Afisa 3
3
Pfong Bulut bu nwap nzaan
1Nkpa n byyi nzuk Bulut, a̱tuba nu ba hwam a̱zi hywak nyin na nwap a ni, rot n yya wa'azi Kristi -- 2N bvwo yi ka̱n hok ka̱sak ka Ka̱za ka ni n dyi pfong ani n yya zihywak nyin ni. 3Kyang a Ka̱za ka yya a̱ sak i ka̱nrang ni a̱mi ka yrang a̱ n tyyei. (N ka̱n jem n ya tyyei ba̱ryat ni ba̱cincong. 4Ki yi twang kyang a n ya jem mi ni, yin bvwo ka̱sak ka n nin bvwo nkyang Yesu na shyi i ka̱nrang ni). 5Nnyyai ka ba yin nyyak ba̱nyet nkyang ani, ma ba̱nyying Ka̱za ka̱yat Tswa nka ka a̱ yrang a̱ tyyei ba̱zizrak ba̱pfong Yesu ba bu ba̱nyet tyyei ba̱ryat Ka̱za ba. 6Kyang a shyi ka̱nrang i nkpa yet: ka̱yat tyyei Ka̱sham Ba̱ryat ka̱sak ka kpikpit nwap a a̱ byyi ka̱sak mba a ka̱nu-a̱tan ka ba̱nyet Yahuda na ba shya di Ka̱za ni. Sa̱rei njit zi yet rwam yring, bun byyi bvak an kyang a Ka̱za ka yin dyat a̱wwon ka̱yat Yesu ni.
7Ka̱za a̱ yin tyyi n yya dikwwa tyyei Ka̱sham Ba̱ryat kani, di za̱nang nka ji ka n dyi bu cet nka ni. 8Sa̱rei i ba̱nyet Ka̱za ba nzuk a̱mi n yet ka̱baan ka; ma Ka̱za a̱n shim mi n yet a̱pfong nka i tyyei Ka̱sham Ba̱ryat nka ka di kpikpit nwap ka̱sa na, n ba̱ tyyei ka̱sak ka Kristi na̱n byyi zwa a̱ za wwat a̱ ra̱u koyan ni, 9n bo n ba̱ tyyei ba̱zizrak pfong a ka̱za ka n dyi ni an kyang a ka nyat i nyyai ka̱ram ka ka nyya ka̱sa ka ni. 10Ka yya a̱mi ba̱nyet tssup ba a̱ ga yet ryen na ba̱pfong Ka̱za bu kozan cet Tazwa ku nin bvwo ntaka̱i a̱za̱ncyi Ka̱za na i ka̱sak ka kan wrak ba̱nyet sucet i. 11Ka̱za a̱ yya a̱mi ba̱cicrak bu kyang a ka rop a̱ sak nyyai ba ka̱n yya ka̱sa kani ba; ka yya a̱mi ta ka̱rek A̱gwam njit Yesu Kristi. 12Zi maai i nwa a̱ta̱ssi Ka̱za ban bu ka̱wun, rot zi ku ryi ndya njit a bu mon diccu ba̱ nu. 13Rot a̱mi n ya naai yi ryok wwon ka̱bvung ka n sswa a̱zi hywak nyin ni a̱ ya kwu nkap ba. Ku myim yi wu shya shii.
Cat Kristi na
14Nkpa n byyi n nin ta̱gbok a̱kwut nzuk a̱ta̱ssi A̱tyyi ka. 15Nu a̱mi kozan byin i ka̱sa ka bu Tazwa ba shya diyrek da̱ nu. 16N naai Ka̱za ka̱yat a̱gba̱dang shya dityok nka ti ka ya ryi cet ka̱yat Tswa nka ka yi maai i sseng di cet ka̱yat ndya nyin ka. 17N naai brak Kristi a̱ brak ndya nyin na a̱n yya ka̱ryi nu, rot yi ku ryi ndya nyin na. N yya a̱duwa yi tyyi ndya nyin na i cat ba̱yaan. 18Rot a̱mi nyin bu sa̱rei kpikpit ba̱nyet tssup Ka̱za na i bvwo ka̱sak ka dipa̱rra̱rre bu swap, bu bvwo shii ka̱za bu ka̱yat cat ka Kristi na̱n za cat i, 19nyin yi gi ma̱n shya bvwo cat nka na, ko da̱ a̱yin na̱ nin maai a̱ kpo bvwo sa̱rei ni ba, a̱mi zi tyyi hywat sisaai ryi Ka̱za ji.
20Zi dyep nu a̱tuba a̱ywu a̱ maai a̱ yya pfong ka̱yat njit a̱ ra̱u kyang a zi hwa ni bu kyang a ma zi maai naai ni ba. 21Zi dyep Ka̱za njit ba̱nyet tssup ka̱yat Kristi, kozan ka̱ram har a̱ba̱da abadin, amin.
Currently Selected:
Afisa 3: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
