KUTUHUKA 19
19
1Ha kakweji wamuchitatu muze te A-Izalele hatuhuka ku chifuchi cha Engitu, ha tangwa lize liene o yaheta ku puya ya Sinai. 2Muze te hakatuka ku Refwindimi haheta ku puya ya Sinai, yajika mbalaka jo ku puya. Kwe kuze kulutwe lia mulundu A-Izalele yatunga chilombo. 3Mose wakandukile kuli Zambi mba Yehova watambikile kuli iye ni liji lia kutuhuka ku mulundu ngwenyi, Chocho ukambe kuli A-Yakomba, nikwambulwila A-Izalele ngwe, 4Nwamwene chize nalingile kuli A-Engitu, ngwe yami nanumbachile ha mapulwa ja pupa nikunuhetesa kuli yami mwene. 5Kashika haliapwila, nyi munuzeya chamwenemwene ku liji liami nikufunga usendo wami, mba kumunukapwa kuli yami upite wami wa kutongola hakachi ka mavungu eswe, mumu hashi heswe ha mbala ha yami. 6Kumunukapwa kuli yami munyachi wa asasendote, vungu lisandu. Wano maliji muwambulula kuli A-Izalele.
7Mose yaya, yatambika makulwana ja atu, yatambika kumeso jo maliji aze eswe Yehova wamwambile. 8Atu eswe yakumbulula hamuwika ngwo, Yuma yeswe hamba Yehova, kumutukalinga. Mose yambulwila Yehova maliji a e atu. 9Yehova yamba kuli Mose ngwenyi, Mungwiza kuli yena mu lelwa lilá hanga e atu evwe muze munguhanjika ni yena, akakufuliele nawa ndo ku miaka ya mutolo.
Mose yambulwila Yehova maliji a e atu. 10Yehova yamba kuli Mose ngwenyi, Yako kuli atu, wasele ku usandu ni musono ni hamene. Akakose mazalo jo. 11Akalilulike tangwa liamuchitatu mumu ha tangwa liamuchitatu Yehova makahulumuka ndo ha mulundu wa Sinai kumeso ja atu eswe. 12Ukasele atu njiza ya kujingilika. Amba ngwe, Nukanyame. Kanda nukanduka ha mulundu chipwe kukwata ku njiza yawo, ka. Mweswawo makwata ku mulundu akamushihe lume. 13Kwoko nilimwe kanda likasungako, alioze akamwase mawe lume, hanji mwivu, chipwe kashitu chipwe mutu. Kanda atwama ni mwono. Muze memba chitavwi, embye-e o akakundame ku mulundu. 14Mba Mose yapalumuka ku mulundu; yaheta kuli e atu. Yasela atu ku usandu. O yakosa mazalo jo. 15Iye yamba kuli e atu ngwenyi, Lilulikenu tangwa liamuchitatu. Kanda nukundama kuli mapwo.
16Mba ha tangwa liamuchitatu muze te hikwacha kwapwile kukulunguza ni mihenyo ni lelwa lilá ha mulundu, ni liji lia tachi lia chitavwi. Atu eswe mu chilombo yachikima. 17Mose yatuhwisa atu ku chilombo akatakane ni Zambi. O yamana ku kulwa mulundu. 18Mulundu weswe wa Sinai te unatuhwisa mwishi mumu Yehova te hahulumukinaho mu kahia. Mwishi wawo yiwanduka ngwe mwishi wa ku lutengo. Mulundu weswe yiunyika chikolo. 19Mba lie liji lia chitavwi te linayi ni kuhiohia ni tachi. Mose yahanjika, mba Zambi yamukumbulula ni liji. 20Yehova yahulumuka ndo ha mulundu wa Sinai, e ndo ha mbulwa mulundu. Yehova yatambika Mose eze ha mbulwa mulundu. Mose yakanduka. 21Yehova yamba kuli Mose ngwenyi, Palumuka, uhane koki kuli atu kuchina mazomboka njiza ndo kuli Yehova mukumutala, mba anji a kuli ayo mafwa. 22Asasendote nawa akukundama kuli Yehova akalisele ku usandu, kuchina Yehova mapula haze nikwaheta. 23Mose yamba kuli Yehova ngwenyi, E atu kahashile kukundama ku mulundu wa Sinai, mumu yena unakatwaha koki ngwe, Ukasele atu njiza ya kujingilika mulundu, ukausele ku usandu. 24Yehova yamba kuli iye ngwenyi, Yako, upalumuke mba ukakanduke ni yena ni Arone hamwe ni yena. Alioze asasendote ni e atu kanda akazomboka njiza mukukanduka ndo kuli Yehova kuchina iye makapula haze nikwaheta. 25Chocho yapalumuka Mose kuli atu. Yaambulwila.
Currently Selected:
KUTUHUKA 19: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
