2 A-KORINDU 8
8
1Chikwo nawa, mandumbu, tunanunyingikisa vumbi lia Zambi lize ahanyine ku yikungulwila ya mu Masendoniya; 2ngwe ni cheseko chinene cha luyinda, kulumbama cha uwahililo wo ni uswale wo wunji walumbamine ku upite wa kuvungumiona cho. 3Mumu nikulita ni kuhasa cho, ngunashindakenya, ewa, nikuhiana kuhasa cho ha kupala cha ayo ene, 4nikuliumba kuli yetu ni kulemba chinji ha kutwala ku vumbi lino nikulianyina ha uvumbiko kuli asandu. 5Kachilingile ngwe twanyongene, alioze aliangile kuliecha ene kuli Mwene, mba kuli yetu nawa ku upale wa Zambi. 6Chocho twaliumbile kuli Titu, hanga chizechene ngwe aputukile kulu, chocho nawa akamanunune muli yenu vumbi lino nawa. 7Alioze chizechene ngwe nunalumbama mu yuma yeswe, ni mu Ufulielo, ni mu liji, ni mu yinyingi, ni mu kulipupwisa cheswe, ni mu zango lienu kuli yetu, hanga nukalumbame mu vumbi lino nawa.
8Chachambile ngwe shimbi, alioze hanga ngukeseke, ku kulipupwisa cha akwo, umwenemwene wa zango lienu. 9Mumu nunanyingika vumbi lia Mwene wetu Yesu Kristu, chipwe wapwile pichi, hindu mumu hali yenu, walipwishile chiswale, hanga yenu ku uswale wenyi nukapwe pichi. 10Muno ngunahana upatwilo wami: mumu chino chinanufumbula, yenu nwaliangile kuputuka mwaka waali, hi kulinga wika ko, alioze nawa kupala. 11Alioze haliapwila manununenu kulinga nawa; hanga chizechene ngwe nwalipupwishile kupala, chocho nawa manununenu nikulita ni kuhasa chenu. 12Mumu kachi mbunge kuyili, muchipemena chikolo nikulita ngwe mutu mapwa nacho, hi nikulita ko ni chize keshi nacho. 13Mumu chishi kwamba chino, hanga akalelumune akwo, akanuyindamise yenu: 14alioze ha kulita: kulumbama chenu ha mwakono chikapwe ha kuhona cho, hanga kulumbama cho nawa chikapwe ha kuhona chenu; hanga chikapwe kulita: 15ngwe chinasonewa ngwo, Yoze wakungile chinji, kapwile nacho cha kusambuka; ni yoze wakungile chikepe, kahoneneko.
16Alioze tusakwilenu kuli Zambi yoze wasele mu mbunge ya Titu kulipupwisa chimuwika hali yenu. 17Mumu watayilile chamwenemwene kuliumba chetu; alioze se iye mwene walipupwishile, wakatukile akaye kuli yenu ni upale wenyi mwene. 18Hitwatuma hamwe nenyi ndumbu yoze uhaliso wenyi mu sango lipema unafumana ku yikungulwila yeswe. 19Hi chocho wika ko, alioze iye nawa amutongwele kuli akwa yikungulwila akende ni yetu ha vumbi lino tunalingi ha uhenya wa Mwene, mukulweza kulipupwisa chenu. 20Kuchina umwe matusuma chitela ha kutwala ku kuvungumiona chino tunachilingi; 21mumu twakufupa kusolola yuma yipema, hi kumeso ja Mwene wika ko, alioze nawa kumeso ja atu. 22Hitwatuma hamwe no ndumbwetu, yoze twamuwanyine kanji mukwa kulipupwisa kuhiana chikolo, mumu ha ukolelo unene uze ali nawo kuli yenu. 23Chipwe amwe mahula ha kutwala kuli Titu, iye sepa liami ni mukwa milimo-ni-mukwetu hali yenu; hanji mandumbu jetu, o, tunganda twa yikungulwila, we uhenya wa Kristu. 24Sololenu kashika kali ayo kumeso ja yikungulwila chinyingi cha zango lienu, ni cha kulisamba chetu ha kutwala kuli yenu.
Currently Selected:
2 A-KORINDU 8: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
