1 kurinṯus 2

asa 2

ḏilɩŋeḏa jei je na ḏilɩŋeḏena ḏi elo

1namɩni nyi, lɩmagəri, gwune wiḏi lagalo, nyi wiḏi nyi gwajuməḏɩjo ŋuɽuna ŋiŋir ŋeḏi elo nyi gwate gwuməḏi ŋuɽuna ŋe ḏolenelo i ŋe ḏilɩŋeḏena no. 2gi gwune nyi məṯəḏi ŋuɽuna gi ḏugwor ganu ḏinyi nyi gwate gwilɩŋiḏi ŋuɽuna ŋete lagalo no, namɩni yecu kɩrisṯo kuwei na ŋu gwuɽinyinu gi luɽi lun lɩmalɩḏo ganu. 3na ilijo gi ḏɩmumɩḏa na ŋɩḏe na gi ḏubəga gworki. 4na ŋuɽun ŋinyi na ḏuməḏɩjo liji ḏinyi ŋuɽun ŋun ŋiŋir ŋeḏi yecu kɩrisṯo ḏate ḏiro ŋuɽun ŋe ŋe ḏilɩŋeḏena ḏeḏi gwiji ŋun ŋaṯɩgwuloḏa no, nalmɩni aŋini gwuɽɩwə gwe gwun gwɩpiḏo pɽul na ŋɩma, 5kani a ḏɩməṯo ḏalo ḏo ḏəḏuḏɩni ḏilɩŋeḏena ḏe ḏeḏi liji, ŋumɩnje ŋɩma ŋe ŋeḏi elo.

6namɩni anaṯumə ḏilɩŋeḏena ḏe gi liji lun luɽun ḏɩməṯo ḏe, namɩni ḏəḏu ḏeḏi gɩḏilio keno no, i ḏeḏi lele leḏi gɩḏilio keno lun lete no. 7namɩni anaṯumə ḏilɩŋeḏena ḏe ḏeḏi elo ḏun ḏilɩbiḏɩnu, i ḏun ḏilɩbiḏɩnu, ḏun ḏarḏe elo no ḏigelu gwerre ganu gwate magele gɩḏilio no gi ḏoɽeḏa ḏage, 8na ŋuɽun ŋeno ŋate ŋan gwete gweḏi lele leḏi gɩḏilio keno lɩŋe no; na ḏa ŋilɩŋiḏɩlo late laŋaɽinye gwelɩnya gwe ḏoɽeḏa gi luɽi lun lɩmalɩḏo ganu no. 9namɩni ŋiro gi gwune ŋulinu,

na ŋɩdi ŋun ŋate ŋɩmal jei aŋu, i ŋɩmal nəni diŋɩni no,

i ŋun ŋate ŋɩmanəḏi gi ḏugwor ganu ḏeḏi gwiji no,

ŋeno ŋɩmal elo kəḏəḏəṯɩjo luŋaije ga lun ləmɩnyu.

10na ŋɩmijil elo aŋijo gwuɽɩwə gwe gwuŋun, gi gwune gwuɽɩwə gwaṯɩbunyi ŋɩdio wutiwuti, i ŋɩdi ŋun ŋate ŋəṯi ŋɩma ŋal liji lɩŋe ŋeḏi elo no. 11gi gwune əḏi gwiro gi liji gwilɩŋiḏi ŋuɽuna ŋeḏi gwiji namɩni gwuɽɩwə gweḏi gwiji gwiro gwun gwaṯɩje lugwun? na ŋiro dino gwatɩn gwetɩdo gwilɩŋiḏi ŋɩdio ŋeḏi elo no, namɩni gwuɽɩwə gwun gwɩpiḏo pɽul gweḏi elo kuwei. 12namɩni ilate ilmaməṯo gwuɽɩwə gweḏi gɩḏilio no, namɩni ilmaməto gwuɽɩwə gweḏi elo, kani ilɩŋe ŋɩdio ŋun ŋiḏəḏijɩlo elo ga dino. 13na ŋɩdi ŋeno ŋaṯɩlŋumə dino, ŋədu ŋeḏi ŋuɽun ŋun ŋaṯɩjalɩmi ḏilɩŋeḏena ḏe ḏeḏi gwiji no, numɩni ro ŋuɽun ŋun ŋalɩmilɩlo gwuɽɩwə gwun gwɩpiḏo pɽul, liliwɩrlijo ŋɩdio ŋeḏi gwuɽɩwə lun ləṯi gwuɽɩwə. 14namɩni gwiji gwun gwate gwilɩŋinu gwuɽɩwə gwe no, gwate gwaṯəmɩnyi ŋɩdio ŋeḏi gwuɽɩwə gweḏi elo no, gi gwune nalro ŋɩɽilo lugwun, na gwate gwəṯi ŋɩma ŋwullɩŋe no, gi gwune ŋilɩŋinu gwuɽɩwə gwe. 15namɩni gwiji gwun gwəṯi gwuɽɩwə gwun gwɩpiḏo pɽul ŋwiḏeije ŋɩdio wei, namɩni ŋu kwulo gwuŋun gwate man gwiji iḏeije gwetɩdo no. 16namɩni əḏi gwiro gwilɩŋiḏi ŋadɩgɩɽenya ŋeḏi gwele gwun gwiro elo kani ŋwunalɩmi? namɩni lɩŋə iləṯi ŋədɩgɩɽenya ŋeḏi kɩrisṯo.

Currently Selected:

1 kurinṯus 2: OTR1966

Highlight

Copy

Compare