Hakim-hakim Uram 19
19
Gibea dam aryi Lewi yalanyi ab, er ner aminda dortabangni ner ab deyok
19:1-30
1A talak ara Israel nang aryi sienyi ton kum kiamnyi. Eda, Lewi yalanyi tentok Efraim mutuk kon dongtam aryi tingyanamuryi, kuramwe. Ani, Betlehem-Yehuda mutuk ner asi aminda dortabangni ner ton doamwe. 2Uca, a doamwe ner aryi er akenyi bira takloboka, er nai bisi Betlehem-Yehuda dam bindoka er nai ab wala dumbaryi kurorandei. 3Ba, er akenyi anabdobmou ura, “Neneboka iniboyankwan” tenen aminda er milibmou mi ab, keledai bitinyi ab kuboka binmou. Bindoka er ner asi nabmou uca, er ner aryi er akenyi bisi, “Ni nong ninyi ai ur yarum,” ebmou. Ba, er akenyi ab tonkwa er nai ai wengbinmarei ba, a ner er nai kanya kilkil kubmou. 4A kam ner er nai, anyi er yamal biryi, “Sun atei ban kum,” ebmou. Ba, tonkwa uki winiryi yibde kunmai. 5Ani, uki dumbaryi tum ara minob bukoka, Lewi yalanyi bira, “Ni atei bindobkwan,” tenen anaronmou. Uca, er yamal biryi, “Bisik dam kwaning utan aryi bai bukminyei ati, roti kwaning maka dakokminci birum,” ebmou. 6Ba, tonkwa bukoka yinmareici, er yamal biryi anyi bisi ato ebmou, “Biti a kuronmanimnyi ani, aminda aryi birum,” ebmou. 7Bok, anyi bira belekuna minob bukoka, “Bindobkwan,” tenen kunmou ababyi er yamal biryi titikoka talebdeibmou ba, tubto a tum ababyi a mabmou. 8Ani, uki amubaryi tum ara, “Belekuna bukoka bindobkun,” tenen anarou asi a ner er nai biryi, “Roti kwaning maka dakokminci, kiting tingyangaci to,” ebmou. Ba, yibde bunmarei. 9Ani, anyi er ner ab, er milibmounyi ab, “Baronkub,” tenen anaroi uca, a ner er nai biryi, “Kiting sirya yalikmar, dora sintam dankurci inibkur ati, a marona teleb. Mabmamunyi ani, berekci ba, ambutum belekuna aryi sun atei bindarur,” ebmou. 10Bok, anyi bira a mana er li kubmou ura, anabmouci, binmou. Er ab, er ner ab, er bisam keledai yim ton ner ton ab, er milibmou mi ab, ukuboka banmai ani, Yebus tam kuboka Yerusalem atei binmai.
11Banmai ani, Yebus atei dam bai ura, kiting yakna tentok kubmou. Ura, er milibmounyi biryi ersi ato ebmou, “Yebus nang atei bindoka mabdobkwayeb,” ebmou. 12Uca, anyi biryi, “Israel nang atei kuma, yuk nang atei mabkwamab do? Baronmabyi tok Gibea atei bindobkwamab,” ebmou. 13Bok, anyi biryi ersi, “Banmabyi ani, Gibea kum, Rama kum dabibyi atei nun bindoka mabkwayeb,” ebmou. 14Ura, bana akwe kunmai ani, Benyamin yala nang mutuk Gibea dam bai ura, kiting wekdobmou. 15A deyok aryi, “Gibea atei mabkwayeb,” tenen Gibea binmai. Sirya binmai ura, talyi atei keta bindoka bukmai. Asi, ninyi tentok ababyi, “A mabdobkwayeb,” eboka sun ai ton kum iniboka bobinmai.
16Ura, a lukunda aryi wisinyi tentok er wa inmou ani yanmou. Anyi bira Efraim konkon mutuknyi bok, Gibea tingyanamuryi, kuramwe. A tingyanamwe mutuk ara Benyamin yala nang mutuk bok tingyanamwe. 17Anyi biryi yandoka diramwe uca, ninyi ton atei keta tam a bukmai asi asing eibmou. Ura, a wisinyi biryi ato ebmou, “Sun dantam aryi yanganmarum ani, dantam binkwamarumci, a yandoka bukmarum do?” ebmou. 18Uca, Lewi yalanyi biryi ersi ato ebmou, “Nunda Betlehem-Yehuda aryi yanganmab. Ani, Efraim kon diniboka otam binkwamabci yibanmab. Nira, Efraim mutuknyi bok, Betlehem-Yehuda bise ani, tamuboka ni atei yibaronman. Bok, akatei nang ninyi tentok aryi nunsi, ‘Nun atei bindobkwayeb,’ ton kum eboka iniroryanmasing. 19Nun yina bulung kum yibanmab. Nun kwaning roti ab, anggur me ab ara a sirya bobdobmab. Nun bisam keledai yin dinyi ababyi a bobdobmab,” ebmou. 20Ba, wisinyi biryi ato ebmou, “Anda dinyi ati kanya teneina bukam mem. Utotoa nirya ni dam kubmar, ni karenkwamasin. Eda, sunsi atei keta tam a mana ara malyito ati, ni atei bindoka mabkwayeb,” ebmou. 21Ura, a wisinyi biryi sunsi iniboka er atei bobinmou ura, sun bisam keledai asi yina karebmou. Ura, sun yan me ilikmai ura, yina tonkwa yibmai.
22Sun kanya teleb asa yibde burabyi bok, a weik atei nang aryi ner sal talyi yobde yiban nang yandoka ai warikmai. Ba, bublan kukabmanto kuboka a wisinyi ai damnyi bisi, “Kan ai du dongobmarim ninyi ara nun yoronkwayeb ati, dobkwetebsurum,” ebmai. 23Ba, akai damnyi sakwetebmou ura, “Ni kum dobkwetebkwamasin, ni kwit yabwe. Anyi bira ni ai yanmar ati, ni ai malyi kimdongona kum kubkwanurum. 24Eda, ni nebnyi kam ner ab, anyi doyanmar ner ab asi dobkwetebsinyi ba, yoronmamunyi ani, sunci ukubkub tenebmunyi to da kubdarur. Bok, sal ara ni ai obdongoboka malyi kibsinibnumunyei ati, kum dobkwetebkwansin,” ebmou. 25Uca, a nang aryi anyi ebmou uram kum kekebmaici, tatab-tatab enmai. Ba, Lewi yalanyi a yanmounyi biryi er aminda dortabangni ner dobde yanmou ner tomobkwetebmou. Ba, a nang aryi tatab-tatab ebde a lukunda nirya yormuruna akwe kunmai tok berekmou. Ani, kiting sirya deibmou bok asi takdongobmai. 26Sirya berekmou ura, a ner yangaronmou ani, er akenyi mabmou ai bisik bublan dam yandoka dibmou. Ba, a dibmou tok asi kiting deibkatabmou.
27Ura, er akenyi mabmou ani, belekuna bukoka, “Baronkun,” tenen bublan kuktaleboka diramwe uca, er ner ara bisik bublan dam taruk kilibloboka a yandoka dibmou asi asing eibmou. 28Ura, er akenyi biryi, “Bukokdum a ner baronkwanim,” ebmou. Uca, sirya dibmou aryi uram ton kum ebmou. Ura, dibmoua tukwi asi tomobtaleboka bisam keledai deici deibdongobmou. Sirya deibdongobmou ura boboka er atei bobinmou. 29Er atei sirya bobinmou ura, but doboka er ner dibmoua tukwi asi yok kurande tok nirya sengmou ani, amolbaryi sekmou. Ura, Israel nang kuramnyi mutuk nirya deibmou ba, bobinmai. 30Sun Israel nang ukubmoua asi asing eibmai ura, ato ebmai, “Mesir aryi anaboka yanamoubwe talak aryi kuboka, uku talak ababyi ato kuna ara iya ton kum eirinub to asi asing eibmab. Ati, uki dangbisina kum kubkwayeb. Eda, sunbabyi kisok dakwayeb ati, a talak aryok mar bobkwayeb,” ebmai.
Currently Selected:
Hakim-hakim Uram 19: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
