Bilangan Uram 23
23
1Ura, Bileam biryi weik sienyi Balak bisi ato ebmou, “Kanci niti Imtamnyi biti ninyi dama deirin keil lamna tabaryi dobdum. Ba, yim bisam lembu tabaryi ab, yim bisam domba tabaryi ab niti a boyarum,” ebmou. 2Ba, Balak biryi Bileam ebmou to kuboka kunubmou. Ura, Balak biryi dama deirin keil dukoka labmou to kuboka Bileam ab, Balak ab aryi Er Imtamnyi biti lamna tentok ara bisam sapi yim tentok-tentok, bisam domba yim tentok-tentok dama deibnin yibinmarei. 3Sirya ukubmarei ura, Bileam biryi Balak bisi ato ebmou, “Ni nai Imtamnyi biti bisam oboka uk dabmarim dam a tikandum. Nira eitam dirwelebinan, Er Iya Erebdobnyi ab ebdankwamanim kum, kum ebdankwamanim kum. Ba, Er Iya Erebdobnyi biryi nisi uram ebdeibnici ura, niryi kansi nirya ebkarebkwamakin,” ebmou. Ura, Bileam er yuk anabdobmouci, buta dem kuamwe mutuk kon dub weleboka tikmou.
Bileam biryi sun Israel nang ati kisal dakmou deyok
23:4-12
4Ura, Er Imtamnyi biryi Bileam dam yanmou. Ura, Bileam biryi Ersi uram ato ebmou, “Nai Imtamnyi, Kanti dama deirin keil lamna tabaryi sirya kubdeibman. Ba, yim bisam lembu ab, yim bisam domba ab Kanti dama deiboka uk dabnin yibinman,” ebmou. 5Ba, Er Iya Erebdobnyi biryi Bileam bisi ato ebmou, “Kanci Balak dam tamuboka biminci, a uram asi ebkwandum,” ebmou. 6Ura, Bileam tamuboka binmou. Ba, Balak ab, sun ninyi talen nang ab tonkwa bisam oboka uk dabmai dam tuba tikmai. 7Ura, Bileam biryi sunsi Er Imtamnyi ebdeibmou uram asi ato ebmou,
“Aram mutuk aryi Moab atei sienyi Balak biryi nisi nabmanou.
Kiting anamyangantam mutuk kon dam aryi nisi nabmanouci, ato ebmou,
‘Yaminci, Yakub yala ninyi asi niti subdeibnurum.
Israel yala ninyi asi subdum.
8Er Imtamnyi kum wenebmote bok, Niryi una kuboka sunsi wenebkwamatinyi do?
Er Iya Erebdobnyi kum submote bok, una kuboka sunsi subkwamatinyi do?
9Mutuk kon dub aryi sunsi asing eibman,
Mutuk kon aryi sunsi dibdonokdenman.
Uca, Israel yala ninyi sun yuk yandoka kunmang.
Yuk yala ninyi ab antaniboka kuna kum kunmang.
10Yakub yala ninyi asi unanyi biryi nukwamote do?
Israel yala ninyi ilinto aryi nukman kumto kunung.
Sun Imtamnyi wiamwe nang dibmai uca, nibabyi dibokantinyi.
Ba, nira Imtamnyi wianute mi kurantinyi ani, diboktinyi,’ eboka Bileam biryi ebmou.”
11Ura, sienyi Balak biryi Bileam bisi ato ebmou, “Ukura kanci nisi una kunmanirim do? Kansi iniboka a boyakise ara, ‘Ni mar bobkwan atei nang asi subdum,’ tenen boyakise. Bok, kanci danguboka sunsi kisal dakmar,” ebmou. 12Bok, Bileam biryi ato eboka uram dekeibmou, “Niryi uram ebman ara Er Iya Erebdobnyi biryi ni si bambul dam uram deibdongobmanir to ebman,” ebmou.
Bileam biryi sun Israel nang ati liki bitinyi dinyi kisal dakmou
22:13-26
13Ura, Balak biryi Bileam bisi ato ebmou, “Teleb, kan ab, ni ab tonkwa anabdobnimiryi yuk ai binkwanim. Ba, a binimnyi ai aryi, kanci sun Israel nang dinatam akwe asing eibminyi ura, subdum,” ebmou. 14Ura, Balak biryi Bileam bobokaburyi, mutuk si Pisga kon binmarei. Ura, a mutuk kon asi Balak biryi dama deirin keil lamna tabaryi dobmou. Ba, yim bisam lembu tabaryi ab, yim bisam domba tabaryi ab asi a dobmou dungna deici deibnin yibinmou. 15Ura, Bileam biryi Balak bisi ato ebmou, “Ni nai Iya Erebdobnyi biti dama deibmarim ai a tikandum. Nira Iya Erebdobnyi ab eitam ebdankwanim,” ebmou. 16Ba, Er Iya Erebdobnyi ab, Bileam ab ebdanmarei ura, Imtamnyi biryi ersi, “Uram ato ebkwandum,” ebmou. Ura, ton ato ebmou, “Tamuboka Balak dam biminci, uram a ebdeibmanto kuboka ebkwandum,” ebmou. 17Ura, Bileam tamuboka binmou. Ba, Balak ab, sun sien nang ab ara tonkwa bisam obmaici, Imtamnyi biti dama deiboka uk dabmai dam tuba tikmai. Ba, Balak biryi Bileam bisi, “Iya Erebdobnyi uram una ebdeibmar do?” ebmou. 18Ura, Bileam biryi ersi Er Imtamnyi ebdeibmou to asi ato ebmou,
“Balak, bukokminci kekerum.
Zipor mi, kan amol takeiboka nisi kekerum.
19Er Imtamnyi bira ninyi aryi talyi ati, ‘Ukubkwankin-ukubkwankin,’ eraming atonyi kuma.
Imtamnyi bira ninyi mi kuma, ninyi mi akiryi kanyi sungnande atonyi kuma.
Er Imtamnyi biryi, ‘Ato kubkwan,’ eanci tok, kunurande.
Ba, Erci uram ena ara kunurdeirirande.
20Kan bikdum, Nisi Er Imtamnyi biryi, ‘Kisal dakdum,’ ebmanir.
Ba, Er Imtamnyi biryi kisal dakmaci bok, niryi dangubdeibman kum.
21Sun Yakub yala ninyi ara iya malyito dinyi ton kum kunung.
Sun Israel yala ninyi ara mambul ton kum donung.
Sun Nai Iya Erebdobnyi biryi sunsi kalingdur.
Sun Nai Imtamnyi ab tonkwa yibanung deyok aryi sun kanya kilkil asa aryi mot semnung.
22Er Imtamnyi biryi sunsi Mesir mutuk dam aryi dobkweteboka boyangarur.
Ba, Er Imtamnyi biryi er mabwe asi Er Imtamnyi mikib dongobdeibwe ba, sunda bai bisam lembu kisok yang beleandiryi kat kiboka mikib kurande ato kurdeirirur.
23Yakub yala ninyi asi mirei deiboka subkwaman dinyi ton kum.
Ba, kwemdeina ati molobnyi ba, mikib lak kimna dinyi ton kum eibkwaman.
Ara, ninyi aryi kanyi teneiboka Israel ninyi ati subkwamating ara ukubman kum.
Akatei ninyi ati ninyi aryi ato ebkwamating,
‘Dibdendarur, Er Imtamnyi biryi sunsi ilil tenen dinyi kubmararyi, lebdeibmar.
24Dibderum, sun Israel yala ninyi, asi Er Imtamnyi biryi mikib karebwe ba, sunda kam singa ner bukalabkaboka yangarande to kunmang.’
Kam singa yim aryi tingnande to kubmang.
Kam singa aryi yina kum yibmaci ura, mana kum kurande.
Ba, kamyoa obdiryi dibci ura, ining yirande.”
Ato eboka Er Imtamnyi biryi ebmou to kuboka, Bileam biryi Balak bisi ebmou.
25Ura, Balak biryi Bileam bisi ato ebmou, “Kanci sun Israel ninyi asi uram tentok ababyi ton kum subdenmarim. Ati, kanci sunsi uram tentok ababyi kisal dangna mem,” ebmou. 26Bok, Bileam biryi Balak bisi uram ato kuboka dekeibmou, “Ni sirya kan dam minob kum ebmonwe do? Er Iya Erebdobnyi biryi, ‘A uram ebkwandum,’ ebdeibmar to niryi ebman,” ebmou.
Bileam biryi sun Israel nang ati liki winiryi dinyi kisal dakmou
22:27–24:9
27Ura, Balak biryi Bileam bisi ato ebmou, “Yarum, niryi kansi yuk mutuk bobinkwankin. Ba, a binimnyi mutuk aryi, Er Imtamnyi biryi, ‘Ur,’ ebci ba, Er urasin dam aryi kanci sun Israel nang asi niti subdeibnurum,” ebmou. 28Ura, Balak biryi Bileam boboka mutuk kon si Peor kon, yini mutuk wiliba dam bobinmou.
29Ura, Bileam biryi Balak bisi ato ebmou, “Kanci niti dama deirin keil lamna tabaryi dobdum. Ba, yim bisam lembu tabaryi ab, yim bisam domba tabaryi ab niti a boyarum,” ebmou. 30Ura, Balak biryi Bileam ebmou to kunubmouci, yim bisam lembu tabaryi ab, yim bisam domba tabaryi ab asi Er Imtamnyi biti dama deirin keil lamna dobnin yibinmou to kuboka deibmou.
Currently Selected:
Bilangan Uram 23: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
Bilangan Uram 23
23
1Ura, Bileam biryi weik sienyi Balak bisi ato ebmou, “Kanci niti Imtamnyi biti ninyi dama deirin keil lamna tabaryi dobdum. Ba, yim bisam lembu tabaryi ab, yim bisam domba tabaryi ab niti a boyarum,” ebmou. 2Ba, Balak biryi Bileam ebmou to kuboka kunubmou. Ura, Balak biryi dama deirin keil dukoka labmou to kuboka Bileam ab, Balak ab aryi Er Imtamnyi biti lamna tentok ara bisam sapi yim tentok-tentok, bisam domba yim tentok-tentok dama deibnin yibinmarei. 3Sirya ukubmarei ura, Bileam biryi Balak bisi ato ebmou, “Ni nai Imtamnyi biti bisam oboka uk dabmarim dam a tikandum. Nira eitam dirwelebinan, Er Iya Erebdobnyi ab ebdankwamanim kum, kum ebdankwamanim kum. Ba, Er Iya Erebdobnyi biryi nisi uram ebdeibnici ura, niryi kansi nirya ebkarebkwamakin,” ebmou. Ura, Bileam er yuk anabdobmouci, buta dem kuamwe mutuk kon dub weleboka tikmou.
Bileam biryi sun Israel nang ati kisal dakmou deyok
23:4-12
4Ura, Er Imtamnyi biryi Bileam dam yanmou. Ura, Bileam biryi Ersi uram ato ebmou, “Nai Imtamnyi, Kanti dama deirin keil lamna tabaryi sirya kubdeibman. Ba, yim bisam lembu ab, yim bisam domba ab Kanti dama deiboka uk dabnin yibinman,” ebmou. 5Ba, Er Iya Erebdobnyi biryi Bileam bisi ato ebmou, “Kanci Balak dam tamuboka biminci, a uram asi ebkwandum,” ebmou. 6Ura, Bileam tamuboka binmou. Ba, Balak ab, sun ninyi talen nang ab tonkwa bisam oboka uk dabmai dam tuba tikmai. 7Ura, Bileam biryi sunsi Er Imtamnyi ebdeibmou uram asi ato ebmou,
“Aram mutuk aryi Moab atei sienyi Balak biryi nisi nabmanou.
Kiting anamyangantam mutuk kon dam aryi nisi nabmanouci, ato ebmou,
‘Yaminci, Yakub yala ninyi asi niti subdeibnurum.
Israel yala ninyi asi subdum.
8Er Imtamnyi kum wenebmote bok, Niryi una kuboka sunsi wenebkwamatinyi do?
Er Iya Erebdobnyi kum submote bok, una kuboka sunsi subkwamatinyi do?
9Mutuk kon dub aryi sunsi asing eibman,
Mutuk kon aryi sunsi dibdonokdenman.
Uca, Israel yala ninyi sun yuk yandoka kunmang.
Yuk yala ninyi ab antaniboka kuna kum kunmang.
10Yakub yala ninyi asi unanyi biryi nukwamote do?
Israel yala ninyi ilinto aryi nukman kumto kunung.
Sun Imtamnyi wiamwe nang dibmai uca, nibabyi dibokantinyi.
Ba, nira Imtamnyi wianute mi kurantinyi ani, diboktinyi,’ eboka Bileam biryi ebmou.”
11Ura, sienyi Balak biryi Bileam bisi ato ebmou, “Ukura kanci nisi una kunmanirim do? Kansi iniboka a boyakise ara, ‘Ni mar bobkwan atei nang asi subdum,’ tenen boyakise. Bok, kanci danguboka sunsi kisal dakmar,” ebmou. 12Bok, Bileam biryi ato eboka uram dekeibmou, “Niryi uram ebman ara Er Iya Erebdobnyi biryi ni si bambul dam uram deibdongobmanir to ebman,” ebmou.
Bileam biryi sun Israel nang ati liki bitinyi dinyi kisal dakmou
22:13-26
13Ura, Balak biryi Bileam bisi ato ebmou, “Teleb, kan ab, ni ab tonkwa anabdobnimiryi yuk ai binkwanim. Ba, a binimnyi ai aryi, kanci sun Israel nang dinatam akwe asing eibminyi ura, subdum,” ebmou. 14Ura, Balak biryi Bileam bobokaburyi, mutuk si Pisga kon binmarei. Ura, a mutuk kon asi Balak biryi dama deirin keil lamna tabaryi dobmou. Ba, yim bisam lembu tabaryi ab, yim bisam domba tabaryi ab asi a dobmou dungna deici deibnin yibinmou. 15Ura, Bileam biryi Balak bisi ato ebmou, “Ni nai Iya Erebdobnyi biti dama deibmarim ai a tikandum. Nira Iya Erebdobnyi ab eitam ebdankwanim,” ebmou. 16Ba, Er Iya Erebdobnyi ab, Bileam ab ebdanmarei ura, Imtamnyi biryi ersi, “Uram ato ebkwandum,” ebmou. Ura, ton ato ebmou, “Tamuboka Balak dam biminci, uram a ebdeibmanto kuboka ebkwandum,” ebmou. 17Ura, Bileam tamuboka binmou. Ba, Balak ab, sun sien nang ab ara tonkwa bisam obmaici, Imtamnyi biti dama deiboka uk dabmai dam tuba tikmai. Ba, Balak biryi Bileam bisi, “Iya Erebdobnyi uram una ebdeibmar do?” ebmou. 18Ura, Bileam biryi ersi Er Imtamnyi ebdeibmou to asi ato ebmou,
“Balak, bukokminci kekerum.
Zipor mi, kan amol takeiboka nisi kekerum.
19Er Imtamnyi bira ninyi aryi talyi ati, ‘Ukubkwankin-ukubkwankin,’ eraming atonyi kuma.
Imtamnyi bira ninyi mi kuma, ninyi mi akiryi kanyi sungnande atonyi kuma.
Er Imtamnyi biryi, ‘Ato kubkwan,’ eanci tok, kunurande.
Ba, Erci uram ena ara kunurdeirirande.
20Kan bikdum, Nisi Er Imtamnyi biryi, ‘Kisal dakdum,’ ebmanir.
Ba, Er Imtamnyi biryi kisal dakmaci bok, niryi dangubdeibman kum.
21Sun Yakub yala ninyi ara iya malyito dinyi ton kum kunung.
Sun Israel yala ninyi ara mambul ton kum donung.
Sun Nai Iya Erebdobnyi biryi sunsi kalingdur.
Sun Nai Imtamnyi ab tonkwa yibanung deyok aryi sun kanya kilkil asa aryi mot semnung.
22Er Imtamnyi biryi sunsi Mesir mutuk dam aryi dobkweteboka boyangarur.
Ba, Er Imtamnyi biryi er mabwe asi Er Imtamnyi mikib dongobdeibwe ba, sunda bai bisam lembu kisok yang beleandiryi kat kiboka mikib kurande ato kurdeirirur.
23Yakub yala ninyi asi mirei deiboka subkwaman dinyi ton kum.
Ba, kwemdeina ati molobnyi ba, mikib lak kimna dinyi ton kum eibkwaman.
Ara, ninyi aryi kanyi teneiboka Israel ninyi ati subkwamating ara ukubman kum.
Akatei ninyi ati ninyi aryi ato ebkwamating,
‘Dibdendarur, Er Imtamnyi biryi sunsi ilil tenen dinyi kubmararyi, lebdeibmar.
24Dibderum, sun Israel yala ninyi, asi Er Imtamnyi biryi mikib karebwe ba, sunda kam singa ner bukalabkaboka yangarande to kunmang.’
Kam singa yim aryi tingnande to kubmang.
Kam singa aryi yina kum yibmaci ura, mana kum kurande.
Ba, kamyoa obdiryi dibci ura, ining yirande.”
Ato eboka Er Imtamnyi biryi ebmou to kuboka, Bileam biryi Balak bisi ebmou.
25Ura, Balak biryi Bileam bisi ato ebmou, “Kanci sun Israel ninyi asi uram tentok ababyi ton kum subdenmarim. Ati, kanci sunsi uram tentok ababyi kisal dangna mem,” ebmou. 26Bok, Bileam biryi Balak bisi uram ato kuboka dekeibmou, “Ni sirya kan dam minob kum ebmonwe do? Er Iya Erebdobnyi biryi, ‘A uram ebkwandum,’ ebdeibmar to niryi ebman,” ebmou.
Bileam biryi sun Israel nang ati liki winiryi dinyi kisal dakmou
22:27–24:9
27Ura, Balak biryi Bileam bisi ato ebmou, “Yarum, niryi kansi yuk mutuk bobinkwankin. Ba, a binimnyi mutuk aryi, Er Imtamnyi biryi, ‘Ur,’ ebci ba, Er urasin dam aryi kanci sun Israel nang asi niti subdeibnurum,” ebmou. 28Ura, Balak biryi Bileam boboka mutuk kon si Peor kon, yini mutuk wiliba dam bobinmou.
29Ura, Bileam biryi Balak bisi ato ebmou, “Kanci niti dama deirin keil lamna tabaryi dobdum. Ba, yim bisam lembu tabaryi ab, yim bisam domba tabaryi ab niti a boyarum,” ebmou. 30Ura, Balak biryi Bileam ebmou to kunubmouci, yim bisam lembu tabaryi ab, yim bisam domba tabaryi ab asi Er Imtamnyi biti dama deirin keil lamna dobnin yibinmou to kuboka deibmou.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)