2 A-KORINDU 9
9
1Mumu ha kutwala ku uvumbiko hali asandu, kuchangutambile kusoneka kuli yenu: 2mumu ngunanyingika kulipupwisa chenu, chize nakulisamba nacho hali yenu kuli A-Masendoniya, ngwe akwa Akeya hanalulika chize ku mwaka waali; nikulinga chenu cha mbunge yeswe hichinakasumuna anji a kuli ayo. 3Alioze hingunatumu mandumbu, hanga kulisamba chetu hali yenu kuchichi kapwa chamokomoko ha kutwala ku chino; hanga chizechene ngwe hinamba nukapwe akwa kululika; 4kuchina hanji kachi meza hamwe ni yami A-Masendoniya amwe, manuwana kanda nutulika, yetu matukolesa sonyi ha ukolelo uno, hi yenu ko. 5Nachinyongene ngwe chinatambe kuliumba kuli mandumbu, hanga atetekele kuli yenu, akamanunune shimbukanda, uwape wenu alilakenyene kulu, hanga ukalulike ngwe uwape, hi ngwe lufutu ko.
6Alioze chino ngunambe ngwami, Yoze makuwa mbuto yikepe, makacha nawa mbuto yikepe; ni yoze makuwa yinji, makacha yinji. 7Mutu ni mutu akahane nikulita ngwe hanalisela mu mbunge yenyi: hi ni chinyengo ko, hanji ha kukapwola: mumu Zambi kakuzanga chihanyi wa kusehejela. 8Alioze Zambi kanahase kulumbamisa yawana yeswe ya vumbi kuli yenu; hanga yenu, nukapwe matangwa eswe ni kulumbama cheswe ha yuma yeswe, nukahiane mu milimo yeswe yipema: 9nikulita ngwe chinasonewa ngwo,
Iye hanamwanga mwamwa, hanahana kuli yiswale,
ululi wenyi kuwalinduluka ndo ku miaka ya mutolo.
10Achi, yoze wakumwesa mbuto chikuwa, ni mbolo ha kulia, kumakanumwesa mbuto yenu ya kukuwa, makayokesa, makatatwisa mihuko ya ululi wenu. 11Manupichisa ha yuma yeswe hanga nukapwe ni kuvungumiona cheswe, chenacho kuchakulinga kuli yetu kusakwila kuli Zambi. 12Mumu kuvumbika chino kuchishi kuyukisa asandu ni yize anahono wika, alioze kuchakulumbama nawa ku kusakwila chinji kuli Zambi; 13se ku kweseka cha yenu ku uvumbiko uno, o kakuchichimieka Zambi ha kuzeyela cha kutayiza chenu ku sango lipema lia Kristu, ha kuvungumiona cha kulianyina chenu kuli ayo ni kuli eswe; 14shimbu ayo ene nawa nikuliumba hali yenu kakunuvwila usona, mumu ha mukunda wa vumbi liahiana lia Zambi muli yenu. 15Tusakwilenu kuli Zambi ha chawana chenyi chize keshi kuhasa kuchambujola.
Currently Selected:
2 A-KORINDU 9: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
