1Korintus Uram 16
16
“Sun Yerusalem atei kuraming kuboka dib tenen nang kwaning atarande deyok aryi, sunda Korintus atei nang ababyi co bok bulubdeiboka karebdarur,” ebmou uram
16:1-4
1Ura, ni kwit yabwe, Korintus atei kurandum dib tenen nang. Sun Yerusalem atei kuraming kuboka dib tenen nang kwaning atarande deyok aryi, niryi sunti, “Kwaning atan kum nang kuramingiryok, sun kwit yabwe kwaning atan nang asi dibnilibting,” tenen uram ton ebkwinsin. Ara, niryi sun Galatia mutuk kuboka dantam-dantam aryi buluraming dib tenen nang nirya asi yibinkirikoka ato eboka ebdeibmase to, niryi sunbabyi neiktoto ebdeibmasin. Ati, sunbabyi, “Yerusalem atei aryi kuboka dib tenen nang kwaning atarande ati dibnilibkwayeb,” tenen co bok bulubdeibdarur. 2Ara, Hari Minggu tum berekci ura, neik dam buluramun cok, sunci sun dam kubmaci tok co bok boboka deibde bindarur. Ara, co bok weik dinyi sun dam kubmasute uca, co bok weik dinyi karebdate. Ba, co bok mitik dinyi sun dam kubmasute uca, co bok mitik dinyi karebdate. Ati, Hari Minggu tum nirya tonkwa buluramun cok, sunci co bok buluboka deibde bindarur. Co bok nirya asi sirya kiknibminikmunyi ani, nira sun dam yankwan. Ara, niryi sun dam yanmanyi ura, sunci, “Co bok kum bulurdeiriramoubwe ani, ukuryok aryi kuboka buluboka deibde binkwayeb,” ebmunyei. 3Ni sun dam sirya yanmanyi ura, sunci sun kankan aryi ninyi ton nang wibdeibkwandum. Ara, sunci, “Nun bulurdeiriramoubwe co bok bobitingiryok, sun Yerusalem atei kuraming dib tenen nang asi likniboka karebting,” tenen ninyi ton nang asi wibdeibkwandum. Sirya wibdeibkwamunyi ura, niryi sun Yerusalem atei nang asi kerek sengna kerek sekeibkwan. Ara, “A nang ara Korintus atei aryi kuboka dib tenen nang aryi bokdonokmasei nang diboka kunung,” eboka “Co bok likniboka karebkwansing ati yanmang,” eboka lak kimdeirin kerek sengna kerek sekeibkwan. 4Ura, niryi, “A co bok boban nang ab tonkwa bibiryok, nibabyi Yerusalem atei bina-bana ara teleb,” tenebtinyi uca, nibabyi Yerusalem atei nisintum bitinyi.
Er Paulus biryi, “Aminda aryi ato-ato kubde binkwan,” eboka lak ebmou uram
16:5-18
5Ura, nira Makedonia mutuk likoka yibinmanyi ani, sunda Korintus atei kurandum dib tenen nang diryankwansin. Ara, “Makedonia mutuk likoka yibinmanyi ani, Korintus atei binkwan,” tenen deyok aryi, ato ebmasin. 6Ura, ni sun dam yanmanyi ura, uki mikbaryi tonkwa kubmabyi ani, anaboka binkwan kum sun ab tonkwa kubmurubkwayeb kum. Ni sun dam yankwan ara muryi li dobkalibkwande deyok aryi, ni sun ab tonkwa kubmurubtibyi. Ara, muryi li tonkwa kubtibiryok, sunci niti bisik kona kiknibminiknindate. Ara, muryi li bisibci uca, yuk mutuk dirbinkwan ati, sunci niti bisik kona kiknibminiknindate. 7Niryi sunsi ukuryok kum diryankwansin ati ebman. Ukuryok sun dam diryasitinyi ura, uki mitik nun akwe tonkwa kubtibyi. Ba, niryi, “Uki mikbaryi tonkwa kubkwayeb,” tenen ukuryok kum diryankwan. Eda, nun Du Yesus biryi karebsici uca, ni ab sun ab aminda aryi uki ilinto tonkwa kubmabyi ani, tubto anaboka binkwan. 8Ba, ukuryok ara Efesus atei kubman ati tuba kubmurubkwan. Ura, kwalina si Pentakosta sirya kwalibmabyi ani, niryi anaboka Makedonia mutuk yibinyi ani, sun dam diryankwansin. 9Nira Efesus atei kubman ba, nun Nai Imtamnyi biryi nisi bublan kukeibnir uca, ninyi ilinto aryi nun Du Yesus uram Teleb Uram kekebmang. A deyok aryi, niryi, “Nun Du Er wa irmilibmurubkwan,” tenen Efesus atei tuba kubmurubkwan. Ba, akatei kuraming nang kankan ninyi ilinto aryi, “Teleb Uram nun li ati Paulus bisi bisik sektibyi,” tenen ukurderaming.
10Ura, niryi nun kwit Timotius bisi sun dam bokdonokmasin ati, erci sun dam yaci ura, sunci ersi diboka kibdobdarur. Ati, er sun ab tonkwa kubmunyi ba, sunci erti, “Ilil kubcei,” tenen namin kanya bobdarur. Ni Paulus bira nun Du Yesus wa irmilinunyi kunun to, nun kwit Timotius bibabyi nun Du Yesus wa irmilirurnyi kurur. Ati, sunci nun kwit biti, “Nun kankan aryi nun Du Yesus wa asi ur ibmilibte,” tenen kalikdarur. 11Sun kankan aryi kuboka ninyi tentok ababyi nun kwit Timotius biti, “Dobdobibyei,” tenebcei. Eda, sunci erti, “Nun kwit,” tenen diboka dobdobdarur. Ura, Timotius sun ab tonkwa kubmunyi ani, sunci teleb kanya boboka, “Nun kwit, teleb. Da birum,” eboka bokdonokdarur. Sirya bokdamunyi ani, nun kwit ni dam tamuryankwande. Ara, ni ab sunci ni dam bokdonokmandau nang aryi, “Timotius tamuryaci ura, nunbabyi Korintus atei tamurbinkwayeb,” tenen dibde bukwayeb.
12Ura, ukuryok ara nun kwit Apolos deyok ati uram ton ebkwinsin. Niryi uram ebkateibmasiryi, “Kanbabyi nun kwit yabwe bokdonokman nang asi miliboka Korintus atei birum,” ebmase bok, erci, “Ukuryok kum binkwan,” ebmanou. Ba, uki teleb kubci ura, erbabyi sun dam diryankwansir.
13Ura, ni kwit yabwe, sunci, “Dib tenebmurubkwayeb,” tenen kalikdandarur. Sunci katabum eboka nun Du Yesus bisi dib tenebmurubdarur. Ilil kanya bobmunyei. Eda, ilil kum asa aryi tenen kanya bobmunci, katabum eboka kubdarur. 14Sunci utotoa-utotoa nirya kunubde baramunyi dinyi ara boukwe weik kibmun cok, kunubde bindarur.
15Stefanus mabwe silib ara sun nirya bikmarum. Nun minob ura Akhaya mutuk yandoka Teleb Uram lak eterebmoubwe ba, Stefanus ab er mabwe silib ab ara deyok kouboka Teleb Uram minob dobdobmai. Teleb Uram sirya dobdobmai ura, sunci sun dib tenen nang asi du dongoboka yina kareboka dirniliramnyi ani, ukuryok tuba dirnilinung. 16Sunci sun Stefanus mabwe silib ato kuboka busul kuboka wa irmiliraming nang uram asi diboka kekebdarur ati ebman. A mabwe silib akwe ati ato kum ebman. Eda, sun ato kuboka dirniliramingnyi nang nirya ati ato ebman. 17Ura, sunci bokdonokmanindau uca, Stefanus ab Fortunatus ab Akhaikus ab ara ni dam sirya yanmang ati ni kanya teleb kubmanir. Ara, ni ab sunda Korintus atei aryi dib tenen nang ab tonkwa kum kuramib bok, a nang ara sunci bokdonokmanindau nang ara unubdeiboka ni ab tonkwa kuramib ati ni kanya teleb kuranir. 18A nang ara ni kanya asi teleb kubdeibmaning deyok aryi, ato ebmasin. Tonda, a nang aryi sunda Korintus nang kanya ababyi teleb kurdeiriransing ati tenebman. Sun ato kun nang ati sunci, “Nun nai yabwe, sunci nun kanya teleb kubdeibmasurum ara teleb dinyi kunubmarumci,” eboka lak ena teleb.
Sirya kobdob ara, “Ni kwit yabwe teleb,” eboka kerek sekeibmou uram
16:19-24
19Ura, sun Asia mutuk dantam-dantam aryi kuboka bulubmangnyi dib tenen nang ara sunda Korintus atei kurandum dib tenen nang asi, “Nun kwit yabwe teleb,” ebdeibmasing. Tonda, nun kwit Akwila ab er ner Priskila ab ara sun nirya asi, “Nun Du si deici aryi nun kwit yabwe teleb,” ebdeibmasiring. Tonda, sun nang bitinyi ai buluraming dib tenen nang nirya asi, “Nun kwit yabwe teleb,” ebdeibmasing. 20Sun akatei ara Efesus atei kuramingnyi dib tenen nang nirya ara sunsi, “Nun kwit yabwe teleb,” ebdeibmasing. Ura, nunda dib tenen nang aryi ebdandoka, “Nun kwit yabwe nun Du Yesus bisi dib tenen nang,” tenen irirdaramib to, sunci boukwe kiboka mamun iribdandarur.
21Tonda, ni Paulus ni taruk aryi kerek sekeibmasin ara, “Ni kwit yabwe teleb,” eboka kerek sekeibmasin.
22Unanyi-unaner ara nun Du Yesus bisi boukwe kum kibte uca, Er Imtamnyi biryi a nang asi, “Bindobdarur,” eboka sungdongona teleb. Maranata. “Nai Du o, minola yuryarum,” tenen ato ebman.
23Nun Du Erebdobnyi Yesus biryi sunsi kisal dangsina teleb.
24Ni Paulus biryi sunda nun Du Yesus Kristus dam kun nang nirya ati boukwe weik kusunun ati ebman. Amin.
Currently Selected:
1Korintus Uram 16: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
