Filibi 3

Tssup ka̱ryong

1Ba̱wumbeyang nzuk, a̱ngbom kyang u n ni ya tyyei ni nkpa yet: yi gwai ka̱yat A̱gwam njit Yesu. Ko n ya jem kyang a n ka̱n ya jem mi ni, n ni rwan ba; ku ni ya brang, kyang i ya tyyi ba. 2Yi cam a̱ka̱tuk na̱bvwu nu, ba̱nyet na̱kpot iya, ba̱nyet ba a̱ cat hwak ndwam ba̱nyet a ni. 3Njit a̱mi ba za tyyi ncen ka̱ryong, mba a̱mi ba. Njit a̱mi tssup Ka̱za i ryen nTswa nka na, i bu pfong ansham mon diccu bu Yesu Kristi. Zi tyyi ndya njit a nkyang rwam a ni ba. 4Nzuk n maai n tyyi rya i taka̱i nkyang iya. Ka̱ a̱yin a̱n shyi a̱ hwa da̱ a̱ maai hyong nkyang rwam a ni, n byyi nkyang hyong a n da̱u koyan. 5Ba yin n byin, ka̱tuk nom a̱naimbvak ba n tyyi ncen. N yet a̱ntyok Isreila, an sot Banyami, a̱zizrak mbyin Ibraniyawa. I tssup Truwang ba̱nyet Yahuda ji n yin shyi ka̱yat ba̱nyet Farisa; 6da̱ni di ntyyi ka̱ssi ni n wwat ba̱nyet tssup ba ka̱bvung; di ditsatsak ti ni n tssup Truwang ba̱nyet Yahuda ji sa̱rei, a a̱ssi ba̱nyet n byyi hywak ba. 7Ma nkyang a n yin cyang na yet ka̱ssok ni n na̱ sook naani na yet dikpak n ga n shya Kristi. 8A̱kpak a̱ssi, sa̱rei nkyang a n byyi ni n na̱ ryi na yet dikpak, sabo bu kyang a byyi kpungtun ba̱gingang ni, wato bvwo Yesu Kristi A̱gwam nzuk. Rot nu a̱mi n ni shim n wwon kozan kyang; kozan kyang a a̱ssi nzuk yet dibvwo, n ga n shya Kristi 9n ga n yet kyang yring ba̱ nu. N bo ni byyi ditsatsak tinying diccu nzuk ba, tintini ba yin shai ta ka̱rek tssup Truwang ji ni. Naanini n byyi ditsatsak ti ba n dyi rot n wrak Kristi rya nzuk a. Ka̱za a̱mi a̱ n dyi ditsatsak ti rot wrak rya nzuk a. 10Kyang bu yring n cat, nkpa yet n bvwo Kristi, n bo n bvwo cet ta̱za nu na i dikwu ti. N bo n cat n sswa taka̱i ka̱bvung a na̱ sswa ni, n bo n dyi da̱ nu ni i dikwu nu ti; 11nsak rya nzuk a nkpa yet n ma̱ ni ta̱za i dikwu ti n shya sucet.

N nin tyyi ka̱ssi n ga si ya ryik

12N hywa di n ka̱ n za nasara ba, da n hywa di n tyyi a̱jyem ba. Ma n ni n tyyi ka̱ssi n ga n shya zang ji ka̱sak ka Yesu Kristi na̱ ka̱n ni n shya ni. 13Ba̱wumbeyang, n ka̱ n hywa da̱ n za̱ shya ba, ma kyang yring a̱mi n yya, n na bring nkyang a shyi riryim ni n ni n tyyi ka̱ssi n cyang nkyang a shyi a̱zanson nzuk ni. 14N ni n tyyi ka̱ssi n ga si ya ryik a n shya zang ji yet yei a Ka̱za ka za yei ni rot kyang a Yesu Kristi na̱ yya ni, a̱ za ryi sucet wityak Tazwa.

15Ku myim njit ba̱nyet ba a̱ kan dai i tssup Yesu na di ka̱ryong ni zi hwa a̱mi; ma ki a nkyang zaan yin byyi a̱huhwa nyin ba̱zan, iyemi Ka̱za a̱ ni ya tat a̱ssi na yi ryi. 16Kozan a̱ yya, zi ya ka̱son i breng ka̱ryong ka zi ka̱n shya ni.

17Ba̱wumbeyang nzuk, n cat yi cong taka̱i ka̱cyet nzuk a, i bu cyang ba̱nyet ba a̱ tssup ka̱cyet nzuk ka n cong ni. 18Ba̱yanyet a̱n shyi ka̱yat nyin, swat mba na ba̱ tyyi ba yet ba̱ra̱ndwan i dikwu ka̱teyang ti Yesu na̱ kwu ni. N ka̱n tyap a̱cwrya ba̱ nyin an kyang ani, nkpa n bo ya tyyei nta̱mak bu ka̱nak ka̱pfun. 19Taka̱i ba̱nyet iya a̱ngbom mba nu a̱ yet ka̱ryi ndong; rot ka̱za mba ka nka a̱ yet nkyang a byyi ndwam mba sham ni. Nkyang a yet nying nsum ni, nna a̱mi ban ya gba; a̱huhwa mba nu a̱ yet ba̱ a̱nying ka̱sa a̱ni. 20Ma njit zi yet ba̱nyet nTazwa. A̱ssi njit a a̱ shyi i cam brek A̱gwam njit Yesu Kristi, a̱ntyok za san, nyyai Tazwa. 21Nu cet nu na ku ni ku tyyi na̱ maai brak kozan kyang ku shyi an bvak dityok nu na, nkpa na̱ nin brak a̱gugwak ndwam njit u na tyyi di rwam da̱ra̱ja nu na ni.

Currently Selected:

Filibi 3: kaj

Highlight

Copy

Compare