2 A-KORINDU 3
3
1Tunaputuka cheka nawa kulisangalisa, nyi? Hanji chatutamba, ngwe chatamba amwe, kupwa ni mikanda ya kutusangalisa kuli yenu, hanji ya kutumiwa kuli yenu, nyi? 2Yenu nunapu mukanda wetu, kuunasonewa mu mbunge jetu, kanaunyingika, kanautange kuli atu eswe; 3chinasoloka ngwe nuli mukanda wa Kristu, wa kulinga kuli yetu, kuunasonewa hi ni ulombo ko, alioze ni Spiritu ya Zambi ya mwono; hi ha mawe ko, alioze ha mbunge ja musunya.
4Ukolelo ngwe uno tuli nawo ku tachi ja Kristu kuli Zambi: 5Kuchapwile ngwe yetwene mutuhasa kwamba ngwetu, Chimwe chuma muchipwa cha kuli yetwene. Kuhasa chetu chapwa cha kuli Zambi. 6Iye Mwene hanatuhashisha ngwe tuvumbi twa usendo waha; hi wa ku lusona ko, alioze wa kuli Spiritu: mumu lusona kakushiha, alioze Spiritu kakupwisa ni mwono.
7Alioze kachi uvumbiko wa kufwa, ni sona ja kwola ha mawe, wejile ni uhenya, chocho ana a Izalele kahashile kuhulikila meso kuli Mose, mumu ha uhenya wa ku meso jenyi, uhenya uze te unahu. 8Mba uvumbiko wa Spiritu kuuchi kuhiana ni uhenya, nyi? 9Mumu kachi uvumbiko wa uhiso ukwete uhenya, kachi Shinaho chikolo uvumbiko wa ululi kuwakulumbamina uhenya. 10Mumu chamwenemwene uze auhenyesene, kauhenyeseneko ha kutwala ku chino, mumu ha uhenya Wahiana. 11Mumu kachi uze wa kuhwa wejile ni uhenya, kachi Shinaho chikolo uze wa kulinduluka kuwakupwa ni uhenya.
12Kashika se kutalatala ngwe chino tuli nacho, twakuhanjika ni hamu linji. 13Hi ngwe Mose ko, wafukile meso jenyi ni wanda, hanga ana a Izalele kechi kahulikila ku songo lia uze wa kuhwa. 14Alioze manyonga jo alayile, mumu ndo tangwa lino, ha kutanga usendo ukulu, wanda kuunasala, kauchijile; mumu muli Kristu te wakuhwa. 15Alioze ndo tangwa lino, heswaho matanga mikanda ya Mose, wanda hindu kuuli ha mbunge jo. 16Alioze heswaho matewulukila kuli Mwene, machizaho we wanda. 17Achi, Mwene mwe Spiritu: ni kuze Spiritu ya Mwene ali, kuze kwene kuchili kutusuka. 18Alioze yetu eswe, ni meso a kufukuka nikunwina uhenya wa Mwene, ngwe katalilo wa kupeyima, kakutwalumuna mu kulifwa chimuwika, chize ku uhenya ndo ku uhenya, chizechene ngwe cha kuli Mwene Spiritu.
Currently Selected:
2 A-KORINDU 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
