Markga 1
1
1De‐e jeghojikerera herena woragphi Jesus Kristus harnira, Maura Hinigra.
2De‐shesge prophetra wagaxhirena: Horuxujre, worag harnira hishja joweraija howarehagigina, e joweraija nagura hirushjaningigikjege.
3Hora jantinjena hisha mojainainja wahokhura. Hirukanara nagu harnira hirushjangigiwire egi mowe nagura roja‐gigiwire.
4Johnga mojainainja niwawaxunjena, niwawaxu wihokhujena najgera‐karateghiregi washa woishanara wagit’unainekjanena.
5Egi Judea mowagaxeja herera egi Jerusalem eja herera harnaj hirajirena. Egi harnaj niwawaxu‐hirena Jordan ni‐eja, washa woishanara wokaraghirege.
6Egi Johnga washa huxashog‐hin wornashi‐isha hornashina egi waxui‐pirag hisha hipiragshana, egi sasajge rujshana egi hesig‐danishu hojainainja here.
7Egi wahokhuna, wena: Hisha hiraijera mashjaisha hiroinag jikjanena, E waguje‐sika harnira inke pakhuanaga girushge hiakisgarnina.
8Hisgexji ni wagiu hajena harnipaxu hajane, eshi E Naxirag Wakanjangra harniwaxu‐kjanihawina.
9Egi hambanaka eja wauna, Jesus Nasaretheja howajina Galilea mowagaxeja, egi ni hawaxuinena Jordaneja Johnga wauna.
10Egi higuana nieja anjinakshana wangregi ruhas‐hire hajarna egi Naxiragra rujgesga hikisge harnukanag hurna egi hasherena.
11Egi wangregi hora howajina wena: Neninena Hinignira wornigixetera E haiphixji‐shununa.
12Egi higuana Naxiragra wauna mojainainja howahas‐shana.
13Egi mojainainja hambra kerepana‐jopaha una, egi Satan hiunjaire egi wanoijge hojaina horaje hakishu una, egi waxopiniwarajhirera harniuinena.
14Egi hageja Johnga jhi‐hornassairena Jesus Galilea‐eja kirina, Maura hungma woragphi harnira wihokhunjena.
15Egi wena: Hereginina egi Maura hungma harnira hiwusunsh jina, najgera‐karategwire, egi woragphira harnaxguwine.
16Egi Galilea t’e hijejeja howe‐manianku Simon hajarna egi e khinubra Andreas, hoigixera teja hot’unanankshana, hoikishere waunanke.
17Egi Jesus wawagena: Hiroinagwire, egi wankshig hikishere niunkjanihawina.
18Egi higuana hoigixe warninera wat’unairena egi hironag‐hirena.
19Egi jaja jowexjinig hiraijera howaregaja, Sebedai hinigra Jakobga hajarna egi e khinubra Johnga, e hishge wajeja hoigixe warninera wakurujag‐nankshana.
20Egi higuana wagigorna egi hianjhirera Sebedai t’unairena wajeja wang warera wakarakishu egi hironag‐hirena.
21Egi Kapernaumeja hokawairena, egi higuana Sabath hambgi wohokhu‐hojhieja hokewena egi washa wagigusshana.
22Egi wogus harnira gixixhirena washa wagigusra hisha homashja harni hikisgewena, egi inke wowagax‐hiperes hikisgarnina.
23Egi wohokhu‐hojhieja wangisha jena naxirag‐shishig hisha harnijena, egi uwana,
24Wena: Shegu unjewiwine, jagu ningiuhajeshe, Jesus Nasaretheja ninegaja? Maisinsh hinarajiwishe? Hiniperes‐shana peshe ninera Hishankira wakanjangra Maura eja howaji.
25Egi Jesus winakewehina, wena: Xapguni nashinge, egi eja hihinabre.
26Egi jaja naxirag shishigjega mainaje jirehigi, egi mashja uwana, eja hihinabshana.
27Egi harnaj khorairena, hikiwax‐hajiarairena, wairena: Jaguisha de‐e hereshe? Wogus jeg jaguisha de‐e hereshe? Homashja hiuanaga naxirag shishigra uwashira, egi giuinena.
28Egi higuana ma‐nanka harnaj hornaxgura hoerarena Galilea mara.
29Egi jaja wohokhu‐hojhieja hihinab‐hiregi, higuana Simon egi Andreas hojhireja hokawairena Jakob egi Johnga hakishu.
30Egi Simon hijawira hiunira rotakaj‐u howashakshana, egi higuana horaghirena.
31Egi jiarnaga egi nabeja harukos‐shana egi nashingigina egi higuana rotakaj‐ura rushjana egi wawagirajirena.
32Egi hoxjarnagi, jaja wira hiregi howashara harnaj wagarni hajirena, egi shige jarnaga waxopinishishig harninankhi.
33Egi jhinagananka harnaj jhirobeja stoirena.
34Egi howasha hokirajra roha rushjahina egi waxopinishishigra roha jangra howahas‐shana, egi waxopinishignanka inke hit’et’e wagiginina, hiperesnanke esge.
35Egi haininegi, kheni hamb‐wijejni, hihinabshana egi mojainainja howarena egi eja gikaraj‐shana.
36Egi Simon egi jarnaga wakishunankhi hagregi hironagharairena.
37Egi jaja hieregi, wagairena: Harnaj hornininankshana.
38Egi wawagena: Jhinag joweregi nagre eowainekjawina, e hishge wahowakunkjena, deshesge wagiu hajina.
39Egi wohokhu‐hojhi warnineja wahokhuna Galilea mowagaxra harnaj houna, egi waxopinishishigra jangra wowahas‐shana.
40Egi lepra hisha hirajina, gitarna egi huporo‐himingshana egi wagena: Hiraregi, rushjaina‐shgunina.
41Egi Jesus najogijana, egi ara wajigre‐hianaga egi hikiorna egi wagena: Haunkjanena, ninushjankjena.
42Egi higu hit’et’e rashjangi higuana lepra rushjana, egi sgeejijena.
43Egi harojaxji rogixina, egi higuana nigeowakeregigina.
44Egi wagena: Horuxujre hinkisha hogiragnianje, eshi karare, nabhoruxaj hirukanainja kikawahaje, egi nabruxajaje ninushjane Mosesga u‐washira hiu waworagisharag washunkjanena.
45Eshi ranaga egi horagra rokana wajirena egi washa de‐e hiraijera hornaehina, rokanawege, Jesus inke jhinageja harusharani hokewe ruxurugnina, eshi mojainainja unjena. Egi higu‐hajinja herera harnaj hiraji‐hirena.
Currently Selected:
Markga 1: WIN
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1907.
