga: yami nguli ndungo-ni-mukwenu, ni ndungo-ni-mukwo ni mandumbu je, aprofeta, ni waze akufunga maliji a mukanda uno: wayila Zambi.
10Iye yamba kuli yami ngwenyi, Kanda ujika ni Chijikilo maliji a uprofeto wa mukanda uno; mwaka uli hakamwihi. 11Ngwami, Yoze wakulinga uhenge, akalinge uhenge nawa; ni mukwa majilo, akalipwise mukwa majilo nawa; ni mukwa ululi, akalinge ululi nawa; ni musandu, akapwe musandu nawa. 12Talenu, nguneza nikawashi; ni kwononona chami chili hamwe ni yami, mukuhana kuli mweswe nikulita ngwe chitanga chenyi muchipwa. 13Yami nguli mwe Alfwa, mwe Omega, mwe mutangu, mwe kasulasongo, we uputukilo, lie songo.
14Kawaha waze akukosa mazalo jo ja ngungu, hanga akapwe ni chiyulo ku mutondo wa mwono, hanga akanjile ku yikolo mu limbo. 15Haze atwama tuwa ni akwa kupanda, ni yitanji, ni yingalwe, ni akwa kukombelela mahamba, ni mweswawo wakufwila, wakutomba mahuza.
16Yami Yesu hingunatumu mungelo wami mukushindakenya yino yuma kuli yenu mu yikungulwila. Yami nguli che chikota, mwe Mwana wa David, we mutumbu wa kutemuka.
17Ni Spiritu ni ndungi kanambe ngwo, Tweya. Ni yoze mevwa ambe ngwenyi, Tweya. Ni yoze mevwa pwila eze: ni yoze mazanga atambule meya a mwono chawana.
18Ngunashindakenya kuli mweswe mevwa maliji a uprofeto wa mukanda uno; ngwami, Kachi umwe maweza ku yino yuma, kachi Zambi makaweza kuli iye lamba lieka ni lieka, lize linasonewa mu mukanda uno. 19Nyi kachi umwe machiza ku maliji a mukanda wa uprofeto uno, kachi Zambi makachiza chihanda chenyi ku mutondo wa mwono, ni mu limbo lisandu, ni ku yuma yize yinasonewa mu mukanda uno.
20Yoze wakushindakenya yino yuma kanambe ngwenyi, Ewa, nguneza nikawashi. Amene; tweya, Mwene Yesu.
21Vumbi lia Mwene Yesu Kristu likapwe hamwe ni asandu eswe. Amene.
Ulumbunwiso wa maliji cha.
Talentu ya oru — 59 kilos.
Talentu ya prata — 44 kilos.
Talentu ya unengu — 36 kilos.
Efa—chisoka cha 30 kilos.
Homere—ngwe 300 kilos.
Hine—ngwe 6 litros.
Mbate—efa — 35 litros.
Kore—homere.
Konkubina—Pwo umwe atwama nenyi aiioze kamumbachile.
Virgem—Yoze kanda achilimona ni lunga.
Currently Selected:
USOLWELO 22: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
