Bilangan Uram 30
30
Er Iya Erebdobnyi biti dib uram aryi, “Nai, Kanti ato kuboka karebkwankin,” ebmai uram deyok
30:1-16
1Musa biryi Israel nang yala yuk-yuk sien nang asi ato ebmou, “Er Iya Erebdobnyi biryi ato ebmasir, 2‘Sal tentok aryi Er Iya Erebdobnyi bisi uram talak eandur. Ara, ato, “Ato kuboka karebkwankin,” eandur kum, “Ato dinyi ukubkwan,” eandur kum ura, er dam nang a uram aryi tabwe koubdanandur. Ati, a uram talak eanci dinyi ara luba kimna mem! Eda, er uram talak eanci to kuboka kunubkwandur. 3Bok, ner er kam kuranci talak aryi er nai ai dam tuba kurandiryi uram talak, Er Iya Erebdobnyi biti, “Nira Kanti ato kuboka karebkwankin,” eboka uram talak ebdananci ura, er dam nang a uram aryi tabwe koubdanandur. 4Ba, a ebdananci dinyi er nai kekeanci bok, er nebnyi dam asi uram ton erdena kum kuranci ura, a ner uram talak eanci dinyi ara talebnurubkwandur. 5Bok, er nebnyi enmaci uram asi kekebci ura, er nai biryi, “Kanda a dinyi kununa mem!” eboka uram eanci ura, a ner uram talak eanci dinyi aryi talernuruna kum kubkwandur. Ani, a ner asi Er Iya Erebdobnyi biryi er ebmaci uram talak ati kilibkwande. Ara, er nai biryi, “Mem,” eanci deyok aryi ato kubkwande.
6Bok, a ner sal dona kum doandiryi, “Er Iya Erebdobnyi biti ato kuboka karebkwan,” eanci ura, a ner sal doanci ababyi er eanci uram aryi tabwe koubdanandur. 7A tabwe koubdananci talak aryi ninyi dobci ura, a uram talak eanci dinyi ara iya koubkwande. Bok, er dobmarinyi biryi a ner uram talak eanci dinyi bikdiryi, “Mem,” kum ebci ura, er uram talak eanci dinyi aryi tabwe koubkwande. 8Bok, a dobmarinyi biryi a ner uram talak eanci dinyi bikdiryi, “Mem,” ebci ura, a uram talak eanci dinyi aryi kouna kum kubkwande. Ara, Er Iya Erebdobnyi biryi er eanci dinyi kilibkwande.
9Ba, youak kuranci ner kum, ninyi doande bok sal aryi deibloanci ner kum aryi, “Er Iya Erebdobnyi biti ato kuboka karebkwan,” eboka uram talak eanci dinyi ara iya koubkwande. A uram talak eanci dinyi ara kunubkwandur.
10Ba, sal doanci ner aryi, “Er Iya Erebdobnyi biti ato kuboka karebkwan,” eboka uram talak eanci ura, a eanci uram aryi tabwe koubkwande. 11Bok, er doandinyi a uram kekebdiryi, “Mem,” kum ebci ura, a ner aryi Er Imtamnyi biti, “Ato kuboka karebkwankin” eanci uram talak aryi tabwe koubkwande. 12Bok, er ner uram talak eanci dinyi bikdiryi er ner asi, “Ukuna mem!” ebci ura, a eanci uram talak ara lobdeibkwande. Ato kuboka er akenyi biryi, “Mem,” ebmaci deyok aryi Er Iya Erebdobnyi biryi a ner malyi kun dinyi kilibkwande. 13Bok, ner aryi uram talak eanci dinyi er akenyi biryi kubkwamaci ura, a ner ara kwaning si tebdiryi, luknubdongoboka bukwandur. Ba, er doandinyi biryi, “Ur kubdum,” en dinyi babyi, “Mem,” en dinyi babyi ara sal aryi ebkwandur. 14Bok a eanci uram er akenyi bikdiryi kanya ikin kuna kum kubci ura, er ner uram talak eanci dinyi ur kunubkwandur. Ara, sal kanyi malyi kum kubdiryi kanya teleb wekci ura, “Er Iya Erebdobnyi urasintam luknubdongoboka si tebkwan,” eboka uram talak eanci to kunubkwandur. 15Bok, yuk uki tum aryi er akenyi biryi, “Mem,” ebci ura, er ner uram talak eanci dinyi ara er akenyi ikin takubdobkwande,’ ebmasir,” ebmou.
16A yan memen uram ara Er Iya Erebdobnyi biryi Musa bisi ebdeibwe. Ara, “Er Iya Erebdobnyi dam kubkwan,” ena dinyi ati ebdeibwe. A yan memen uram ara ner ab sal ab babyi, er nai ab er nebnyi ab babyi ati, “Er Iya Erebdobnyi dam kubkwan,” ena deyok ati yan memebdeibsou.
Currently Selected:
Bilangan Uram 30: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
