Bilangan Uram 24
24
1Bileam biryi diramwe uca, “Sun Israel ninyi asi Er Iya Erebdobnyi kanya teleb kubmarci, sunsi kisal dakmar,” tenebmou. Ba, Bileam erci sun Israel ninyi ati, “Mirei minob kuranse to kubkwan,” tenen kum dirbinmou. Eda, er urasin ara yini mutuk tam asi deibmou. 2Ura, Bileam biryi Israel ninyi aryi, yala yuk-yuk kuramnyi to kuboka keis ol ai dobnin yibinmai asi asing eibmou. Ura, Er Imtamnyi kanya Bileam koukwe dam wengyanmou. 3Ura, Bileam biryi Er Iya Erebdobnyi biryi ebdeibmou to asi ato ebmou.
“Beor mi Bileam biryi uram ebmou.
Er Imtamnyi biryi ni asing erekeianici ura, uram eran.
4Er Imtamnyi biryi ebdeianici uram asi kekeran.
Er Iya Mikibnyi biryi kunubdeibmanici dinyi asi eiriran.
Diblalakmanyi noutam aryok, eiriran.
5Yakub yala ninyi keis ol ai dobdanmang ara iya telebto.
Israel ninyi sun kundarur mutuk iya telebto.
6Ilila mutuk lu aryi kurlorongnande ato.
Me dam tikanci co aryi telebto kurande ato.
Er Iya Erebdobnyi biryi co gaharu kouande ba, kurande ato.
Co mek, me kwan dam tingnande ato.
7Sunda mo cebmariryi, me ilinto tuba-tuba yibarande to kuboka doronung.
Ninyi yina kouamingyi ara me ilinto yirande.
Sun Israel ninyi weik sienyi kibkwande ara weik sienyi Agag outam kibkweteboka eitam erebkwande.
Ba, weiknyi kiboka talebkwande talak ara nirya teleb akwe kubde binkwaming.
8Er Imtamnyi biryi Israel ninyi Mesir mutuk aryi dobkweteboka boyangarur.
Er Imtamnyi bira sunti bai bisam lembu kisok yang beleandiryi, kat kiboka mikib kurande to kurur.
Sunsi yuk atei nang aryi mar boamingnyi nang asi nirya oboka yibkabokwaming,
Ba, sun yok ara taluboka sici kibkwaming.
Ba, sunsi Israel ninyi mar boamingnyi atei nang ara Israel ninyi mar aryi lukoka obkwaming.
9Sun Israel ninyi ara kam singa yim aryi yan ab, taruk ab mungkurukoka tukwe ai marande ato kunung.
Kam singa ner ara unanyi biryi kamubdeibkwamote do?
Sun Israel nang asi kisal dankwamingnyi ura, Er Imtamnyi biryi a nang asi kisal dakmurubkwande.
Ba, sunci Israel ninyi asi suamingnyi ura, Er Imtamnyi biryi a nang asi submurubkwande.”
Ato eboka Bileam biryi Balak bisi ebmou.
Aminda kunubkwamwe dinyi ati, Bileam biryi, “Ukubkwande,” eboka nukmou uram deyok
24:10-25
10Ura, Moab sienyi Balak biryi Bileam bisi yu weik bobmouci, taruk du kitiboka uram ato ebmou, “Bileam, niryi kansi nabmakunwe ara, ‘Sun Israel ninyi asi subdeibnurum,’ tenen nabmakunwe. Bok, kanci sunsi liki winiryi kisal dakmarim. 11Ati, kan atei ur bindobdum! Niryi kansi, ‘Bona karebkwankin,’ eankise dinyi ara Er Iya Erebdobnyi biryi kansi, ‘Sun Israel ninyi asi sumna mem,’ ebmakir ati kum karebkwamakin,” ebmou. 12Ura, Bileam biryi Balak bisi uram ato ebmou, “Niryi kan bokdonokmoumwe nang asi uram ato kum ebdeibmase do? 13Nisi Balak biryi emas keil ab, perak keil ab, er kun ai dam bona deirirur dinyi nirya karebkwamanir bok, Niryi Er Iya Erebdobnyi uram dakbisibman kum, ani, ‘Ni kanya aryok ukubkwan,’ tenebman kum. Eda, ‘Er Imtamnyi biryi, “Ato kubdum,” ebnici akwe ebkwamanun,’ ebdeibmase. 14Akiryi, nira ni yala nang asi bindobkwaman ati, kan ni uram kekebnurum. Ba, niryi kansi sun Israel ninyi akiryi kan atei ninyi asi aminda ukubkwaming ebkun,” ebmou.
15Ura, Bileam biryi aminda ukubkwamwe to ati ato ebmou.
“Nira Beor mi Bileam biryi a uram ebkun. Er Imtamnyi biryi ni asing erekeianici ura, uram eran.
16Er Imtamnyi biryi ebdeianici uram asi kekerandinyi bira Er Iya Erebdobnyi ebdeibmaci uram bingnung.
Er Iya Mikibnyi biryi kunubdeibmanici dinyi asi eiriran.
Luknubdongoboka molonmanyi deici aryok eiriran. A eibmanyi to kuboka Balak kan dam eran.
17Ni sirya Israel ninyi tentok eibman cok, ukuca kuma.
Ni urasin eibman bok, dam kum.
Yakub yalanyi tentok aminda sienyi kibkwande.
Israel yala nang kankan dam aryi ninyi kalingna kama doubkwandanyi tentok yankwande.
Er yankwande ara kurya tilirande to kubkwande.
Erci Moab yala ninyi asi kisok kulaboka obkwande.
Set yaldangna nirya kum dandeibkwaming.
18Edom mutuk tukwe ara Israel ninyi aryi mar boboka arabdobingiryi, sun kun mutuk tukwe kibkwaming,
Ba, Seir mutuk tukwe ababyi, Israel ninyi kun mutuk tukwe kibkwaming.#24:18 Seir ebyi ara Edom mutuk weik mutuk kon ati Seir ebyi. Akiryi Seir mutuk ababyi Israel ninyi mutuk kibkwande ebyi.
Sun mar ordana nang mutuk tukwe nirya sun Israel ninyi dinyi kibkwande.
Sun Israel ninyi mikib aryi mar bobingiryi, sun mutuk kibkwaming.
19Yakub yalanyi sal tentok aryi iya mikib sienyi kibkwande.
Ba, er mar ordana ninyi asi nirya obkwande,” eboka Moab sienyi balak bisi ebmou.
20Ani, tubto Bileam biryi kunumna deici aryi diramwe uca, Amalek yala ninyi eibmou. Ura, Bileam biryi sun kubkwamnyi to ati ato ebmou,
“Sun Amalek yala ninyi ara tukwe dangna iya mikib kuramnyi.#24:20 A eibmou ninyi ara Israel nang Mesir mutuk aryi kuboka Kanaan wengyankwamnyi ba, bisik dam yangaramnyi karin aryi sunsi yuma kobdob mar bobdanamnyi atei nang asi asing eibmou.
Bok, sun Amalek yala ninyi nirya aminda tam kum dansekwaming.
21A kunumna deici aryi, Bileam dinmou aryok Keni yala ninyi eibmou.” Ura, Bileam biryi sun kubkwamnyi to ati ato ebmou,
“Sun Keni yala ninyi kun atei sasiboka darabdeibdau.
Maka du deirin ai atoanun keil mutuk kon dub dobdau.
22Bok, sun Keni yala ninyi kum dandeibkwansing,
Ba, uki kum aryok Asyur nang aryi aminda talebsingiryi, sunsi tabwe deboka sun atei bobinkwansing,” ebmou.
23Ton yuk kubkwamwe dinyi ati kunumna deici aryi eibmou to ati ato ebmou,
“Nai kobe! Er Imtamnyi biryi ukubmote ura,
unanyi biryi kam iya kubkwamote do?
24Ilila me kwan deici borande aia co ngun-ngun aryi Kitim mutuk aryi kuboka ninyi boboka yankwaming.
Yangnyi ura Asyur ninyi ab, Heber ninyi ab asi yandoka singibkwande.
Bok, Kitim nang babyi nirya kum dansekwaming,” ebmou.
25Sirya ebmou ura, Bileam anabdobmouci, er kuramwe ai Aram mutuk dam bindobmou. Ba, Balak bibabyi er atei Moab mutuk dam bindobmou.
Currently Selected:
Bilangan Uram 24: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
