1 A-KORINDU 16
16
1Achi, ha kutwala ku kukunga cha mbongo hali asandu, chizechene ngwe naselele ku yikungulwila ya Ngalashia, chocho nawa lingenu. 2Ha tangwa litangu lia semana, eswe a kuli yenu akatumbikile chihanda, nikulita ngwe hanawahisa, hanga kukuchi kapwa kukunga cha mbongo muze mungwiza. 3Mba muze munguheta, eswo munwasela Shindakenyo yipema, mungukaatuma ni mikanda mukumbata chawana chenu ku Yerusaleme: 4nyi kachi yami changutamba kuya nawa, kumakaya hamwe ni yami.
5Alioze mungukeza kuli yenu muze hinapalika ndusu mu Masendoniya; mumu mungupalika ndusu mu Masendoniya; 6alioze hanji mungukatwama hamwe ni yenu, chipwe kutwama mwaka wa chishika, hanga nukangushinjikile ha wenyi wami kweswako munguya. 7Mumu chazangile kunumona haliapwila ha kupalika mu jila; mumu ngunatatatata kutwama shimbu hamwe ni yenu, kachi Mwene matayiza. 8Alioze mungukatwama mu Efwesu ndo ku Pentekoste. 9Mumu hanangwazulwila pito linene, lia tachi, alioze kwali akwa kulimika anji.
10Achi, nyi Timoteu meza, nukatale akapwe hamwe ni yenu keshi woma; mumu kakulinga milimo ya Mwene, chizechene ngwe yami nawa nakulinga: 11niumwe kashika kanda akamulelesa. Alioze nukamushinjikile mu jita yenyi ni sambukila, hanga akeze kuli yami: mumu ngunamutalatala hamwe ni mandumbu.
12Alioze ha kutwala kuli ndumbu Apolu, naliumbile chikolo kuli iye, akaye kuli yenu hamwe ni mandumbu; alioze kuchapwile upale wenyi kuya haliapwila, chipwe hakehe, alioze kumakaya muze mawana mwaka upema.
13Lenu, jikizenu mu Ufulielo, lingenu ngwe malunga, fundulenu. 14Yuma yize yeswe munulinga yilingenu ni zango.
15Haliapwila ngunaliumbu kuli yenu mandumbu, (nunanyingika akwa zuwo lia Esetefwana, o ye mihuko yitangu ya kuli A-Akeya, o hanalisela ku uvumbiko wa asandu), 16hanga yenu nawa nukazeyele kuli atu ngwe wano, ni kuli eswe akukwasa mu milimo, akukilikita. 17Ngunawahilila ha kuheta cha Esetefwana ni Fortunatu ni Akaiku: mumu chize chahonene ha kutwala kuli yenu, o hanangumwesacho. 18Mumu asangulwishile Spiritu yami ni maspiritu jenu nawa: kashika tayizenu atu apwa ngwe wano.
19Yikungulwila ya Eshia kananumeneka. Akwila ni Prisela kananumeneka chikolo muli Mwene hamwe ni chikungulwila chize chili mu zuwo lio. 20Mandumbu eswe kananumeneka. Limenekenu umwe ni mukwo ni mukwo ni mbeju yisandu.
21Kumeneka cha yami Paulu ni kwoko lia yami mwene. 22Kachi umwe keshi kufwila Mwene, akashingiwe. Mwe Mwene kaneza. 23Vumbi lia Mwene Yesu Kristu likapwe hamwe ni yenu. 24Zango liami likapwe hamwe ni yenu eswe muli Kristu Yesu. Amene.
Currently Selected:
1 A-KORINDU 16: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
