1 kurinṯus 3

asa 3

bulus gwakɩmi ḏɩkenyɩḏiḏio ḏe ganu

1na dino lɩmagəri, nyi gwate gwəṯi ŋɩma gwajuməḏɩjo gi liji lun ləṯi gwuɽɩwə no, namɩni gi liji leḏi jiŋɩno kuwei, na gi nyaɽe nyun nyitinyiti ḏi kɩrisṯo. 2nyi gwajici ŋan, ŋate ŋiro gia gun gibɩɽe no; gi gwune nya late ləṯi ŋɩma ganyaʼe no, i na nyajɩre late ləṯi ŋɩma no. 3gi gwune nya lore liro lɩwainy leḏi jiŋɩno; na ḏa ŋɩmajɩre lagalo ŋe ḏɩɽeḏa ganu kwiji, na ḏɩbereḏa, nya late lore liro lɩwainy leḏi jiŋɩno, na ŋore ŋaṯanyalarre gi liji na? 4na ḏa gwete marno, nyi gweḏi bulus gwiro, na gwete marno, nyi gweḏi abulus gwiro, nya late liro liji kuwei na? 5na dino abulus gwiro gwura? na bulus gwiro gwura? nalro jaḏam jun jəmɩnyanyaje kuwei gi gwune ḏəḏɩlo gwele gwun gwiro elo gwete gwete. 6nyi gwaṯɩkwoi, namɩni abulus gwaṯici, namɩni elo gwaṯɩbuḏi. 7na ŋiro dino gwun gwaṯɩkwoi gwate gwəṯi ŋuɽuna no, na gwun gwaṯici dino, namɩni elo gwiro kuwei gwun gwaṯɩbuḏi. 8na gwun gwaṯɩkwoi na gwun gwaṯici liro letɩdo, na luŋa gwete gwete gwaṯape ŋɩdio ŋeḏi ŋɩru ŋuŋun. 9na liŋə ilro laṯape ŋɩru eloŋale; na nyalro ḏɩri ḏeḏi elo, na ḏuṯa ḏeḏi elo.

ŋɩru ŋeḏi limualɩm

10na ŋiro gi gwune ḏiŋiriḏa ḏeḏi elo ḏun ḏiḏəḏɩnyi gi gwiji gwe ḏuṯa gwun gwəṯi ŋadɩgɩɽenya, nyi gwugelo gama na gwiro kaja gwunoṯa elo. namɩni ouwɩricil gwete gwete nuje muma galakwe gwunoṯa elo. 11gi gwune gwiji gwate gwede gwangele gama giro kaja kworo kweno gwun gwugelɩnu no, na keno yecu kɩrisṯo gwiro. 12namɩni ḏa gwiji gwədi manoṯa kama elo keno ḏab ḏe, i baḏa gwe, i nyɩdol nye nyun nyutu jilɩnya, i jɩbur je, i ṯiru ḏe, i ŋwubora ŋwe, 13ŋɩru ŋeḏi gwiji gwete gwete ŋaṯɩlɩŋini. gi gwune lamon leḏi elo laje laŋino, namɩni lar laŋino igo ye, na igo yiḏeije ŋɩru ŋeḏi gwete gwete ŋulaŋu ŋiro ŋɩra. 14na ḏa ŋɩru ŋeḏi gwete ŋa ŋimiḏəḏɩni ŋimajaḏaṯa ŋun ŋuṯulo kama elo keno, na gwape ŋɩdio ŋuŋun. 15namɩni ḏa ŋɩru ŋeḏi gwete ŋɩmanuni ŋumagereḏe ga, namɩni ŋu kwulo gwuŋun makədəḏɩni ga, namɩni gi gwune mobɩḏini kigo. 16nya late lilɩŋiḏi na nyarno nyalro dunu gweḏi elo, na gwuɽɩwə gweḏi elo gwajaḏaṯa lagalo na? 17na ḏa gwiji maki duno gweḏi elo, na gwa elo ki dino, gi gwune dunu gweḏi elo gwɩpiḏo pɽul, na nyaŋa liro dunu kweno. 18aṯanyanouwɩrico gwete gwirdeijo gwula gwuŋun ganu no. na ḏa gwete lagalo manarno gwəṯi ḏilɩŋeḏena kɩḏilio keno, ouwɩricil ŋwuro gɩɽilo kani ŋwəṯi ḏilɩŋeḏena. 19gi gwune ḏilɩŋeḏena ḏeḏi gɩḏilio keno ḏiro ŋɩɽilo gi jei ganu jeḏi elo, gi gwune ŋulinu,

ŋu lulməṯo lun ləṯi ḏilɩŋeḏena ḏirdeijo ganu ḏe ḏagin,

20na dino,

gwele gwilɩŋiḏi ḏuməḏɩno ḏeḏi liji lun ləṯi ḏilɩŋeḏena ḏiro

ga jai.

21na ŋiro dino aṯanyouwɩrico gwete gwabupaḏe ganu gi liji no, gi gwune ŋɩdi wei ŋalo ŋiro, 22na ḏa bulus maro, i abulus, i sapa, i gɩḏilio, i ḏɩmiḏa, i ḏaiya, i ŋɩdi ŋun ŋijo, i ŋun ŋila, ŋɩdi wei ŋalo ŋiro, 23na nyaŋa leḏi kɩrisṯo liro, namɩni kɩrisṯo gweḏi elo gwiro.

Currently Selected:

1 kurinṯus 3: OTR1966

Highlight

Copy

Compare