Markga 4
4
1Egi shige teja hijejeja washa wagigus‐shana, egi eja hornihexetexji storna, esge waj‐hisha ejahokewena, egi tejainja minagshana, egi worohanka harnaj teja hijej moroija unankshana.
2Egi washara rohaxji wagigus‐shana washinsgera hiu, egi wogus harnieja wawagena:
3Harnaxguwine, horuxujwire, max‐hoshuisha maxhoshurena.
4Egi herena, jaja woshugi, hota nagueja kirinak‐hirena, egi wanig wangregi‐herera hajiranaga egi jeb‐wahirena.
5Egi hota inijaija kirinak‐hirena, eja inke makax junina, egi higuana haxeb‐hirena, inke makaxra shewenige esge.
6Egi jaja wira hankshi‐jinakhi daxuirena, egi inke reju ju‐ranige esge hatatek‐hirena.
7Egi hota napahi horogeja kirinank‐hirena egi napahira haxeb‐hirena egi warnassag‐hirena egi inke waisgab haminag‐hiranina.
8Egi hota makax hophieja kirinank‐hirena, egi waisgab haminag‐hirena, e haxeb‐hiregi egi rohamena, egi hota kerepana‐dani haminag‐hirena egi hota kerepana‐hakewe egi hota hogihisha.
9Egi wawagena: Hisha nuxhopox winaxgu jungi, naxguhiwiaje.
10Egi jaja inekigi, jarnaga hijauankhi nuphashanara wakishu wahsa hisgerara higiwaxhirena.
11Egi wawagena: Hornikunawina washa nuxawara hiraperes‐jawina Maura hungma harnieja, eshi jangeja nangre washan de‐e harnaj washinsgera wigiuinena.
12Wajara, wajairekjege egi inke higiranikjanena, egi warnaxgura naxguinekjanena egi inke hiperes‐hiranikjanena, e inkehahi wakshairanikjege egi washa woishana warninera wagit’unairekjanege.
13Egi wawagena: Washinsgera de‐e inke hirapereswinishe, jasge rawianaga washinsgerara harnaj wiraperesjanihawishe?
14Max‐hoshura hoit’era hoshurna.
15Egi de‐e herenankshana nagu‐ejanankhi, eja hoit’era hoshurena, jaja naxguinegi, Satanra higuana jianaga egi hoit’era wagirusjena najge warnineja woshuirera.
16Egi de‐e hererena e ininjaija woshuirera e jaja hoit’era naxguinega higuana wogishawa rus‐hirena.
17Egi inke reju juiranina, esge jowexjinig u hahiranaga, hageja jaja hawera egi higishana‐naine jigi hoit’era hawau higuana watoxinena.
18Egi de‐e hererena, e napahi rogeja woshuhirera, shesgera hoitera naxguinega,
19Egi ma‐tegi najge wojianaga egi hitajera waishjankejege egi washinjahi rogu hijokawairena, hoit’era nihaijebhinana egi inke washa haminagninana.
20Egi de‐e hererena makax hophieja woshu‐hirera, shesgera hoit’era naxguinena egi rus‐hirena egi washa haminag‐hirena, hota kerepana‐dani, hota kerepana‐hakewe egi hota hogihisha haminag‐hirena.
21Egi wawagena: Jasge hiratasha‐kerehira hisha heregi wigus hokiphi khuhainja taekerenashe? Shige homig khuhainja kerenashe? Jasge inke hiratashakerehi hornashi‐eja kereninashe?
22Inke washanisha nuxawanina e inke janti‐hiranikjanegi, egi shige inke washanisha harnuxawa‐ninana eshi harnaj hornaekjanena.
23Higu peshe nuxhopox winaxgu jungi, naxgu‐hiwiaje.
24Egi wawagena: Hirakarauwine jagu nanaxguwingi, wigus jagura hisha wigus‐hishuwingi, wigus e hinigiuinekjanihawina, egi jarnaga nanaxguwine, hiraijera hornikuinekjanihawina.
25Higu peshe washanijegi e hisge hokuinekjanena, egi higu peshe inke washa junijegi e girus‐hirekjanena e washa harnijegi.
26Egi wena: Maura hungma harnira shesgagshana, wangra hisha sura mainja woshuje hikisgena.
27Egi nanaga egi kikawa‐anje haheregi egi haxeb‐hiranaga egi xetenankshana, jasge waunagra inke hiperesnina.
28Egi managre e kiku washara haxebnankshana, jorni xawi haxebnankshana, hageja waisgab nassura jinaganaukshana egi hageja waisgab nassura waisgabra hoixjinankshana.
29Eshi jaja waisgabra rojuinege, higuana waisgab‐higijgisra regiginana maxhoikisherera herege esge.
30Egi wena: Jaguisha Maura hungma harnira hikisgeshe hiawishe, egi shige washinsgera jaguisha hikisge hihikjanihawishe?
31Mustard su‐isha hikisgena, e jaja mainja hoshuiregi, managre eegi washa surakhi xunuxjinigra herena.
32Eshi jaja hoshuiregi, haxebgi egi hiraijera xete jijena xawi‐abxetera harnaj horujis‐hirena, egi na‐akarajge xetera haxebhirena, e wanig wangregi herera hoirahasi khuhainja jhirekjege.
33Egi hoit’e wawirogiragshana washinsgera shesgera roha hiu, jasge naxgu ruxurughiregi.
34Eshi washinsgera rokani inke wawokit’arnina, egi jaja inekhi hiregi, wironag warnira washara harnaj wijanti wogiragshana.
35Egi hambeja jaja hoxjarna hakirigi, wawagena: Teageja howainekjawina.
36Egi jaja worohanka kere‐wagigiregi, Jesus rus‐hirena waj‐hounagraeja. Egi eja shige waj xununig hijane wakishu una.
37Egi maintajehira rokana hakirina, egi jashjana wajrogeja howairena, wajra nira hoixjina.
38Egi Jesus waj hageja wipeianaga nanakshana. Egi ruxink‐hirena egi wagaireshguni: Hirukanara, inke najge woirajiwinishe jegjanihawina?
39Egi nashina egi maintajehira najisgina egi tejana wagena: Xapgunine, gissewere. Egi maintajehira rushjana, egi hatagra rokanana.
40Egi wawagena: Jagu‐u nanaxi‐sharawishe? Jasgegaja inke harnaxgu hashiniwinishe?
41Egi naxirera rokana‐hirena egi wakigairena: De‐e wang jaguisha hereshe, maintajehira hereanaga egi tejanra harnaxguine.
Currently Selected:
Markga 4: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
