1Korintus Uram 15
15
“Nun Du ninyi lemdeirisin Sienyi bira dibmou ani, kam bukokmou,” eboka eterebmou uram
15:1-11
1Ura, ni kwit yabwe dib tenen nang. Niryi minob ura nun Du Yesus uram Teleb Uram lak etereransise ba, sunci a uram dobdobmandau ani, ukuryok ababyi katabum eboka dib tenerandum. Ura, niryi sunsi, “Teleb Uram eterebmasise asi diboka tamuboka teneibdarur,” ebmasin. 2Teleb Uram ara nun Nai Imtamnyi biryi karebmasou biriman aryi sunsi lebdeibde baransir. Ara, sunci nun Du Yesus uram Teleb Uram asi diboka talebmurubmunyi uca, Er Imtamnyi biryi sunsi lebdeibde baransir. Ba, sunci Teleb Uram asi tuba kum talebdate uca, sunci minob ura talyi ati dib tenerandaute ani, ukuryok ababyi diboka dib kum tenerandate.
3Ara, nun Du Yesus biryi nisi minob etereanou to niryi, “A uram ara nunukaboka deirin uram kurur,” eboka sunbabyi eterermururansise. Ara, “Nun Du Kristus ninyi Lemsinanyi dibmou ara nun malyi kun deyok ati dibmasou,” eboka etereransise. Ara, “Er Imtamnyi Uram umbura aryi minob eamwe to, nun Du Yesus bira nun malyi dinyi kilibkwansou ati dibmasou,” eboka etereransise. 4Etereransisiryok, niryi sunsi ato eransise. “Nun Du bira sirya dibmou ura, tukwe dongon dam dongobdeibmai ani, uki winiryi tum berekmou ura, nun Nai Imtamnyi biryi Ersi kam bukeibmou. Ara, Er Imtamnyi Uram umbura aryi minob eamwe to, nun Nai biryi nun Du Yesus bisi kam bukeibmou,” eransise. 5Ura, nun Du Yesus kam bukokmou ura, Erci Petrus uruma si Kefas ab ebdandoka, “Ni kam bukokman,” eboka erdamnyi lak kibdanmou. Petrus bisi Erdamnyi lak kibdanmou ura, Erci Er miliramnyi nang amolbaryi nang kankan asi yuk nang ab ebdandoka Erdamnyi lak kibdanmou. 6A sirya ura, nun Du Yesus bira dib tenen nang lima ratus baryi neik dam bulubmai ab ebdandoka, “Ni kam bukokman,” eboka Erdamnyi lak kibdanmou. Ara, neik liki tum kubmou ba, nun Du Yesus ab a nang nirya ab ebdanmai. A nang nirya ara nun Du Yesus kam bukokmounyi asing eibmai cok, sun kankan asi ninyi ilinto ukuryok ababyi kam tuba kuraming. Ba, a nang kankan aryi ninyi ton nang sirya dibmai. 7A nang nirya asi Erdamnyi lak kibdanmou ura, nun Du Yesus bira er weit kobdob Yakobus ab ebdandoka, “Nira kam bukokman,” eboka Erdamnyi lak kibdanmou. A sirya ura, nun Du Yesus biryi sun Erci, “Teleb Uram deyok kouboka eterebde bindarur,” eboka bokdonokwamwe nang nirya ab ebdandoka, “Ni kam bukokman,” eboka Erdamnyi lak kibdanmou.
8Ani, sirya kobdob ara nun Du Yesus ab nibabyi ab ebdanmanumuryok, Erdamnyi nisi lak kibdanmou. Nira nun Du Yesus biryi bokdonokmasou nang kankan asi sirya kobdob tabangdongonanyi bitonyi kunun cok, Er ab ni ab ebdandoka Erci Erdamnyi nibabyi lak kibmanouci, nibabyi tikeibmanou. 9Nira nun Du Yesus biryi bokdonokmasou nang kankan asi outam bunanyi bitonyi kunun deyok aryi, niryi, “Sirya kobdob tabangdongonanyi kunun,” ebdanman. Minob ura niryi nun Du Yesus bisi dib tenen nang ati, “Obtinyi,” tenen domkiringnanse bok, nun Du Yesus biryi nisi nabdeibnou ura, “Teleb Uram eterebde birum,” eboka bokdonoknou. Bokdonoknou bok, niryi, “Sun dib tenen nang minob domkiringnanse se,” tuba tenerdanun deyok aryi, niryi ni damnyi ati, “Sun nun Du Yesus biryi tikeiboka bokdonoksou nang kankan asi nira outam bunanyi kunun,” tenerdanun. 10Ba, nun Nai Imtamnyi biryi kisal dakoka karebnou uca, nira nun Du Yesus uram Teleb Uram lak eterebde banunyi kunun. Ara, Er Imtamnyi biryi nisi kisal daknou uca, niryi Er wa irmiliransiryi, talyi ati wa kum irmiliranse. Nira outam bunanyi kunun cok, niryi sun bokdonokmou nang yuk nang asi bisibkaboka iya busul kuboka wa iranse uca, ninyi ilinto aryi nun Du Yesus uram Teleb Uram dobdobmai. Ato ebman cok, ni yuk aryi wa iranse uca, dib kum teneraming. Eda, Er Imtamnyi biryi miliboka kisal daknou ba, nun Nai biryi du mourdeiriramwe. 11Ati, nunda nun Du Yesus biryi bokdonokmasou nang ara Teleb Uram lak eramib ara uram yuk-yuk kum eramib. Eda, yuk nang babyi nibabyi neik uram akwe eboka lak etereramoubwe ani, ukuryok tuba neik uram akwe eboka lak etereramib. A lak etereramib dib en uram ara sunda Korintus nang ababyi kekerandauci, dobdobmandau ati ebman.
“Nun Nai Imtamnyi biryi sun din nang asi kam bukeibkwande,” eboka eterebmou uram
15:12-34
12Ni kwit yabwe. Nunda, “Nun Nai Imtamnyi biryi nun Du Yesus ninyi Lemsinanyi bisi kam bukeibmou,” eboka lak ena uram kekenub. Ato eboka lak ena uram bingnub cok, sun kankan asi ton nang ara, “Sun din nang asi Er Imtamnyi biryi kam kum bukeibkwande,” eraming se. 13Nun Nai biryi nun Du Yesus Kristus bisi kam bukeibmou deyok aryi, Erci sun din nang yuk nang ababyi kam bukeibkwande ati ebman. Sun din nang asi kam kum bukeibte uca, Erci nun Du Yesus dibmou ababyi kam kum bukeibmote. 14Ura, nun Nai Imtamnyi biryi nun Du Yesus Kristus bisi diboka kam kum kubdeibte ura, nunci nun Du Yesus biti, “Kam bukokmar,” lak en uram ababyi talyi uram akwe kurante. Ato kurante ura, sunci nun Du Yesus bisi dib tenerandum dinyi ababyi talyi dinyi akwe kurante. 15Tonda, nun Nai biryi nun Du Yesus bisi diboka kam kum bukeibte ura, nunda, “Er Imtamnyi biryi nun Du Yesus Kristus bisi kam bukeibmar,” eboka lak eramib nang ara tola uram en nang kurantibyi. Ara, Er Imtamnyi biryi sun din nang kam kum bukeibte ura, Erci nun Du Yesus bibabyi kam kum bukeibmote. 16Er Imtamnyi biryi sun din nang asi kam kum burdeirirante ura, Erci nun Du Yesus Kristus dibmou ababyi kam kum bukeibmote ati ato ebman. 17Ura, nun Nai biryi nun Du Yesus Kristus bisi kam kum bukeibmote ura, sun dib tenerandum dinyi ara talyi dinyi akwe kubsute. Sun dib tenen dinyi ara talyi dinyi akwe kubsute uca, Er Imtamnyi biryi sun malyi kun dinyi kum kilibdeibmasute. Malyi dinyi kum kilibdeibmasute ura, sunda malyi dinyi kubmurubde nang tuba kubdate. 18Nun Du Kristus bisi kam kum bukeibte ura, sun Er dam kuramnyi nang sirya dibmai nang ababyi lemsin dinyi kum dobdobting. Eda, lemsin dinyi wanikminikting uca, Er Imtamnyi dam kun nang tuba kum kubting. 19Nunda dib tenen nang ara lemsina dinyi dibde buramibiryok, nunci, “Tukwetam tuba kuramib ababyi lemsin dinyi dobdobmabyi ani, sirya dibibyi ura, iya lemsin dinyi dobdobkwayeb,” tenen kuramib. Ba, nunci, “Nun dibibyi ura, iya lemsin dinyi kum dobdobkwayeb,” tenerantibyi uca, nunda yuk nang asi bisibkaboka iya mambul kanya bon nang kurantibyi. Uca, ninyi nirya aryi nunti, “Iya bico tenebmanto nang,” teneransiting.
20Ba, ton nang aryi, “Er Imtamnyi biryi sun din nang asi kam kum bukeibkwande,” eraming cok, tola ati ato eraming. Nun Nai Imtamnyi biryi nun Du Yesus Kristus bisi diboka kam bukeibmou ati ebman. Ara, nun Nai Imtamnyi biryi nun Du Yesus biti, “Deyok kouboka kam bukeibkwandanyi kubkwande,” tenen yuma kobdob aryi kam bukeibmou ani, Erci sun din nang yuk nang asi aminda aryi kam bukeibkwande. 21Minob ura nun abwe Adam biryi malyi kun dinyi kubmou uca, erbabyi yuk nang nirya ababyi wenen dinyi dobdobmaburyi, dimnamoubwe ani, ukuryok tuba dimnub. Ara, ninyi tentok aryi malyi deyok koubmou uca, nun nirya aryi din dinyi doronub. Ura, kam kurdeirin dinyi dorona ababyi neiktoto kurur. Ara, nun Du Yesus tentok kam bukokmou deyok aryi, nunda nun Du Yesus dam kun nang nirya ababyi kam bukokwayeb. A deyok aryi, niryi nun Du Yesus biti, “Deyok kouboka kam bukokmou,” ebmasin. 22Ara, ninyi nirya ara nun abwe Adam biryi deibdoba nang kuramib deyok aryi, nun nirya ara nun abwe malyi deyok aryi, dimnub. Er Imtamnyi biryi nunsi kam bukeibkwande ababyi neiktoto kurur. Ara, nunda dib tenen nang ara nun Du Yesus dam kun nang kunub deyok aryi, nun Du Yesus biryi nunsi kam bukeibkwansir. 23Ba, Er Imtamnyi biryi a ilil tenen dinyi nirya kiknirur ara lilibdeiboka kiknirur. Ara, nun Du Yesus Kristus bisi yuma kobdob aryi kam bukeibmou ani, sun Ersi milin nang asi aminda aryi kam bukeibkwande. Ara, nun Du Yesus tamuryuryaci uki tum berekci ura, Er Imtamnyi biryi nunda nun Du amwetam bun nang asi bukeibkwansir ati ebman. 24Sirya kam bukeibsici ura, sirya kobdob uki tum ara imtam tukwetam minob dinyi tuba kum dankwande uki tum berekwande. Berekwande ba, nun Du Yesus bira Er mikib nirya asi Er Nai taruk dam tamubkarebkwande. Ara, nun Du Yesus biryi sun im dangna tukwe dangna kuramingnyi erebdob nang mikib ab, weik sien nang mikib ab, nirya asi kum daneibdiryi, sun isa sien nang mikib nirya ababyi kum daneibci ura, nun Du Yesus biryi Erdamnyi luknubdongobdiryok, “Ni Nai, Kanda iya Weik Sienyi kurum,” eboka Er mikib nirya asi Er Nai Imtamnyi taruk dam tamurkarebkwande. 25Ara, Er Imtamnyi biryi, “Iya Weik Sienyi kibdum,” eamwe tok, nun Du Yesus bira iya Weik Sienyi kuboka imtam tukwetam dinyi nirya kalingsurur. Ara, Er Imtamnyi biryi nun Du Er mar ordana nang nirya asi muna kimdongobde barurci, nun Du Er yan deyok tam asi deirirande. Muna sirya kibdongobmaci ani, nun Du Yesus biryi Er mikib asi Er Nai Imtamnyi bisi tamurkarebkwande. 26Ninyi dirdein dinyi ababyi mar ordananyi bito kurande dinyi asi nun Du Yesus biryi muna kibdongobkwande. Ara, sirya kobdob talak berekmaci ura, nun Du Yesus biryi Ersi ordan dinyi yuk dinyi nirya asi kum daneibci ura, Erci ninyi dirdein dinyi ababyi muna kibdongobdiryok, kum daneibkwande. 27Nun Du biryi muna kibdongoboka ordan dinyi nirya asi Er yan amwetam kibdeibkwande deyok aryi, ninyi dirdein dinyi ababyi muna kibdongobkwande ati ebman. Er Imtamnyi Uram umbura aryi ato esurur.
“Erci muna kibdongobmouci, utotoa nirya Er yan deyok tam asi deibdongobmou.” (Mazmur 8:5)
Ati, ninyi dirdein dinyi ababyi muna kibdongobkwande ati ebman. Ba, nun Nai Imtamnyi biryi utotoa nirya asi nun Du Yesus yan amwetam deibdongobmou. Ba, nun Nai bira Iya Erebdobnyi kurur ati, Erci nun Du Yesus yan amwetam burbana kum kubkwande. A dinyi ara lak kubmar. 28Ura, Er Imtamnyi biryi im dangna tukwe dangna dinyi nirya asi muna kibdongoboka nun Du Yesus Er yan amwetam kibdongobci ura, nun Du biryi Erdamnyi luknubdongobdandoka Er Imtamnyi bisi, “Nai, Kanda iya Weik Sienyi kurum,” ebkwande. Ara, Er Imtamnyi biryi nun Du Yesus bisi erebdeiboka iya mikib dinyi kareande ani, nun Du Yesus biryi, “Ni Nai,” tenen Erdamnyi luknubdongobdankwande. Ara, ninyi nirya aryi Er Imtamnyi biti, “Iya Weik Sienyi,” eboka lak ebkwaming ati, nun Du Yesus biryi, “Ni Nai,” eboka Erdamnyi luknubdongobdankwande.
29Ati, ni kwit yabwe, nunda dib tenen nang nirya ara, “Er Imtamnyi biryi sun din nang asi kam bukeibkwansir,” tenen bingnub. Ati, sunci, “Er Imtamnyi biryi sun din nang kam kum bukeibkwansir,” tenebmunyei. Dib tenen nang kankan asi ton nang ara, “Nun kwit yabwe dib tenen nang ara me kum dongobmai talak aryi dibmai nang ababyi Er Imtamnyi biryi kam bukeibkwande,” teneramingiryi, sunci kiklibdeiboka sun din nang ababyi me dongoraming. Ara, kam tuba kuraming nang ara din nang asi kiklibdeibmang nang asi me dongoraming. Ati, sunci, “Er Imtamnyi biryi sun din nang asi diboka kam bukeibkwande,” tenen ato kuraming. 30Tonda, nunda nun Du Yesus wa irmilin nang ara Teleb Uram etereranub asi ninyi aryi nunti, “Obkwayeb,” tenen tuba-tuba domkiringsunung. Ura, nunci, “Er Imtamnyi biryi sun din nang asi kam kum bukeibkwande,” tenebtibyi ura, nunci, “Ninyi aryi nunsi obsingnyi ababyi, Teleb Uram eterebmurubde binkwayeb,” tenen Teleb Uram eterebmurubde barantibyi do? Ato tenen kum. Eda, nunci, “Er Imtamnyi biryi kam bukeibkwansir,” tenen bingnibiryi, Teleb Uram eterebmurubde banub. 31Ni kwit yabwe, nun Du Kristus Yesus nun Arungdeirisururnyi biryi sunsi lebdeibsou deyok aryi, ni kanya iya teleb kunurur ba, niryi sunsi kisal dangsunun. Bok, ninyi ton nang ara, “Teleb Uram kekena nun li,” tenen nisi mambul weik kimdeiriraning uca, dibmanto kunanyi kunun. Ara, uki-uki nirya aryi ni dibmanto kunanyi kunun ati dib ebmasin. 32Niryi Efesus atei kuranse ba, ton nang aryi, “Teleb Uram kekena nun li,” tenen, “Obtibyi,” tenen nisi yu weik kuboka malyi kimdeiriranei. Ara, yu kam aryi bisam oyiraming to, a nang aryi nisi yu weik kuboka malyi kimdeiriranei. Ati, niryi, “Er Imtamnyi biryi din nang kam bukeibkwansir,” tenen dibde bunun ati, niryi, “Ninyi aryi nisi mambul kubdeiboka obniting ababyi niti teleb,” tenenun. Ura, niryi, “Er Imtamnyi bira din nang asi kam bukeibkwande,” tenenun deyok aryi, niryi ato dinyi mambul dinyi ababyi ur bonun. Bok, nunci, “Er Imtamnyi biryi sun din nang kam kum bukeibkwande,” tenebtibyi uca, nunci aminda dinyi dibde buna kum uca, “Tukwetam dinyi akwe ingkirikwayeb,” tenen kunurantibyi. Ato kurantibyi ura, nunci ato erantibyi,
“Nun kwit yabwe, ambutum dibkwamab se. Ati, arub ara yina ab me ab langdeiboka yirmurunkwamab,” eboka kunurantibyi. (Yesaya 22:13)
33Ni kwit yabwe, ninyi aryi tola ati, “Er Imtamnyi biryi sun din nang asi kam kum bukeibkwande,” ebtingiryok, sunsi bowanikminiksingnyei. Sunci tola uram eteren nang ati, “Nun kwit yabwe,” tenebdate uca, a nang aryi malyi tenen dinyi dakdongobsute uca, sunbabyi danguboka malyi kun nang kibdate. 34Ati, sunci, “Tola uram bai donokwayeb,” tenen bikdob kanya tamuboka bondarur. Tonda, sunci malyi kun dinyi kurandum asi takdarur. Sunda Korintus atei nang kankan aryi ton nang ara Er Imtamnyi biti walwal nang kuraming ati ato ebman. Ati, niryi sunti, “Alyi kibdeibkwan,” tenen ato ebmasin.
“Nun Nai Imtamnyi biryi sun din nang asi kam bukeibkwande ba, ninyi nong lubman kum dinyi kareboka kam bukeibkwande,” eboka eterebmou uram
15:35-58
35Ura, sun kankan aryi ton nang ara ato eboka asibdeniting. “Er Imtamnyi biryi sun din nang asi kam bukeibkwande ara ninyi nong unato dinyi asi kareboka kam bukeibkwande do?” eboka asibdeniting. 36Ato eboka asirden dinyi ara lub nang aryi asirdeting dinyi akwe kubmar se. Nunda tukwetam kuramib nang nong ara yuk. Tonda, Er Imtamnyi biryi kam bukeibkwansir nang nong ara yuk. Tukwetam boramib nong ara dibkwandur dinyi kurande bok, aminda aryi dobdobkwamib nong ara dibman kum dinyi dobdobkwamib. Ati, nunda tukwetam nang aryi kum dibtibyi ura, Er Imtamnyi biryi nunsi bukeiboka ukuryok nong ara dibman kum dinyi kum karebsute. Sun wa in nang ara yala kouramingnyi ura, yala ara tukwe umbura wekmaci ani, betekoka arande. Tukwe umbura kum wekte uca, yala ara betekoka kum abte. Er Imtamnyi biryi nunsi ukuryok nong lubman kum dinyi karebkwansir ababyi neiktoto kurur. Nun sirya dibibyi ura, Er Imtamnyi biryi nunsi bukeiboka ukuryok nong ara lubman kum dinyi karebkwansir. Bok, nun kum dibtibyi ura, nunda ukuryok nong ara dibman kum dinyi kum dobdobtibiryi. 37Sun wa in nang yala kouraming ba, nong dinyi betekoka anci du dinyi kum kouraming. Eda, yala dinyi akwe kouraming. Ara, gandum yala kum yuk yala kum kouramingnyi ura, betekoka aanci ura, du moun dinyi yongoraming. 38Ba, nun Nai Imtamnyi biryi teleb teneamwe tok, Erci yala yuk-yuk kiknibmouci, nong yuk-yuk ababyi kiknibmou. Ara, yala yuk-yuk aryi betekoka arande uca, nong yuk-yuk ababyi marande. Ati, aminda ababyi nun Nai biryi sun din nang asi kam bukeibkwande ara ukuryok nong lubman kum dinyi kikniboka karebdiryok, kam bukeibkwande. 39Im dangna tukwe dangna kurande dinyi yuk-yuk ara nong yuk-yuk kusurur ati ebman. Ninyi nong ara yuk. Bisam nong ara yuk. Maka nong ara yuk. Mekinaia nong ara yuk. 40Tonda, sun imtam ai aryi kuboka nong ara yuk. Sun tukwetam aryi kuboka nong ara yuk. Tukwetam aryi kuboka nong nirya ara teleb dinyi kurur bok, imtam ai aryi kuboka nong nirya ara bisibkaboka iya teleb dinyi kurur. 41Kiting aryi berengdeirirande milil ara yuk. Wala tilil ara yuk. Kurya tilil ababyi yuk kurur. Tonda, kurya yuk-yuk ara tilil yuk-yuk ababyi kurur.
42Ura, nunda Er Imtamnyi biryi kam bukeibkwansir nang ababyi neiktoto kubkwayeb. Tukwetam kuransir nong ara teleb dinyi kurande bok, dibmanto dinyi kuransir. Ba, kam bukeiboka kiknibkwansir nong ara bisibkaboka iya teleb dinyi kubdiryi, kum daneibman kum dinyi kubkwande. 43Tukwetam kuransir nong ara dibibyi ura, milil tuba kum kubci asi tukwe umbura dongoransing. Ba, nun Nai biryi nunsi kam bukeibkwansir ara milil weik nong kareboka kam bukeibkwansir. Tukwetam kuransir nong ara mitang dinyi tukwe umbura dongoransing bok, nun nong ukuryok kiknibkwansir dinyi ara mikib weik kubkwande. 44Tukwe umbura dongoraming nong ara tukwe dam dinyi akwe kurur. Ba, nunci dobdobkwayeb ukuryok nong ara Er Imtamnyi Kanya Roh Kudus aryi kiknibkwande nong dobdobkwayeb. Tukwetam nong a kurande deyok aryi, imtam nong ababyi a kurur ati ebman. 45Er Imtamnyi Uram umbura aryi minob ura ato eboka kerek sekeibmai.
“Er Imtamnyi biryi kiknibmou uca, ninyi yuma kobdob anyi si Adam bira isin nebneb enanyi kibmou.” (Kejadian 2:7)
Ani, nun Du Yesus Kristus tentok ara Adam bitonyi kuboka yuma kobdobanyi kuramuryok, Erci Adam bisi bisibkaboka sun tukwetam nang asi kam burdeirisururnyi kibmou. 46Ba, kam burdeirin dinyi ara tukwetam minob kiknibmou dinyi asi bisibkaboka iya erebdob dinyi kurur bok, Er Imtamnyi biryi kam burdeirin dinyi yuma kum karebmou. Eda, tukwetam dinyi asi yuma kobdob aryi kikniboka karebmasou ani, kam burdeirin dinyi ara aminda aryi karebkwansir. 47Er Imtamnyi biryi minob kikniamwe ninyi si Adam ara Erci tukwe aryi iniboka kikniamwe deyok aryi, tukwetamnyi kuramwe. Ba, nun Du Yesus bira aminda aryi yanmunyi bira tukwetamnyi kum kurur. Eda, nun Du Yesus bira Adam bisi bisibkaboka imtam aryi kuboka yuryanmunyi kurur. 48Nun abwe kobdob Adam bira tukwetamnyi kuboka dibmantonyi kuramwe to, nunda er yala dakansou nang ababyi tukwetam nang kunub cok, dibmanto nang akwe kunub. Ba, nun Du Yesus bira imtam aryi kuboka yuryanmunyi kururcok, kam bukeibmounyi kurur to, nunda Ersi dib tenen nang ababyi kam bukeibkwansir nang kibkwayeb. 49Nun tukwetam nong tuba kuransir ba, nunda nun abwe Adam bito nang kuramibiryi, dibman nang kuramib. Ani, nunda kam burdeirin nong dobdobkwayeb ara nun Du Yesus Kristus bito nang kubibiryok, nunda dibmanto tuba kum kubibiryok, Er Imtamnyi teleb tenesurur to akwe kunubde binkwayeb.
50Ura, ni kwit yabwe, niryi sunsi dib en uram ton eboka lak ebkwinsin. Nunda tukwetam nong ab ining ab tuba kuransir ba, Er Imtamnyi biryi nunsi, “Imtam ai wengyandoka erebdob bun sokon ur buryandarur,” eboka kum erebdeibkwansir. Tukwetam nong ara dibman dinyi tuba kuransir ba, nunda iya kam burdeirisin dinyi asi dorona kum kubtibyi. Ba, sirya dibmabyi ura, iya kam burdeirisin dinyi dobdobkwayeb. 51Kekebdarur. Niryi sunsi minob lak kimna kum uram ton lak kibdeibkwinsin. Nunda tukwetam kuboka kam kuramib nang nirya ara kum dibkwayeb ati ebman. Nun Du tamuryaci ura, nunda kam tuba kubkwamib nang ara kum dibkwayeb. Eda, nun Nai biryi nun nong asi anmalakoka unubdeibkwansir uca, nun nong ara iya dibman kum kubkwansir. 52Ara, buu ena si sangkakala lilim weik uram lukdandoka dobci ba, nun Nai biryi karebsici uca, nun nong ara unubdeibkwansir. Ara, bebe lukdandoka ling erande ato, mitik asing kublam ena ato, uki bumang kubkwande ba, nun Nai biryi nun nong asi lukdandoka unubdeibkwansir. Ara, buu ena lilim weik uram dobci ba, Er Imtamnyi biryi sun din nang nirya asi kam bukeibdiryok, kum daneibman kum nong asi karebkwansir. Ba, nunda kam tuba kubkwamib nang asi nun Nai biryi nun nong asi unubdeibkwansir uca, nunbabyi ukuryok nong ara kum daneibman kum dinyi dobdobkwayeb. 53Ara, nun Nai Imtamnyi biryi teleb tenerur to, kum daneibman dinyi ara iya kum kubkwande. Eda, kum daneibman kum dinyi ara kum daneibman dinyi unubkwande. Tonda, dibman kum dinyi ara dibmanto dinyi unubkwande. 54Ura, iya kam burdeirin dinyi aryi tiya kam kun dinyi asi sirya unubkwande ara Er Imtamnyi biryi minob lak eamwe uram kunubkwande. Tonda, iya kam burdeirin dinyi aryi dibman dinyi asi unubdeibkwande ara Er Imtamnyi Uram kunubkwande. Ara, Er Imtamnyi Uram umbura aryi ato eboka kerek sekeiamnyi.
“Er Imtamnyi biryi muna kibdongobci uca, ninyi dirdeirin dinyi tuba kum kubkwande.” (Yesaya 25:8)
55“Nun Nai Imtamnyi biryi muna kibdongobmar. Muna kibdongobmar uca, ninyi dirdeirisin dinyi aryi nunsi mambul tuba kum kubdeibkwansir. A deyok aryi, nunci dirdeirisin dinyi asi, ‘Muna kibdongobmakir,’ enub.” (Hosea 13:14)
Ato eboka Er Imtamnyi Uram minob uram umbura aryi kerek sekeiamnyi. 56Ninyi dirdeirisin dinyi ara nunsi lukeiboka mambul kurdeiriransou ara nunci malyi dinyi kuramoubwe deyok aryi, mambul kurdeiriransou. Tonda, “Ukubdarur-Ukuna mem,” en uram kum kekebtibyi uca, nunci, “Malyi dinyi kuramib se,” tenen mambul kanya kum borantibyi. Ara, “Ukubdarur-Ukuna mem,” en uram biriman aryi malyi kun dinyi ton ninyi dirdeirin dinyi, ton mikib weik kurandei. 57Ani, nun Nai biryi karebsou uca, nunci nun Du Yesus Kristus biriman aryi muna kimdongon dinyi doronub. Ara, nun Du Yesus biryi malyi kun dinyi ton dirdeirin dinyi ton asi muna kibdongobmou uca, iya kam kun dinyi doronub. A deyok aryi, nunci nun Nai Imtamnyi bisi, “Ei nun Nai,” enub.
58Ati, ni kwit yabwe boukwe weik kusunun nang. Nunda muna kimdongon dinyi dobdobmab deyok aryi, sunbabyi katabum eboka dib tenebmurubdarur. Ati, sunci, “Tola uram bowanikminiksicei,” tenen katabum eboka tikdarur. Tonda, sunci, “Busul kuboka nun Du Yesus wa irmilibkwayeb,” tenen sun damnyi nun Du Yesus bisi karebdandarur. Ara, sunci, “Er Imtamnyi biryi nunsi kam bukeibkwansir,” teneramunci, “Nun wa irmilinub ara talyi ati kum wa irmilinub,” teneramuncok, sunci tanglona kum uca nun Du Yesus wa irmilina teleb.
Currently Selected:
1Korintus Uram 15: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
