Bilangan Uram 29
29
1Er Iya Erebdobnyi biryi Musa bisi ato ebmou. “Israel nang asi ato ebdum. ‘Ura, tabaryi wala dobmariryi, a wala tanggal satu ara Er Iya Erebdobnyi biti li doboka ati sun Israel nang neika buluboka wekandarur. Ba, a uki tum ara wa ina kum uca, eda te louboka bukwandarur. Ani, a uki tum ara buu ena keica si trompet aryi buu eboka lilim weikanun ebkwandarur. 2Ba, a tum aryi Er Iya Erebdobnyi kanya teleb kibdeibkwamunyi ura, Erti ato kuboka dama deiboka uk dabkwandarur. Ara, bisam sapi yim bitinyi ab, yim bisam domba tentok ab, bol tumangna kumci kwalina tentok kunmaci yim bisam domba tabaryi ab dama deiboka nong nirya uk dabkwandarur. 3Ba, kouryina ati dama deibkwamamunyi ura, tepung teleb asi zaitun du yung likdongobdeibkwandarur. Ba, a tepung teleb ara ikin 3 kilogram baryi ara yim bisam sapi yuk-yuk dam makdongobkwandarur. Ani, tepung ikin 2 kilogram yim bisam domba dabmamunyi dam makdongobkwandarur. 4Ba, tepung ikin 1 kilogram baryi ara yim bisam domba mi tabaryi yuk-yuk deibmamunyi dam makdongobkwandarur. 5Tonda, bisam kambing yim nerlonmaci bisam ara sun malyi kuramunyi dinyi kilina ati dama deibkwandarur. 6A uk dabkwamamunyi dinyi ara bisam ab, kouryina ab dama deibmamunyi dinyi ara belekuna ab, sintam ab iya dama deiboka uk dankwandum dinyi ab, kouryina dinyi ab, anggur du yung dama dinyi ab dam asi uk dabkwandarur. Ba, a dama deiboka uk dabmamunyi dinyi siltong Er Iya Erebdobnyi u yubci ura, kanya teleb kibkwande.
7Ba, tabaryi wala dobdiryi uki takubaryi tum ara sun Israel nang nirya buluboka Er Iya Erebdobnyi sun molonindarurnyi urasin dam yandoka si weik ebkwanindarur. Ba, a uki tum ara sun kanya luknubdongoboka yina si teboka wa ababyi ina mem, eda te louboka bukwandarur. 8A uki tum ara sunci Er Iya Erebdobnyi biti bisam nong nirya uk dabkwandarur. Ba, a uk dabmamunyi siltong ara Er Imtamnyi u yubci ura, kanyi teleb kibkwande. A dama deiboka uk dabkwamamunyi bisam ara nerlonmaci bisam sapi yim ab, nerlonmaci bisam domba yim ab, bol tumangna kumci kwalina tentok kunmaci yim bisam domba tabaryi ab dama deiboka nong nirya uk dabkwandarur. 9Ba, kouryina ati dama deibkwamamunyi ura, tepung teleb asi zaitun du yung likdongobdeibkwandarur. Ba, a tepung teleb ara ikin 3 kilogram baryi ara yim bisam sapi yuk-yuk dam makdongobkwandarur. Ani, tepung ikin 2 kilogram yim bisam domba dabmamunyi dam makdongobkwandarur. 10Ba, tepung ikin 1 kilogram baryi ara yim bisam domba mi tabaryi yuk-yuk deibmamunyi dam makdongobkwandarur. 11Tonda, bisam kambing yim bisam ara sun malyi kuramunyi dinyi kilina ab, Er Imtamnyi ab antanina ab ati dama deibkwandarur. Ara, sun malyi kun dinyi kilin dinyi akwe kum eda, iya belekuna ab, sintam ab bisam domba oboka uk dabmurubde binkwandum dinyi babyi, kouryina dama deirin dinyi babyi, anggur me dama deirin dinyi babyi dama deiboka uk dabkwandarur.
12Tabaryi wala tanggal 15 tum berekci ura, sun nirya neika buluboka Er Iya Erebdobnyi bisi si weik ebkwandarur. A uki tum ara sun wa ina mem eda te louboka bukwandarur. Uki tabaryi nirya ara Ni Iya Erebdobnyi biti li doboka si weik eboka molobkwanindarur. 13Yuma uki tum ara Er Iya Erebdobnyi biti nerlonmaci bisam sapi yim 13 baryi ab, bisam domba yim bitinyi ab, kwalina tentok kunmaci bisam domba 14 baryi ab, uk dabkwandarur. Ara, bol tumangdena kum kuanci bisam akwe dama deiboka uk dabkwandarur. Ba, a uk dabmamunyi siltong Imtamnyi u yubci ura kanya teleb kibkwande. 14Ba, kouryina uk dabkwamunyi ara minyak zaitun lubmangnyi tepung teleb doboka, ikin 3 kilogram baryi bisam sapi yim 13 baryi dam makdongobkwandarur. Ani, tepung ikin 2 kilogram baryi doboka bisam domba bitinyi yuk-yuk dam makdongobkwandarur. 15Ba, tepung ikin 1 kilogram baryi doboka bisam domba 14 baryi yuk-yuk dam makdongobkwandarur. 16Tonda, bisam kambing yim ara sun malyi kun dinyi kilin dinyi ati dama deibkwandarur. Ani, belekuna ab, sintam ab iya dama deibde bankwandum dinyi ara kouryina yuma kibmamunyi yina ab, anggur du me ab dam asi deinkwandum.
17Ba, uki bitinyi tum berekci ura, bisam sapi yim 12 baryi ab, bisam domba bitinyi ab, mi bisam domba kwalina tentok kubmangnyi bisam 14 baryi bol tumangna kum bisam yabwe akwe dama deibkwandarur. 18Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 19Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
20Ba, uki winiryi tum ara yim bisam sapi 11 baryi ab, yim bisam domba bitinyi ab, bisam domba ukuryok neboka kwalina tentok kubmariryi, bol tumangna kum bisam 14 baryi ab dama deibkwandarur. 21Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 22Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
23Ura, uki dumbaryi berekci tum ara yim bisam sapi 10, bisam domba bitinyi ab, bisam domba mi ukuryok kwalina tentok kubmariryi, bol tumangna kum bisam 14 baryi ab dama deibkwandarur. 24Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 25Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
26Uki amubaryi tum berekci ura, yim bisam sapi 9 baryi ab, yim bisam domba bitinyi ab, bisam domba mi kwalina tentok kubmariryi, bol tumangna kum bisam 14 baryi ab, dama deibkwandarur. 27Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 28Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
29Uki nabaryi tum berekci ura, yim bisam sapi 8 baryi ab, yim bisam domba bitinyi ab, mi bisam domba kwalina tentok kubmangnyi bisam 14 baryi bol tumangna kum bisam yabwe akwe dama deibkwandarur. 30Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 31Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
32Uki tabaryi tum berekci ura, yim bisam sapi 7 baryi ab, yim bisam domba bitinyi ab, mi bisam domba kwalina tentok kubmangnyi bisam 14 baryi bol tumangna kum bisam yabwe akwe dama deibkwandarur. 33Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 34Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
35Ba, uki inbaryi tum berekci ura, sun Israel nang nirya neik dam buluboka Ni Iya Erebdobnyi sun Israel nang molonindarurnyi bisi si weik ebkwanindarur. Ba, a uki tum ati wa ina mem! Eda, te louboka bukwandarur. 36Ura, a uki tum ara sunci bisam uk dan dinyi asi Er Iya Erebdobnyi siltong yun dinyi ati uk daboka dama deibkwandarur. A dama deibkwamamunyi bisam ara yim bisam sapi tentok ab, yim bisam domba tentok ab, bol tumangna kum bisam domba mi kwalina tentok kubmaci bisam tabaryi ab dama deibkwandarur. 37Ani, bisam domba ab, bisam sapi ab, bisam domba mi yuk-yuk dam asi kouryina ab, anggur me yung ab asi, “Ato kuboka deibkwandarur,” eboka sirya yan memebdeibwe to kuboka dama deibkwandarur. 38Ani, bisam kambing yim ara malyi kun dinyi kilina ati dama deibkwandarur. Ba, belekuna ab, sintam ab iya dama deibde bankwandum dinyi ara a dama tonkwa kouryina ab, anggur du me dama dinyi ab dam asi deinkwandum.
39A yan memen dinyi ara Er Iya Erebdobnyi biti weik uki tum dama deiboka uk dan dinyi yan memen uram deyok. Ani, bisam oboka dama deiboka nong nirya dama deiboka uk dan dinyi ab, kouryin tepung dama deirin dinyi ab, anggur me deirin dinyi ab ati ebdeibmou. Ani, Israel nang aryi Er Imtamnyi urasin dam malyi kubman dinyi ati lemdon dinyi ab, Er Imtamnyi biti, “Ato kuboka karebkwankin,” dama deirin dinyi ab, ani talyi Imtamnyi biti karen dinyi ab ara nirya yan memebdeibsou,’ ebdum,” ebmou.
40Ura, Musa biryi Er Iya Erebdobnyi ebdeibmou to kuboka Israel nang dam ebkarebmou.
Currently Selected:
Bilangan Uram 29: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
