1Korintus Uram 14
14
“Bahasa roh ara ulubyang dakde sisingna uram deib aryi Er Imtamnyi si weik ena ara teleb dinyi kurur bok, tukwetam nang aryi bingnung uram deib aryi, ‘Er Imtamnyi biryi aminda aryi ato-ato kubkwande,’ ermuruna ara bisibkaboka iya teleb dinyi kurur,” eboka eterebmou uram
14:1-25
1Ati, ni kwit yabwe, sunci, “Boukwe weik kibdankwayeb,” tenen sunci sun mamun boukwe weik kibdandarur. Boukwe weik kibdamun cok, sunci, “Sun dib tenen nang yuk nang asi katabum ebdeibkwayeb ati, Er Imtamnyi Kanya Roh Kudus aryi nunsi Er wa irmilina ati mikib dinyi ton karebsute,” tenen busul kuboka ingkirikdarur. Ura, sunci Er Imtamnyi wa irmilina ati mikib dinyi yuk-yuk asi ur ingkirikdatiryok, sunci, “Er Imtamnyi biryi aminda aryi kubkwande dinyi asi bikoka ermururantibyi,” tenen nunukaboka ingkirikdarur. 2Er Imtamnyi Kanya Roh Kudus aryi karebde barur uca, dib tenen nang ton nang ara bahasa roh yuk nang aryi bingna kum uram deib aryi sisingnaming. A nang ara ulubyang dakde sisingna uram deib aryi uram enung asi Er Imtamnyi bikwe bingdur. Ara, ato en uram deib aryi uram sisingnaming ara Er Imtamnyi bikwe ab uram sisingnaming. Yuk nang aryi ato en uram kum bingnung. Sun ulubyang dakde sisingna uram deib aryi sisingnamingnyi nang ara Er Imtamnyi Kanya Roh Kudus biriman aryi minob lak kum kuanci dinyi ilinto bikoka ebtingiryok, yuk nang asi laktoto kum eraming. Yuk nang aryi bikman kum uram deib aryi ilila uram sisingnamingiryok, yuk nang asi katabum kum erdeiriraming. A deyok aryi, niryi sunti ato ebmasin. Bahasa roh ara yuk nang aryi bingna kum uram deib aryi uram sisingna ara teleb dinyi kurur bok, sunci, “Bahasa roh deib aryi uram sisiktibyi,” tenen iya nunukaboka ingkirikmunyei. 3Ba, sun Er Imtamnyi biryi ebdeibmaci uram bikoka lak eteren nang ara yuk nang aryi bingnaming uram deib aryi eramingiryok, Er Imtamnyi Uram ermururaming. Uca, sun a uram kekeramingnyi nang kanya kankana kum kurur. Eda, a lak ena uram biriman aryi sun dib tenen kanya ara tabakoka katabum ebkwande. Tonda, a lak ena uram biriman aryi sun kanya ara tabakoka teleb kibkwande. 4Ba, sun bahasa roh deib aryi eramingnyi nang ara yuk nang aryi bingna kum uram deib aryi eraming deyok aryi, yuk nang kanya asi katabum kum erdeiriraming. Eda, sun mining kanya akwe katabum erdeiriraming. Ba, “Er Imtamnyi biryi ato-ato kubkwande,” ermurun nang ara tukwe nang aryi bingnung uram deib aryi ermururaming deyok aryi sun mining kanya akwe katabum kum erdeiriraming. Eda, sun bulubmangnyi dib tenen nang kanya nirya asi katabum erdeiriraming. 5Ni kwit yabwe, Er Imtamnyi Kanya Roh Kudus aryi karebsute uca, sun nirya ara bahasa roh deib aryi uram sisingnandate. Ato ebman cok, niryi iya nunukaboka tenesunun to ebkwinsin. Er Imtamnyi Kanya Roh Kudus aryi karebsute uca, sun nirya ara, “Er Imtamnyi biryi aminda aryi ato-ato kubkwande,” eboka ermuruna teleb. Ara, tukwe nang aryi bingnung uram deib aryi Er Imtamnyi Uram ermuruna teleb. Ato kun dinyi ara nunukoka ingkiringna dinyi kurur ati ebman. Bahasa roh deib aryi erandinyi bira teleb dinyi kurande bok, ninyi bingnaming uram deib aryi lak erandinyi bira bisibkaboka iya teleb dinyi kunurande. Ba, bahasa roh deib aryi erandinyi bira, “Ato-ato ebmasin,” eboka uram danguboka lak ebte uca, erbabyi sun er uram keken nang kanya katabum ebdeibkwante.
6Ura, ni kwit yabwe dib tenen nang. Niryi sun urasintam aryi yandoka bahasa roh deib aryi uram ebtinyi uca, ato en uram ara sunti teleb kubdeibsute do? Ato tenen kum. Sunci bahasa roh ati walwal kurandate deyok, ato en uram ara sunti teleb kum kubdeibsute. Ba, niryi lak uram deib aryi, “Dib en uram ton eterebkwinsin,” eboka lak eterebtabaksitinyi uca, a uram ara sunti teleb kubdeibsute. Tonda, niryi lak uram deib aryi, “Aminda aryi ato-ato kuboka kunubkwande,” en uram kum, bikdob uram kum, minob lak kum kuanci uram kum eterebsitinyi uca, a uram ara sunti teleb kubdeibsute. 7Niryi tukwetam dinyi kankan asi isin nebneb en kum dinyi dobniryok, kiklina uram ton ebkwinsin. Ara, tukwetam nang aryi bilul on dinyi doboka kiklibkwansin. Ara, bilul on dinyi si kecapi ara lilim yuk-yuk kum ebte uca, erda lilim tentok akwe ebte uca, nunci, “A mot semar,” tenen, “O mot semar,” tenen biktibyi do? Ato tenen kum. Tonda, isin u ebdongon bilul si seruling ababyi neiktoto lilim yuk-yuk kum ebte uca, nunci, “A mot semar,” tenen, “O mot semar,” tenen biktibyi do? Ato tenen kum. 8Tonda, buu ena si sangkakala ara lilim yuk-yuk kum ebte uca, sun yin doun nang aryi, “Unato ati sangkakala dobmang do?” tenen bikting do? Ara, “Mar ordankwayeb ati sangkakala dobmang do kum do?” tenen sun yin doun nang kanya ara kankana kubte. 9Ura, nunda dib tenen nang ababyi neiktoto kunub. Nunda bahasa roh deib aryi uram ebtibyi uca, yuk nang aryi, “Ato-ato eboka eterebmasing,” tenen bikting do? Ato tenen kum. Ninyi tentok ababyi nun uram kum biksiting deyok aryi, nunci talyi ati ebtibyi. 10Im dangna tukwe dangna nang yala yuk-yuk ara uram yuk-yuk eboka sisingnamingiryok, sun mining uram kekeramingiryok, “Ato-ato ebmang,” tenen bingdaraming. 11Ura, niryi yuk yala nang uram kum bingnantinyi uca, ni walwal uram deib aryi uram sisingnandinyi bira niti, “Yuk mutuk aryi kuboka yangananyi kurur ati walwal uram erur,” tenebnute. Tonda, niryi walwal uram deib aryi sisingmanirinyi biti, “Yuk mutuknyi kurur ati walwal uram erur,” tenebtinyi. 12Ati, sunbabyi neiktoto yuk nang aryi bingna kum uram deib aryi eterebdamunyei. Eda, yuk nang aryi bingnaming uram deib aryi eterebdandarur. Sunci, “Er Imtamnyi Kanya Roh Kudus karebsute uca, Er wa irmilina ati mikib dinyi yuk-yuk dobdobtibyi,” tenen busul kuboka ingkiringnandum deyok aryi, sunci, “Dib tenen nang yuk nang kanya asi katabum ebdeibkwayeb ati mikib dinyi dobdobtibyi,” tenen ingkirikdarur.
13Ati, sun kankan kuboka tukwe nang bingna kum uram deib aryi uram eramingnyi nang ara, “Lak uram deib aryi eterebtinyi,” eboka Er Imtamnyi bisi molona teleb. Ara, “Nai, Kanci mikib dinyi karebniminyi uca, niryi Kan uram asi danguboka lak eterebtinyi,” eboka molona teleb. 14Ura, nunci Roh Kudus aryi karebsici bahasa roh deib aryi eboka Er Imtamnyi bisi si weik eboka molobtibyi ara nun mining dib tenen kanya dam dem aryi kuboka molobtibyi. Ba, yuk nang ara nun molobtibyi tok kekebtingiryok, nun molobtibyi deyok bingna kum kuranting deyok aryi, nun molona deib aryi dib tenen nang yuk nang kanya asi katabum kum ebdeibtibyi. Ato kubtibyi uca, nunci bikdob tenen dinyi kum kunubtibyi. 15Ati, nunci una kubkwayeb do? Niryi bahasa roh yuk nang aryi bingna kum uram ebniryok, ni mining dib tenen kanya biriman aryi Er Imtamnyi bisi molobkwan. Ba, niryi nisintum bikdob kanya bobniryok, lak uram deib aryi molobkwan. Tonda, niryi bahasa roh yuk nang aryi bingna kum uram ebniryok, ni mining dib tenen kanya biriman aryi Er Imtamnyi si weik eboka mot sebkwan. Ba, niryi nisintum bikdob kanya bobniryok, lak uram deib aryi Er Imtamnyi si weik eboka mot sebkwan. 16Ura, sunci sun dib tenen kanya aryi bahasa roh deib aryi Er Imtamnyi bisi, “Ei nun Nai,” ebdate uca, sun uram kekeransingnyi nang ara a uram ati walwal kuranting. Walwal kuranting deyok aryi, a nang ara una kuboka, “Amin, dib sirik,” ebting do? 17Ara, sunci bahasa roh deib aryi Er Imtamnyi bisi diboka, “Ei nun Nai,” ebdate bok, sun dib tenen nang yuk nang ara a uram kum bikting deyok aryi, sun uram ara sun kwit yabwe sun kanya asi katabum kum ebdeibte.
18Sunda Korintus nang ara bahasa roh yuk-yuk deib aryi erandum bok, ni Paulus bira sunsi bisibkaboka bahasa roh yuk-yuk ilinto asi bingnun. A bahasa roh yuk-yuk asi bingnun deyok aryi, niryi nun Nai Imtamnyi bisi, “Ei nun Nai,” enun. 19Bahasa roh yuk-yuk asi bingnun cok, ni ab dib tenen nang yuk nang ab tonkwa bulubmabyi ura, niryi ato uram deib aryi kum eterenun. Ati, niryi, “Yuk nang aryi bingna kum uram deib aryi seribu kata kum ebkwan,” tenen kunun. Eda, niryi, “Dib tenen nang yuk nang asi uram bum amubaryi akwe eterebtinyi bok, lak uram deib akwe eterebtinyi,” tenen kunun.
20Ni kwit yabwe dib tenen nang. Sunci mitik mabwe tenen dinyi taklobmunci, nebdob nang tenen kanya bobdarur. Tonda, mitik mabwe kanya ato bobmunci, malyi kun dinyi kisibdobdarur. 21Er Imtamnyi Uram umbura aryi ato eboka minob kerek sekeiamnyi. “Er Imtamnyi biryi, ‘Ni dam kuramnyi nang asi wenebkwan,’ tenen ato ebmou. ‘Niryi arukdeibnyi uca, yuk mutuk nang aryi yandoka sun mining uram ara Ni dam kuramnyi nang aryi bingna kum uram deib aryi ebkwaming. Nira Imtamnyi biryi Ni dam kuramnyi nang asi uram tuba ebkwan bok, sunci Ni uram kum kekebkwaning se.’” Ara, Er Imtamnyi Uram umbura aryi kerek sekeiamnyi to, sun Er Imtamnyi dam kuramnyi nang aryi yuk uram ara sun bingna kum uram deib aryi eterena uram kum kekeramnyi. Ato kuboka sun dib tenen nang aryi bahasa roh ara tukwe nang aryi bingna kum uram eramunyi ura, sun uram keken nang aryi, “Una ebmang do?” tenen kum bikoka sun uram kum kekebkwaming.
22Ura, ni kwit yabwe, ilila uram deib aryi Er Imtamnyi Uram enub ara, “Sun dib tenen nang eterebkwayeb,” tenen enub. Eda, “Sun dib tenen kum nang eterebkwayeb,” tenen enub. Ara, “Sun dib tenen kum nang aryi bahasa kekebingiryok, sunci, ‘Er Imtamnyi biryi wenebkwansir,’ tenen bikting,” tenen ilila uram enub. Ba, nunci, “Sun dib tenen nang ara, ‘Er Imtamnyi biryi kisal dakwansir,’ tenen bikting,” tenebibiryi, bahasa roh kum enub. Bok, “Er Imtamnyi biryi ato-ato kubkwande,” en uram ara yukto kurur. Ato en uram ara, “Sun dib tenen kum nang eterebkwayeb,” tenen kum enub. Eda, “Sun dib tenen nang eterebkwayeb,” tenen lak ebkwanub. Ara, sun dib tenen nang aryi, “Er Imtamnyi biryi kisal dakwansir,” tenen bikwaming ati nunci lak en uram deib aryi, “Er Imtamnyi biryi ato-ato kubkwande,” enub. 23Ura, nunda dib tenen nang nirya bulubtibyi ura, nun nirya ara Roh Kudus aryi karebsici to bahasa roh yuk-yuk ebtibyi uca, ato dinyi ara teleb dinyi kubte do? Ato tenen kum. Dib tenen nang ton nang ara a bahasa roh yuk-yuk ati walwal kuraming deyok aryi, sunci sunti, “Walina talen nang aca,” tenebkwanting. Tonda, dib tenen kum nang aryi yandoka bahasa roh kekebting uca, sunci sunti, “Lub kanya bon nang aca,” tenen ebdankwaming. 24Ba, nunda dib tenen nang nirya bulubmabyi ura, nun nirya aryi lak ena uram deib aryi, “Er Imtamnyi biryi ato-ato eboka lak ebdeibmasir,” ena teleb. Ura, dib tenen kumnyi wengyate ura, erci a uram deyok anmalakoka bikdobkwante. Ara, Er Imtamnyi Uram bingna kumnyi wengyate ura, erbabyi a uram anmalakoka bikdobkwante. Ara, dib tenen kumnyi biryi a lak ena uram kekebte uca, “Nira malinyi kunun,” tenen bikdobkwante. Tonda, erci, “Ni malyi kun dinyi kum taklobnyi ura, sun dib tenen nang nirya aryi ni malyi deyok lilibkwaming,” tenen bikdobkwante. 25Tonda, nunci Er Imtamnyi Uram lak en uram deici aryi ebmurubibyi uca, ninyi kanya dam aryi malyi tenen dinyi inirdeirirdaraming ababyi lak kimsurur. Uca, sun dib tenen kum nang ababyi, “Malyi dinyi kuramoubwe se,” tenen sun damnyi luknubdongoboka Er Imtamnyi si weik ebkwaming. Er Imtamnyi si weik ebkwamingiryok, a nang ababyi nunda dib tenen nang ati, “Er Imtamnyi sun ab tonkwa diboka kubmarum,” eboka lak ebkwansing.
“Sunda dib tenen nang aryi tonkwa buluryamunci, sunci ato-ato kubmuncok, Er Imtamnyi si weik ebdarur,” eboka eterebmou uram
14:26-40
26Ati, ni kwit yabwe dib tenen nang. Nun una ebtibyi do? Sun dib tenen nang buluramunyi ura, ton nang ara Er Imtamnyi bisi erebdeiboka mot sebkwaming. Yuk nang ara dib en uram eterena uram eterebkwaming. Yuk nang ara Roh Kudus aryi sun kanya dam aryi anmalakoka etererur dinyi asi kekeramingiryi, sunci a dinyi ara minob ura lak kum kuanci dinyi ebmuruboka ninyi urasintam aryi lak eterebkwaming. Yuk nang ara ilila uram yuk nang aryi bingna kum uram deici aryi sisikwaming. Tonda, yuk nang ara ilila uram dangubingiryok, nun mining uram bingnamib uram deici aryi lak eterebkwaming. A dinyi yuk-yuk nirya ara, “Sun dib tenen nang bulubmangnyi nang nirya asi sun kanya asi katabum ebdeibtibyi,” tenen kunubde binkwanub. 27Ura, sun kankan ton nang ara, “Ilila uram deici aryi sisiktibyi,” eransingnyi uca, sunci ato ebdarur. “Ninyi bitinyi kum winiryi kum ilila uram deici aryi sisikmangnyi ura, ilila uram sisingna asi taklobkwayeb.” Ebmuncok, sunci ato ebtabakdarur, “Ilila uram deici aryi ebmuncok, neik tum ebmunyei. Eda, tonyi ebde tonyi ebde bindarur.” Tonda, sunci ato ebdarur. “Ilila uram deyok bingnanyi biryi ilila uram danguboka lak kum ebsute ura, sunci nunsi ilila uram ebsumunyei.” 28Ilila uram bikoka danguboka ebkwandanyi kum kubte ura, sun ilila uram deib aryi sisingnaming nang ara uram kilikwanung. Ara, a nang aryi sun kanya dam aryi Er Imtamnyi bisi ilila uram deib aryi ur ebting. Bok, a nang ara dib tenen nang urasintam aryi kubingiryok, ilila uram lak ebingnyei.
29Ura, sunda dib tenen nang buluramun cok, sun Er Imtamnyi Uram ebdeibmaca eteren nang ababyi Er Imtamnyi Uram lak ebkwanung. Ara, Er Imtamnyi Uram ermurun nang bitinyi kum winiryi kum lak ebkwanung. Lak ebingnyi ba, sun uram keken nang aryi diboka liliboka, “A uram ara dib en uram do kum do?” tenebkwanung. 30Ura, Er Imtamnyi Kanya Roh Kudus aryi dib tenenanyi ur bukmarinyi tonyi bisi er kanya dam aryi anmalakoka eterebtiryok, “Kanci ato-ato eboka minob lak kum kuamwe dinyi asi lak kibdum,” ebte ura, anyi biryi tikoka Er Imtamnyi Kanya aryi eterebmaci tok ur eterebkwandur. Ara, uram enanyi yumanyi biryi er uram takoka anyi bisi sokon loubkwandur. Sokon loubte ura, er kwit bira, “Roh Kudus aryi anmalakoka eterebmanir dinyi asi lak kibkwan,” tenen tikokdiryok, Er Imtamnyi Kanya Roh Kudus aryi er kanya dam aryi eterebmaci dinyi asi lak kibkwandur. 31Ara, sunda, “Er Imtamnyi biryi aminda aryi ato-ato dinyi kunubkwande,” eboka ermurun nang nirya ara tonyi ebde tonyi ebde baramuncok, Er Imtamnyi Uram ur ermurubdarur. Ato kubmuncok, sunci sun bulubmangnyi dib tenen nang kanya asi katabum ebdeibmunci, dib en uram eterebkwandum. 32Sun “Er Imtamnyi biryi aminda aryi ato-ato dinyi kunubkwande,” eboka ermurun nang ara walina talena deici aryi Er Imtamnyi Uram kum ermururaming. Eda, sunci sun damnyi kalikdandoka, “Er Imtamnyi Uram deib aryi ato-ato ebkwayeb,” tenen bikdandoka Er Imtamnyi Uram ermururaming ati ebman. 33Nun Nai Imtamnyi bira walina talen dinyi ton ninyi kanya kankana kurdeirin dinyi yuk dinyi ati, “Ni li,” tenerur. Ba, nun Nai biryi teleb tenesurur dinyi ara, “Antanibdeibdandoka kubting,” tenesurur. A deyok aryi, niryi, “Sun Er Imtamnyi Uram ermurun nang ara sun damnyi kalikdandoka, ‘Ato-ato ebkwayeb,’ teneraming,” ati ebmasin.
Ura, ni kwit yabwe, sun dantam-dantam nirya aryi kuboka buluramingnyi dib tenen nang aryi kunubde baraming to lak ebkwinsin. 34Sun dib tenen nang tonkwa buluramingnyi ura, sun nerabwe ara uram kilikwanung. Ara, “Sun nerabwe ara sun bulubmangnyi nang urasintam aryi uram ton lak eterebingnyei,” tenen deyok aryi, “Uram kilikting,” ebmasin. Eda, Er Imtamnyi Uram umbura aryi esurur to, “Sun nerabwe ara sun damnyi luknubdongobdandoka sun akenyi uram kekebkwanung.” 35Ura, nerabwe ara Er Imtamnyi Uram ati, “Diboka biktibyi,” tenen kubting ura, sunci sun akenyi asi, “Eterebnurum,” eboka molobting. Ara, sun ai umbura bukting ba, sun akenyi bisi, “Dib en uram eterebnurum,” eboka molobting. Ba, nerabwe ara sun dib tenen nang bulubmangnyi kankan asi uram eterebingnyei. Ato kun dinyi ara ukubman kum dinyi kubte.
36Sun dantam-dantam nirya bulubmangnyi dib tenen nang ara ato-ato dinyi kuboka kunubde baraming bok, sunda Korintus atei aryi kuboka dib tenen nang atikwe ato kuboka kum kunurandum se. Ati, niryi sunsi asirdena ton asibdenkwinsin. Sunci sun damnyi erebdeibdandoka, “Nunda Er Imtamnyi Uram deyok nang kunub,” tenerdarandum darib? Tonda, sunci, “Nun tikwe Er Imtamnyi Uram dobdobmoubwe,” tenerdarandum darib? 37Niryi sunsi, “Ato-ato kunubde bindarur,” eboka kerek sekeibmasin ara ni yuk aryi tenen dinyi deici aryi kum kerek sekeibmasin. Eda, nun Du Yesus bira nun Arungdeirisururnyi biryi arukdeibsou to akwe lak eboka kerek sekeibmasin. Ati, sun kankan asi, “Nunda Er Imtamnyi Uram ebdeibmaci to lak etereramnyi nang kunub,” tenebdating nang ara niryi sunsi arukdeibmasin uram ati, “Nun Du Uram diboka kubmar,” eboka lak ebting. Tonda, sun kankan asi, “Nunda imtam dinyi ati bikdob nang kunub,” tenebdating nang ababyi, “Nun Du biryi arukdeibmasou to diboka ebmurubmar,” eboka lak ebniting. 38Niryi sunsi nun Du Yesus biryi arukdeibmasou uram asi ebmuruboka lak ebmasin. Ba, sun kankan asi ton nang ara a uram ati, “Nun Du biryi arungdeirisina uram kuma,” ebting. Sun ato dinyi ebingnyi nang ara Er Imtamnyi Uram diboka kum bingnung ati, nunci a nang aryi ebingnyi uram kum kekebkwayeb. Ati, sunbabyi a nang ati, “Er Imtamnyi Uram diboka kum bingnung,” tenen bikmunci, a nang uram kekebmunyei.
39Ati, ni kwit yabwe dib tenen nang. Sunci, “Er Imtamnyi Uram bikoka ebmurubtibyi,” tenen busul kuboka ingkirikdarur. Tonda, sunci sun, “Er Imtamnyi Kanya karebsici uca, ilila uram deib aryi uram sisiktibyi,” tenen nang asi, “Mem,” ebmunyei. 40Ato ebman bok, nun Du Yesus biryi arukdeibmasou to, sunbabyi neiktoto tuba-tuba kunubde bindarur. Tonda, sunci ninyi kanya kankana kurdeirin dinyi nirya asi bisik sekmuncok, ton dinyi kunubde ton dinyi kunubde bindarur.
Currently Selected:
1Korintus Uram 14: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
