Bilangan Uram 27
27
Zelafehad nermabwe aryi sun nai taleamwe tukwe ati, “Nunbabyi karebsurum,” ebmai deyok
27:1-11
1Manasye biryi er mi Makhir deiamwe. Ba, Makhir biryi er mi Gilead deiamwe. Ba, Gilead biryi er mi Hefer deiamwe. Ba, Hefer biryi Zelafehad deiamwe. Ba, Zelafehad bira nermabwe amubaryi deiamwe. A nermabwe sun si ara Mahla, Noa, Hogla, Milka, tonda Tirza. A nermabwe ara Yusuf mi Manasye yala nerabwe kuramnyi. 2Zelafehad nermabwe amubaryi nirya aryi anabdakoka, Musa dam ab, imam Eleazar dam ab, sun Israel weik nang kibdob nang dam ab asi binmai. Sunci Er Iya Erebdobnyi ai Kemah Suci ai bisik bublan dam bulubmai dam asi bindoka ato ebmai. 3“Nun nai yini mutuk dibwe. Ara, nun nai bira Korah yala ninyi malyi kuramnyi dinyi kum miliramwe. Tonda, erci sun ab tonkwa Er Iya Erebdobnyi bisi malyi kiboka ton kum lebesengnamwe. Er dibwe ara erbiramnyi malyi kun dinyi aryi dibwe. Ani, nun nai bira sal mabwe ton kum deiamwe. 4Erda sal mabwe ton kum deiamwe deyok aryi er tukwe asi yuk nang asi karebkwandum. Unatoa ati ato kuboka nun nai si Israel yala ninyi kankan aryi kilibkwamarim do? Bok, er tukwe nunbabyi karebsurum. Ara, nun nai du weit yabwe kuboka nunbabyi tukwe karebsurum,” eboka Musa bisi molobmai. 5Ura, Musa biryi sun molobmai dinyi Er Iya Erebdobnyi bisi molobmou.
6Ba, Er Iya Erebdobnyi biryi Musa bisi uram ato ebkarebmou. 7“Zelafehad nermabwe aryi ebmang uram ara dib ati ebmang. Ati, kanci sunsi kisal dakoka karebdum. Ara, sun nai yala nang kankan dam ab, sun dam ab karebdum. Ba, Zelafehad taleamwe tukwe ara er nermabwe ati karebdum. 8Ani, Musa, kanci sun Israel ninyi asi ato ebdum, ‘Ninyi sal dibmarinyi, erci sal ton kum deiandiryi, ner akwe deianci ura, er nai taleanci tukwe ara er nebnyi talebkwandur. 9Ba, dibmarinyi er nebnyi ton kum deianci ura, er weit yabwe sal nang ati karebkwandur. 10Tonda, er weit yabwe sal nang ton kum ura, sunci er sal yala nang asi karebkwandarur. 11Ani, anyi er sal yala nang ton kumci er dem kuranci ani, dibci ura, er kwit yabwe tonkwa kurandingnyi bisi karebkwandarur,’ ba, sun tukwe kibkwanung,” ebmou. A uram ebmou to ara sun Israel ninyi aryi ukubde binkwamnyi to ati, Er Iya Erebdobnyi biryi Musa dam ebdeibmou ura, Musa biryi sun Israel ninyi dam ebkarebmou.
Musa sienyi kiamwe dinyi ara Yosua unubmou deyok
27:12-23
12Er Iya Erebdobnyi biryi Musa bisi ato ebmou, “Mutuk konkon si Abarim kon welebirum. A welebiminyi ura, Niryi sun Israel ninyi ati karebkwan mutuk asi dibderum. 13Sirya dibdeminyi ura, kan du Harun dibwe to kuboka kanbabyi dibkwamarim. 14Ara, Meriba me u yini mutuk Zin dam aryi sun Israel ninyi aryi, ‘Ukutotoa kum mutuk asi boyibasurum,’ ebmai. Ba, sun bitinyi aryi Ni mikib ibarya lak kimna kum uca Ni uram dakbisibnururumwe. Ara, sun bitinyi aryi uram ena kum uca, keil asi kama kulabdururumwe ba, me anabdeibdururumwe,” ebmou.
15Ura, Musa biryi Er Iya Erebdobnyi bisi ato ebmou. 16“Ura, Nun Nai, Iya Erebdobnyi, Kan kanya aryi isin nebneb erande dinyi nirya kam kurdeirirur. Ati, ni luknubdongoboka molobkun dinyi ara, ‘Kanci sun Israel ninyi boboka menekwandanyi bisi, “Anyi,” eboka lak kibdeibdum. 17Ba, sun sienyi kiboka talebdiryi kalikoka bobinanci ani, Kanaan mutuk wengbinkwaming. Ara, Kan Iya Erebdobnyi dib tenekin nang asi domba bisam aryi sun kalingnanyi ton kum ato kibingnyei,’ ati nai molobkin,” eboka Musa biryi Er Iya Erebdobnyi bisi ebmou.
18Sirya ebmou ura, Er Iya Erebdobnyi biryi Musa bisi ato ebmou. “Teleb. Ura, ninyi si Nun mi Yosua bisi nabdum. Erda Imtamnyi kanya er dam kurur ba, etekdob bingna bingdur. Ati, kan taruk Yosua kisok dub deibdongobdum. 19Yosua bisi, ‘Imam Eleazar dam ab, sun Israel ninyi nirya urasin dam ab aryi tikokdum,’ eboka arukdum. Ba, sirya tikokci ura, Musa kanci sun kankan dam aryi uram iboka, ‘Yosua bira ni dobse wa unubmanir,’ ebdum. 20Ebminyi ura, kan mikib ersi ton karebkwandum. Ba, sun Israel ninyi aryi erci ebmaci uram asi dib tenebingiryi, kunubkwaming. 21Yosua biryi imam Eleazar bisi, ‘Una kubkwan do?’ eboka molobkwandur. Ba, Eleazar biryi Ni Iya Erebdobnyi bisi molobkwanurur ara erci yandoka yin yamin deirin dinyi si Urim ab, Tumim ab doubtaleboka Ni Iya Erebdobnyi bisi asibdenkwanurur. Ani, Eleazar biryi Ni Er Iya Erebdobnyi uram deici aryi Yosua ab, Israel ninyi nirya ab asi sun kubkwaming dinyi ab, anabdobkwaming dinyi ab, wengyankwaming dinyi ab nirya lak eterebkwandur,” ebmou. 22Ura, Musa biryi Er Iya Erebdobnyi ebmou to kubokaburyi, Yosua nabmouci, “Imam Eleazar dam ab, sun Israel ninyi urasin dam ab tikdum,” ebmou. 23Ura, Yosua sirya tingbinmou ba, Musa biryi Yosua bisi taruk kisok dam deibdongobmouci, kisal dakmou. Ara, Er Iya Erebdobnyi biryi Musa bisi, “Yosua bira kan dobumwe wa unubkwande ati ersi karebdum,” ebmou to kubokaburyi, kunubmou.
Currently Selected:
Bilangan Uram 27: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
