1 A-KORINDU 15
15
1Alioze ngunanunyingikisa, mandumbu, sango lipema lize nanwambujolele, lize nawa nwatambwile, mwenamo nawa nunamana; 2ku lienalio hananulamwina, kachi munukalalaminya liji lize nanwambujolele, shina nwafulielele chamokomoko.
3Mumu nanukunjikile hatangu chize nawa yami natambwile, ngwe Kristu wafwilile milonga yetu nikulita ni yisoneko; 4amufunjile; amuhindwishile ha tangwa liamuchitatu nikulita ni yisoneko; 5amonekene kuli Sefwa; mba kulutwe kuli e kumi ni aali; 6kulutwe amonekene kuli mandumbu kuhiana kulakaji atano ha chisuho chimuwika, a kuli ayo anji ali ni mwono ndo haliapwila, alioze amwe hanayi tulo; 7kulutwe amonekene kuli Tiangu: kulutwe kuli apostolo eswe; 8ha kusula eswe, ngwe kuli mwana wa kusema shimbu kanda, wamonekene kuli yami nawa. 9Mumu ami nguli mukepe Wahiana eswe a kuli apostolo, chatelele akanguvuluke ngwo, Postolo, mumu nahungumionene chikungulwila cha Zambi. 10Alioze ku vumbi lia Zambi nguli chize nguli; ni vumbi lienyi lize anguhele kuliapwile liamokomoko; alioze nakilikichile kuhiana eswe: hindu hi yami ko, alioze vumbi lia Zambi lize liapwile hamwe ni yami. 11Chipwe yami, chipwe ayo, chocho twakwambujola, ni chocho nwafulielele.
12Achi, nyi anambujola Kristu, ngwe hanamuhindwisa hakachi ka afu, ngwe kuchi amwe hakachi kenu anambe ngwo, Uhindukilo wa afu wakuhi niumwe? 13Alioze kachi wakuhi Uhindukilo wa afu, kachi chipwe Kristu kamuhindwishile. 14Nyi kachi kahindwishile Kristu, kachi kwambujola chetu chamokomoko, ni Ufulielo wenu nawa wamokomoko. 15Ewa, kanatuwane yela ja Zambi ja mahuza; mumu twashindakenyene hali Zambi ngwetu, Wahindwishile Kristu: yoze kamuhindwishileko nyi chocho chinapu keshi kuhindwisa afu. 16Mumu kachi keshi kuhindwisa afu, chipwe Kristu kamuhindwishile: 17nyi kachi kahindwishile Kristu, Ufulielo wenu wamokomoko; ni yenu nuchili mu milonga yenu. 18Mba waze nawa hanayi tulo muli Kristu, hanatoko. 19Nyi mu mwono uno wika tuli ni kutalatala muli Kristu, kachi yetu a kuli atu eswe, twahiana hunya.
20Alioze haliapwila hanahindwisa Kristu hakachi ka afu, muhuko utangu wa kuli waze hanayi tulo. 21Mumu se kuli mutu kufwa chejilile, kuli mutu nawa Uhindukilo wa afu wejilile. 22Mumu chizechene ngwe muli Alama eswe anafu, chocho nawa muli Kristu makapwisa eswe ni mwono. 23Alioze mutu ha mutu mu ngango yenyi: Kristu we muhuko utangu; mba kulutwe waze a Kristu ha kuheta chenyi. 24Mba kulutwe mukukapwa songo muze makakunjika wanangana kuli Zambi kanda mwe Tata, muze te hahwisa kuyula cheswe ni yiyulo yeswe ni tachi jeswe. 25Mumu chamutamba kuyula ndo masa akwa kole jenyi eswe kushi lia yiliato yenyi. 26Mukwa kole wa kusula kuhwa, iye kufwa. 27Mumu ngwenyi, Wazeyesele yuma yeswe kushi lia yiliato yenyi. Alioze muze mamba ngwenyi, Hanazeyesa yuma yeswe, chinasoloka pundu kavulukile yoze wazeyesele yuma yeswe kuli iye. 28Muze te hazeyesa yuma yeswe kuli iye, hohene mwe Mwana nawa iye mwene kumakalizeyesa kuli yoze wazeyesele yuma yeswe kuli iye, hanga Zambi akapwe yeswe muli eswe.
29Nyi chocho, kuchi malinga waze hanaapapachisa hali afu? Nyi keshi kuhindwisa afu nichimwe, kuchi te kevwe hanaapapachisa hali ayo? 30Kuchi te yetu nawa twakulisela ku Utoji ola jeswe? 31Ewa, ngunashindakenya ku kulisamba chize hali yenu, mandumbu, chize nguli nacho muli Kristu Yesu Mwene wetu, nakufwa tangwa ha tangwa. 32Nyi kachi nikulita ni atu nalitachikile ni ngongo ku Efwesu, chika ngunafumbuka? Kachi keshi kuhindwisa afu, ngwami, Tulienu, tunwenu, mumu hamene mutufwa. 33Kanda nulionga, Usepa upi kuwakupihisa ndako jipema. 34Lawilenu ku ululi, kanda nuvulumuna; mumu amwe keshi chinyingi cha Zambi: ngunahanjika chino hanga ngunukolese sonyi.
35Alioze umwe mamba ngwenyi, Ngwe kuchi mahindwisa afu, ni mujimba uka meza? 36Yena Chizuzuke, chize yena mwene makuwa, keshi kuchipwisa ni mwono shina muchifwa; 37ni chize mukuwa, kushi kukuwa mujimba uze muukapwa, alioze lunona wika, hanji mapwa wa tiliku, hanji wa mbuto yimwe yikwo; 38alioze Zambi mayaha mujimba chizechene ngwe apalile, ku mbuto yeswe mujimba wayo yene. 39Musunya weswe hi musunya umuwika ko: alioze kuuli musunya umwe wa atu, ni ukwo musunya wa tushitu, ni ukwo musunya wa tujila, ni ukwo wa yishi. 40Kuyili nawa mijimba ya mwilu, ni mijimba ya hashi; alioze uhenya wa uze wa mwilu umwe, ni uhenya wa uze wa hashi weka. 41Kuuli uhenya umwe wa tangwa, ni uhenya ukwo wa kakweji, ni uhenya ukwo wa matongonoshi; mumu lutongonoshi umwe malipalikila ni mukwo ni uhenya.
42Chocho nawa Uhindukilo wa afu. Maukuwa mu kupola; mauhindwisa mu ungunu: 43maukuwa mu sonyi; mauhindwisa mu uhenya; maukuwa mu ulelu; mauhindwisa mu tachi. 44Maukuwa mujimba wa chisemewa; mauhindwisa mujimba wa uspiritu. Kachi kuuli mujimba wa chisemewa, kuuli nawa mujimba wa uspiritu. 45Chocho nawa chinasonewa ngwo, Mutu mutangu Alama wapwile mukwa mwono. Alama wa kusula kapwa Spiritu wa kuhana mwono. 46Alioze cha uspiritu, kuchapwile chitangu. Cha chisemewa chaliangile; mba kulutwe kwejile cha uspiritu. 47Mutu mutangu wa hashi, iye mukwa mavu: mutu wamuchiali iye wa mwilu. 48Chizechene ngwe mukwa mavu, chocho nawa akwa mavu: chizechene ngwe mukwa mwilu, chocho nawa akwa mwilu. 49Chizechene ngwe twapwile mu kulifwa cha mukwa mavu, chocho nawa mutukapwa mu kulifwa cha mukwa mwilu. 50Achi, chino ngunambe, mandumbu, ngwami, Musunya ni manyinga kuyishi kuhasa kuhinga wanangana wa Zambi; chipwe kupola kuchichi kuhinga ungunu.
51Talenu, ngunanwambulwila chijimbikilo; yetu eswe kutuchi kaya tulo, alioze makatwalumuna eswe. 52Susumuku, ha kukamuna cha liso, ha chitavwi cha kusula: mumu chitavwi muchikahanjika, mba makahindwisa e afu ni kupola chakuhi, ni yetu makatwalumuna. 53Mumu chatamba yono mukwa kupola kuzala chize kuchishi kupola, chatamba yono mukwa kufwa kuzala chize kuchishi kufwa. 54Alioze muze yono mukwa kupola hazala chize kuchishi kupola, ni yono mukwa kufwa hazala chize kuchishi kufwa, hohene liji mulikamanunuka, lize linasonewa ngwo,
Kukumba hichajimuna kufwa.
55Yena kufwa, Ulihi lumunyi we?
Yena kufwa, Chilihi kukumba che?
56Lumunyi wa kufwa, shili; ni tachi ja shili, shimbi: 57alioze tusakwilenu kuli Zambi, yoze wakutwaha kukumba ku tachi ja Mwene wetu Yesu Kristu.
58Kashika, mandumbu jami a zango, jikizenu, kanda nukokoloka, nukahiane matangwa eswe mu milimo ya Mwene, mumu te nunanyingika, kukilikita chenu hi chamokomoko ko muli Mwene.
Currently Selected:
1 A-KORINDU 15: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
