Korint I 7
7
SU BER KORINT NDEMANI PAULUS LE LONGU HENDRE E HENDRE.
Nongen ad Paulus le ndro su.
1Mu da gin ndemani io le longu hendre e hendre le nongen ademu. Io vong le ndro mu, io bode: I hian le ndro hom gamel i da ibdi hom bihin le nambulen bui. 2Hendre ge debosan i bo longu sungsou i hian ge ar gamel i ibdi bihin homo le nambulen, dagara hom bihin i ibdi hom gamel le nambulen. 3Gamel i da dogi monen ge baghege ndro bihin, dagara bihin ir dogi monen ge le um ad nambulen. 4Mandrn ad bihin i aden bui, i ad nambulen, dagara mandrn ad gamel i aden bui, i ad nambulen. 5Homo i ha lengi dege nambulen i ha lengi, be mu ha bandri le daim hebe beg raring, mor hanguruen homo ma homo muren, debosan Satan i seslaini mor le longu aden momen. 6Heb nongen ogo i da le hanguruen ordo, io hanguruen i monen ge, io de dono bai bui, aga nongen ad Jehova ge. 7Io ha lengi su ndramed masigane su dege io, ar homo i da hanguruen le longu ogo bui dege io hanguruen, gonan, i hanguruen dege Jehova i da daui le hanguruen aden.
8Io bai le ndro su gamel su de gin ibdi hom bihin le nambulsu bui, dagara le ndro su bihinou, i hian ge, be mu da le um ademu molhe dege io lie. 9Be mu ndoa leri bui, gonan, su ibdi hom bihin de hom gamel le nambulsu, aga i hian hanu, be Sadan i da seslaini su le hangungerou manden. 10Io da bai malabo le ndro su, su da gin ibdi bihin de gamel le nambulsu, io bui, Ndorlaben i bai le ndro su: Hom bihin de bieni gamel aden bui. 11Be i gin bieni nambulen, i de ibdi hom gamel le nambulen bersilie bui, i dandon molhege le um aden, de i lug beno le ndro nambulen hanu. Dagara gamel i de gbieni nambulen bui.
12Le ndro su masi io vong, Ndorlaben bui: Io bai, be hom gamel i homo asu Kristen, nambulen i homo asu Kristen bui, de bihin ogo i somui beg gsou le um ad gamel, hian gamel i somui leri, i de robuldi nambulen bui. 13Dagara be hom bihin i homo asu Kristen, nambulen i homo asu Kristen bui, be i ha leng gsou le um ad bihin, bihin i ha somui ri, i de bieni nambulen bui. 14Gamel de bihin i hom Kristen bui, i da horuan gle ad nambulen i hom Kristen, dagara bihin i homo asu Haiden i horuan le ad nambulen, i da hom Kristen. Be dagara bui, su ndurm ademu su da segdan momen ge, dandu i malabo su ad Jehova lie. 15Be hom bihin de gamel i hom Kristen bui, i beg bieni nambulen, i danen hinen i, i gbieni nambulen dege i ha lengi, aga longu hendre momen bugane, Ndorlaben Jehova i gin lug beno ge le bergolmu, i mbueren bahun. 16Uo bihin uo danem sa, uo ndoa le rui nambulem le gor lundielang? Ma uo gamel uo danem sa, uo danem rui nambulem le gor lundielang? 17Dege Ndorlaben gin hengen homo ma homo longu aden, dege Jehova gin eloh i, dagara i dogi, aga heb nongen ordo le ndro su Kristen masi. 18Ar homo gin ibdi gelman ad Jehova, su gin sindrdi mandrn, mbue i gorni gelman ogo. Ar homo i hom lao ad Jehova, le lain asu Haiden, i de ibdi gelman asu lao ad Jehova ber Juda bui. 19Sindrdi mandrn ad homo aga molhege be gelman ad Jehova, su Juda ibdi i sidesi, i da ndro homo bui, aga molhege lie. Ar homo i da hinen nongen ad Jehova ge, aga i hian, aga i monen ge. 20Homo ma homo i gsou dege Jehova i gin loh i. 21Be uo hom lao dandendegei ad hom ndorlaben, mbue ndrnem i gosusngo leri, be ndorlaben i ha leng rumburdi uo le mburer adem, hian uo somui ri. 22Lao dandendegei ad hom ndorlaben i da hom lao ad Jesu Kristo lie, Ndorlaben aden Jesu Kristo gin rumburdi i. Dagara hom labenen i hom lao ad Jesu Kristo, be Ndorlaben gin loh i. 23Ndorlaben gin semani mu gle memrad mabosanged, mbue mu lao dandendegei asu ndramed. 24Mu ndere hian, homo ma homo i dandon dege i gin loh i.
25Heb nongen ad Jehova le ndro su ndurbihin bui. Io ge, io beg bosoui heb hanguruen ordo, io hom ndramed, Jehova gin ibdi gahaloseli le ndro i, danmu hirong nogen ordo. 26Io hanguruen, be su ndurbihin gin ibdi homo le nambulen masou su gsou molhe le, rang ogo aga rang momen ge. 27Be uo gamel gin ibdi hom bihin le nambulen, mbue robuldi i, be uo da le um adem molhe, mbue ibdi hom bihin le nambulem. 28Be uo ha leng ibdi hom bihin gle nambulem aga longu hendre momen bui, dagara ndurbihin i de gob longu hendre momen bui, be i da ibdi hom gamel le nambulen. Aga ndangen, longu mabosanged ma ngendian manden i da ndro sor marmou, io ge, io ha leng bogulue mu le ngendian masi dagara.
29Mu ndere, hian, io boi le ndro mu: Daim i eluen bui, i murai ge, su da gin ibdi su bihin gle nambulsu su da hanguruen monen, su dege su, su da molhege le um asu. 30Su da ha reng, mbue su hanguruen ngendian asu, su da ha mugmug ge, mbue su mugueni longu asu. Su da ha simsim, mbue su hanguruen memrad asu. 31Su da ha dogi le gor asu ber boan, mbue su ibdi bern asu ber boan. Gor boan dege mu ilndri i malabo na glos. 32Io ha lengi mu do da hian ge le gor ademu, de danmu hanguruen longu mabosanged ber boan bui. I da gin ibdi homo le nambulen bui, i hanguruen ge mburer ad Ndorlaben, i ha lengi, Ndorlaben i mugueni i ge. 33I da gin ibdi homo le nambulen, i da hanguruen longu hendre e hendre ber boan, i ha leng mugueni nambulen gleri. 34Hanguruen aden, i hilou heb gle mburer ad Ndorlaben, heb gle mburer aden ber boan. Dagara hom bihin, nambulen bui, ma ndurbihin nambulen masou, i da hanguruen mburer ad Ndorlaben ge, i ha lengi mandrn ma meluan i rosan ge, i helian. Bihin, i da gin ibdi hom gamel le nambulen, i da hanguruen longu hendre e hendre ber boan, i ha leng mugueni nambulen. 35Be io gin bai, mu da le um ademu molhege, io ha leng sobani mu ge io mbuere hosi mu, io ha leng mu ndoa ge le mburer ad Jehova. 36Be hom damen i hanguruen, i heb hian monen bui, ndurbihin i da molhege le um aden, i ha ibdi hom gamel gle ndro i le nambulen, dege i ha lengi, i de bo momen leri bui. 37Ar homo i da ndoa le bergoln i danen i hian ge le ndro ndurbihin aden i gsou molhege, hanguruen aden i hian lie. 38Homo i da ibdi le ndro ndurbihin aden hom gamel gle nambulen, i da bo hian ge, Ar homo i ha lengi ndurbihin i gsau molhege i bo hian hanu.
39Hom bihin i nambulen ad gamel, be gamel i da le boan. Be nambulen i gin mad, aga mburer aden ge be i ha leng ibdi hom gamel le nambulen lie, dege i ha lengi, be Ndorlaben Jesu i ha somui ri. 40I hian hanu, io mugueni i, be i gsou hom bihinou, aga hanguruen ordo, ma Meluan ad Jehova i da le bergolo lie.
Currently Selected:
Korint I 7: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
