Ifiso 5

O Dmak no i Ta^ngaday

1Tona o kakaolahan no Kawas a wawa kamo saka, o tatodongen namo Cingra. 2Pahapinangen ko olah namo i masamaamaanay a dmak namo a matiya o nika olah ni Kristo i titaanan. Kinafalah Cingra to 'orip to saki titaanan a malafangsisay a sapacakat ato sapato'aya i Kawas.

3O finawlan no Kawas kamo saka, caay ka nga'ay a masowal i tamowanan ko nika 'odang ato masamaamaanay a kaackan ato ma'anofay a dmak. 4Sawaden ko kasimelangan a sowal ato misakmotay a sowal ato kaackan a lawla. Caay ka nga'ay konini a dmak. O nipiahowid to Kawas ko nga'ay. 5Kafana' kamo, o ma'odangay a tamdaw ato kaackan ko dmak a tamdaw ato ma'anofay a tamdaw (o ma'anofay hananay i, o ccay no pita'ong to samiyay), o matiniay a tamdaw i, caacaayto ko ni Kristo ato no Kawas a Kitakit a finawlan cangra.

6Aka ka lipalaw no misa'fitay a sowal kamo. O matiniay a dmak ko sakakter no Kawas to caay pitoor Cingraan a tamdaw. 7Orasaka, aka pinaol kamo to matiraay a tamdaw. 8I ti:yaho i, i to'manay kamo. Anini sato i, malamitoorayto kamo to Tapang saka, i ta^ngadayto kamo. Orasaka, samatiyaen o i ta^ngaday a tamdaw ko dmak namo. 9O masamaamaanay a nga'ayay ato mo^celay ato so'linay ko dmak no i ta^ngaday a tamdaw. 10Orasaka, hapinangen ko nika o maan ko karahkeran no Tapang. 11Aka pikihatiya to i to'manay o caay ka ci^poc ko dmak a tamdaw. O pikrid cangraan a patayra i ta^ngaday ko nga'ay. 12(Nawhani o kakangodoanto ko pisahci a pasowal to pakalimekay a dmak nangra.) 13Yo mapatdi no likat ko masamaamaanay a dmak i, itiya a mahapinang ko nika masamaanay koya dmak. 14Nawhani o mipahapinangay to ^min i o likat.#5.14 Nawhani o mipahapinangay to ^min i o likat -- ano ^ca i, Nawhani o likat ko pahapinangay to ^min no dmak. Orasaka, mato sowal a matilid i Fangcalay Cudad,

<<Mafoti'ay a tamdaw, kapalal.

Kalomowadto a ma'orip nai patay.

Ta mapatdi ni Kristo kamo,>> saan.

15Orasaka, pina'on kamo to dmak. Aka ka matiya o mafolaay a tamdaw, kamatiya o citanengay a tamdaw. 16Tatiih ko pinangan no aniniay a hkal, saka, kalimlaen ko kanga'ayan namo a romi'ad. 17Orasaka, aka ka apa kamo. Kafana' kamo to nika o maan ko nafaloco'an no Tapang.

18Aka ka lasang no ^pah. Nawhani o mitfaday to 'orip namo konini. Ka o matomesay no Fangcalay 'Adingo kamo. 19Ka o 'olic ato fangcalay a radiw ato no 'Adingoan a radiw ko sakati'ciw#5.19 sakati'ciw -- o roma i, sakacacawi, ki'ciw (Fata'an). namo a romadiw. Ka o nai faloco'ay namo a radiw ko sapahmek to Tapang a pasayra i Cingraan a romadiw. 20Ta pakaynien i ngangan no Tapang ita ci Yis Kristoan ko nika rarid a miahowid to Wama a Kawas i masamaamaanay a dmak.

O Dado^doen no Mararamoday

21Kasasihaklong kamo, nawhani o mangodoay kamo ci Kristoan.

22Kamo o fafahi i, samatiyaen o nipihaklong to Tapang ko pihaklong namo to fa'inay no tireng. 23Nawhani matiya o nika o tapang no kiwkay ci Kristo ko nika o tapang no fafahi ko fa'inay. O pa'oripay to tireng Ningra a kiwkay ci Kristo. 24Saka, ano masamaamaanayto a dmak i, samatiyaen o nipihaklong no kiwkay ci Kristoan ko nipihaklong no fafahi to fa'inay ningra.

25Kamo o fa'inay i, samatiyaen o nika olah ni Kristo to kiwkay a kinafalah to tireng to saki kiwkay ko nika olah namo to fafahi no tireng. 26O sakapihaen Ningra to dmak i, pakaynien Ningra i sowal ato nanom ko sapikorac to kiwkay, 27ta malamakapahay, malamakoracay, o awaay ko nadokadoka'an#5.27 nadokadoka'an -- o roma i, tolac (ka'amis), padihac (katimol)., caay ka ci'oning, ano ^ca i caay ka cikofel, ta o nga'ayay a sapacakat i tireng no niyah. 28Malcad tonini, o sasamatiyaen no fa'inay ko nika olah to tireng ko nika olah to fafahi. O maolahay to fafahi a fa'inay i, o maolahay to tireng no niyah. 29Awaayho ko mi'intelay to tireng no niyah. Midipotay to tireng a ma^min ko tamdaw a matiya o nipidipot ni Kristo to kiwkay. 30Nawhani o ca'ang no tireng ni Kristo kita. 31Mato sowal a matilid i Fangcalay Cudad, <<Onini ko saka liyasen no tamdaw ko mama ato ina ningra a malaccay ato fafahi ningra. Malaccayto ko tireng noya tatosaay,>> saan. 32O tadamaanay a pakakmoday a sowal no Fangcalay Cudad konini. Mafana' kako, ci Kristo ato kiwkay ko nisowalan tonini. 33Nikawrira, kamo o kahaccaccay ko roma a nisowalan tonini. Samatiyaen o nika olah to tireng ko nika olah no fa'inay to fafahi. O kakangodoen no fafahi ko fa'inay.

Currently Selected:

Ifiso 5: AMIS2019

Highlight

Copy