1Korintus Uram 12
12
“Er Imtamnyi Kanya Roh Kudus aryi, ‘Ni wa irmilibting,’ tenen sun dib tenen nang yuk-yuk asi mikib dinyi yuk-yuk asi karebmasou,” eboka eterebmou uram
12:1-11
1Ni kwit yabwe dib tenen nang, ukuryok ebkwinsin uram ara Er Imtamnyi Kanya Roh Kudus aryi, “Ni wa irmilibting,” tenen nunda dib tenen nang yuk-yuk asi mikib dinyi yuk-yuk asi karebde basurur ati uram ebkwinsin. Ati, niryi sunti, “Imtam aryi kuboka karebde basurur mikib dinyi yuk-yuk ati diboka bikting,” tenen eterebkwinsin. 2Minob ura sunda Er Imtamnyi biti walwal nang kurandau. A talak aryi kunubde barandau to sunci tubto teneibdarur. A kubde barandau talak ara kwemdeina molon nang aryi sunsi bowaningminingnansei uca, sunbabyi kwemdeina dinyi molorandau. Kwemdeina dinyi ara talyi dinyi uram sisikman kum dinyi kurur bok, sunci molobde barandau. A talak ara isa aryi sun kanya bowaningminingnansou. 3Sunda kwemdeina molon nang kurandau deyok aryi, sunci, “Er Imtamnyi Kanya Roh Kudus aryi karebsute uca, Er wa irmilibkwayeb ati mikib dinyi yuk-yuk dobdobtibyi,” tenen kum bikmandau. A deyok aryi, niryi sunsi a deyok ati eterebkwinsin. Sun dib tenen kum nang ara nun Du Yesus biti, “Erda malinyi kurur ati, Er Imtamnyi biryi Ersi wenebdur,” eraming. Ati, unanyi-unaner aryi ato dinyi ebingnyi uca, a nang ara Er Imtamnyi Kanya Roh Kudus biriman aryi ato kum ebting. Eda, isa kanya boboka ato dinyi eraming. Bok, sun dib tenen nang ara nun Du Yesus biti, “Nun Arungdeirisururnyi,” eraming. Ati, unanyi-unaner aryi ato dinyi ebingnyi uca, a nang ara Er Imtamnyi Kanya Roh Kudus biriman aryi ato eraming. Isa kanya bon dinyi deib aryi ato kum ebting ati ebman.
4Nunda dib tenen nang nirya ara imtam aryi kuboka Er Imtamnyi wa irmilina ati mikib dinyi yuk-yuk doronub. Mikib dinyi yuk-yuk doronub bok, a mikib dinyi yuk-yuk nirya asi karesururnyi bira Er Imtamnyi Kanya Roh Kudus tentok kurur. 5Tonda, nunda dib tenen nang nirya ara nun Du Yesus wa irmiliramibiryi, yuk wa-yuk wa ibde baramib. Yuk wa-yuk wa ibde baramib bok, nun wa takurdeirisururnyi bira nun Du Yesus tentok kurur. 6Tonda, nunda dib tenen nang nirya ara Er Imtamnyi mikib deici aryi ilil tenen dinyi yuk-yuk kikniramib. Ilil tenen dinyi yuk-yuk kikniramib bok, mikib yuk-yuk nirya asi karesururnyi bira nun Nai Imtamnyi tentok kurur.
7Ura, Er Imtamnyi Kanya Roh Kudus ara nunda dib tenen nang nirya asi mikib dinyi yuk-yuk karesurur ara Roh Kudus wa ina ati lak kimdeirin dinyi yuk-yuk karesurur. Ati, nunci, “Nun kwit yabwe dib tenen nang asi teleb kubdeibkwayeb,” tenebkwamib ati, Erci nunsi mikib dinyi yuk-yuk karebmasou. 8Ara, nun Nai Imtamnyi biryi Er Imtamnyi Kanya Roh Kudus biriman aryi ton nang asi mikib dinyi ton dinyi karebmou uca, a nang ara bikdob dinyi bikoka yuk nang asi lak etereraming. Tonda, yuk nang asi mikib dinyi yuk dinyi karebmou uca, a nang ara lak kum kuanci dinyi bikoka yuk nang asi lak etereraming. Ara, Er Imtamnyi Kanya Roh Kudus tentok biriman aryi a dinyi yuk-yuk karesurur. 9Tonda, yuk nang asi Er Imtamnyi Kanya Roh Kudus aryi mikib kuboka dib tenen dinyi mikib karebmou uca, a nang aryi, “Er Imtamnyi biryi ilil tenen dinyi diboka kiknibkwande,” tenen dibde buraming. Tonda, yuk nang asi mikib dinyi karebmou uca, a nang aryi sun youn yin nang utotoa asi kweteraming. Ara, Er Imtamnyi Kanya Roh Kudus tentok biriman aryi Er Imtamnyi biryi a mikib dinyi yuk-yuk asi karesurur. 10Ura, yuk nang asi Er Imtamnyi Kanya aryi mikib karebmou uca, ilil tenen dinyi utotoa kikniraming. Tonda, yuk nang asi mikib dinyi yuk dinyi asi karebmou uca, a nang aryi Er Imtamnyi ebdeibmaci uram ebmuruboka lak eraming. Tonda, yuk nang asi mikib dinyi yuk dinyi karebmou uca, a nang aryi, “Ato en uram ara Er Imtamnyi Kanya Roh Kudus uram,” tenen bingnung. Tonda, “Ato uram ara isa uram,” tenen bingnung. Tonda, yuk nang asi mikib dinyi yuk dinyi karebmou uca, a nang ara ilila uram tukwe nang aryi bingna kum uram yuk-yuk deib aryi Er Imtamnyi si weik eraming. Tonda, yuk nang asi mikib dinyi yuk dinyi karebmou uca, a nang ara ilila uram yuk-yuk bikingiryok, nunda tukwetam nang uram deib aryi lak etereraming. 11A imtam aryi kuboka karesin dinyi nirya ara yuk-yuk kurur bok, a dinyi nirya asi kareboka wa isururnyi bira Er Imtamnyi Kanya Roh Kudus tentok a kurur. Ara, Er Imtamnyi Kanya Roh Kudus aryi teleb tenebmaci tok, Erci nunda dib tenen nang yuk-yuk asi mikib dinyi ton-mikib dinyi ton yuk-yuk karesurur.
“Nunda dib tenen nang nirya ara yuk-yuk kunub cok, nunda neik kanya boboka nong tentok ato kunub,” eboka eterebmou uram
12:12-31a
12Ura, ni kwit yabwe, kiklina uram ton doboka eterebkwinsin. Ninyi kisok ara yuk. Ninyi taruk ara yuk. Ninyi yan ara yuk. Ato dinyi nirya yuk-yuk kurur bok, Er Imtamnyi biryi a dinyi nirya antanibdongoboka kiknibmasou uca, nong tentok akwe kunub. Ura, nunda nun Du Yesus Kristus bisi dib tenen nang ababyi neiktoto tentok akwe kunub. Ara, nunda nun Du Yesus bisi milin nang nirya ara yuk-yuk kunub cok, nun nirya ara neik kanya boboka nong tentok ato kunub. 13Nun Du biryi nunsi Er Imtamnyi Kanya Roh Kudus asi karebmasou ara neik kanya kareboka antanibdeibsou uca, nong tentok ato kibmoubwe. Ara, sun Yahudi yala nang ababyi, sun Yunani yala nang ab, yuk yala nang ababyi, yuk-yuk bokdanmoubwe ani, imtam aryi kuboka neik kanya akwe dobdobmoubwe uca, antaniboka kunub. Tonda, sun ninyi aryi arukmangnyi tok ikin wa bon nang ababyi, sun ikin wa bona kum nang ababyi, yuk-yuk bokdanmoubwe ani, Er Imtamnyi Kanya Roh Kudus neik kanya akwe langdeiboka dobdobmoubwe uca, nunda antaniboka nong tentok ato kunub.
14Ura, ninyi nong ara tentok akwe kurur bok, ninyi nong antanirdongon kiknin dinyi ara tentok akwe kum kurur. Eda, ninyi nong antanirdongon kiknibmasou dinyi ara mitik kum kurur. Ninyi kisok ara yuk. Tonda, ninyi taruk ara yuk. Tonda, ninyi yan ara yuk. 15Ati, ninyi yan aryi, “Nunda ninyi yan akwe kununum deyok aryi, teleb dinyi ara ninyi nong kobdob dinyi diboka kum kununum,” ebdengnyei. Tonda, “Ninyi taruk ara nunda ninyi yan asi bisibkaboka iya teleb dinyi kururung cok, ninyi nong kobdob dinyi diboka kururung,” tenebdengnyei. Ninyi yan ababyi teleb dinyi kururcok, ninyi nong kobdob dinyi diboka kurur ati ebman. 16Tonda, ninyi amol ababyi, “Nunda ninyi amol akwe kununum deyok aryi, nunda teleb dinyi ara kisok kobdob dinyi diboka kum kununum,” ebdengnyei. Tonda, “Ninyi asing ara nunda ninyi amol asi bisibkaboka iya teleb dinyi kururung cok, ninyi kisok kobdob dinyi diboka kururung,” tenebdengnyei. Ninyi amol ababyi teleb dinyi kururcok, ninyi kisok kobdob dinyi diboka kurur ati ebman. 17Ninyi nong antanibdongoboka kiknibmasou dinyi ara asing dem kuransute ura, amol kum kuransute uca, nunda amol kum kekerantibyi. Ba, amol dem kuransute ura, nun u kum kuransute uca, nunda tong kum bingnantibyi. 18Bok, nun Nai Imtamnyi biryi ninyi nong asi minob kiknibmasou ara Erci, “Ato-ato kuboka kiknibkwan,” teneamwe tok, antanirdongon dinyi yuk-yuk asi lilibdeiboka kiknikmasou. 19Ninyi nong antanirdongon dinyi yuk-yuk kum kurante ura, antanirdongon dinyi tentok akwe kurante ura, ninyi nong ababyi ton kum kurante. 20Ba, nun Nai Imtamnyi biryi kiknibmou uca, ninyi yan, taruk, kisok a nirya asi antanibdongobmou uca, ninyi nong ara tentok a kunum. Tonda, nunda dib tenen nang ababyi neiktoto nong tentok ato kunub.
21Asing ara taruk asi, “Kanci nisi teleb kum kubdeibnutum ati talyi dinyi akwe kurandim,” ebcei. Tonda, kisok ara yan asi, “Kanci nisi teleb kum kubdeibnutum ati talyi dinyi akwe kurandim,” ebcei. 22Eda, nong antanirdongon dinyi ton dinyi ara ninyi aryi, “Mikib kum kurur,” teneramingnyi bok, a dinyi ara bikdob dinyi kurur. “Mikib kum kurur,” tenen dinyi ababyi kum kubsute ura, nun nong ara malyi kubsute. Ara, sun dib tenen nang kankan kuraming tukwetam bun nang ababyi neiktoto kunung. Dib tenen nang yuk nang aryi a nang ati, “Tukwetam bun nang aca,” teneraming bok, a nang ababyi bikdob nang kunung. #12:22 Ninyi nong antanirdongon dinyi kankan asi, “Mikib kum,” tenen dinyi kiklin dinyi ara asing bam kurur. Asing bam ara, “Mikib kum,” tenen dinyi kurur bok, iya bikdob dinyi kurur. Ara, asing bam kum kuransute uca, nunci wi mabmana kum kurantibyi. 23Tonda, nong antanirdongon dinyi ara, “Yuk nang urasintam aryi lak kibibyei,” tenen dinyi ara nunci tabakoka dirlilirdaramib. Ara, “Yuk nang urasintam aryi lak kibibyei,” tenen nun ongon aling ongoramib. 24Ba, nong antanirdongon dinyi ara ninyi aryi, “Lak kibdankwayeb,” teneramingnyi dinyi ara nunci nunukaboka kum dirlilirdaramib. Ba, nun Nai Imtamnyi biryi nun nong dinyi nirya antanibdeibmou cok, Erci ninyi aryi, “Bikdob kuma,” tenen dinyi asi bisibkaboka erebdeibmou. 25Ara, nun Nai biryi, “Ninyi nong ara sekdandoka kuna mem,” tenebmou to, Erci nun nong asi antanibdongoboka kiknibmasou. Ara, “Ninyi nong antanirdongon dinyi aryi sun mamun dibmilibdankwaming,” tenen kiknibdeibmasou. Ura, nunda dib tenen nang ababyi neiktoto nun mamun dibmilibdankwanub. 26Ninyi nong antanirdongon dinyi tentok asi u yin dinyi talebci uca, mambul kuranci ura, ninyi nong antanirdongon dinyi yuk dinyi nirya ababyi nisin u yirmururande. Ba, ninyi nong antanirdongon dinyi tentok aryi ererdeirin dinyi dobdobci uca, ninyi nong antanirdongon dinyi yuk dinyi nirya ababyi kilkil kanya boraming. Ura, nun dib tenen nang ababyi neiktoto kuboka nun mamun dibnilibdankwayeb.
27Ura, ni kwit yabwe, sunda dib tenen nang neiktoto ara nong tentok ato kurandum. Ara, nun Du Yesus Kristus dam kun nang kurandum cok, neik kanya borandumci, nong tentok ato kurandum. Nong tentok ato kurandum cok, sun yuk-yuk ara ninyi nong antanirdongon dinyi yuk-yuk ato kurandum. 28Ara, sun dib tenen nang kankan aryi nun Nai Imtamnyi biryi wa irmilin dinyi yuk-yuk karesurur. Ara, yuma kobdob tikeibmou ara nun Du Yesus uram Teleb Uram deyok kouboka eterebde ban nang asi tikeibmou. Ba, yuk nang asi wa irmilin dinyi bitinyi dinyi karebmou ba, nun Nai biryi Er aminda kubkwande dinyi ermurun nang asi tikeibmou. Ba, yuk nang asi wa irmilin dinyi winiryi dinyi karebmou ba, nun Nai biryi dib en uram liliboka eteren nang tikeibmou. Ba, sirya kobdob ara Erci wa irmilin dinyi yuk dinyi-yuk dinyi karebmouci, yuk nang asi tikeibmou. Ara, ilil tenen dinyi kiknin nang asi tikeiboka karebmasou. Tonda, youn talen nang asi kweten nang asi tikeiboka karebmou. Tonda, sun yuk dinyi-yuk dinyi ataranci nang asi bongkaren nang asi tikeiboka karebmasou. Tonda, yuk nang asi kalingna nang asi tikeiboka karebmasou. Tonda ilila uram ara yuk nang aryi bingna kum uram yuk-yuk deib aryi sisingnaming nang ababyi tikeiboka karebmasou. 29Ura, nunda dib tenen nang nirya ara Teleb Uram deyok kouboka eterebde ban nang kunub do? Ato tenen kum. Tonda, nun nirya ara Er Imtamnyi ebdeibmaci uram boban nang kunub do? Ato tenen kum. Tonda, nun nirya ara dib en uram liliboka eteren nang kunub do? Ato tenen kum. Tonda, nun nirya ara ilil tenen dinyi kikninub do? Ato tenen kum. 30Nun nirya ara youn talen nang kwetenub do? Ato tenen kum. Nun nirya ara ilila uram ara yuk nang aryi bingna kum uram deib aryi sisingnub do? Ato tenen kum. Nun nirya ara ilila uram deyok bikoka tukwetam nang uram deib aryi danguboka enub do? Ato tenen kum. 31aA imtam aryi kuboka karesin dinyi yuk-yuk nirya ara teleb dinyi akwe kurur bok, sunci busul kuboka, “Er Imtamnyi wa irmilina ati nunci mikib dinyi bisibkaboka iya bikdob dinyi dobdobtibyi,” tenen ingkirikdarur. Ara, “Sun dib tenen nang yuk nang asi katabum erdeirin dinyi nunukaboka ingkirikting,” tenen ato eboka ebdeibmasin.
“Sun mamun boukwe kimdana ara yuk dinyi-yuk dinyi nirya asi bisibkaboka iya teleb dinyi kurur,” eboka eterebmou uram
12:31b–13:13
31bBa, ukuryok ara niryi sunsi yuk dinyi-yuk dinyi nirya asi bisibkaboka iya bikdob dinyi lak kibkwinsin.
Currently Selected:
1Korintus Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
