1Korintus Uram 11
11
1Ni kwit yabwe. Nun Du Kristus biryi, “Ni damnyi teleb kubdeibdankwan,” tenen kum kuramwe. Eda, Erci yuk nang ati, “Lebdeibkwan,” tenen Erdamnyi karebdanmou. Ura, ni Paulus bibabyi neiktoto, “Ni damnyi teleb kubdeibdankwan,” tenen kum kunun. Eda, “Yuk nang asi teleb kubdeibkwan,” tenen busul kuboka ingkiringnun. Ati, niryi ato kuboka nun Du Yesus kubde banmou to milibde banun to, sunbabyi neiktoto ni kubde banun to milibdarur.
“Nunda dib tenen nang tonkwa bulubmabyi ura, nun Nai si weik eramibyi ara ato kubde-ato kubde binkwayeb,” eboka eterebmou uram
11:2-16
2Ura, ni kwit yabwe, sunci ni etereransise to tuba-tuba tenerandum ati niryi sunti, “Ni kwit yabwe,” tenen kisal dakmasin. Tonda, niryi ebmuruboka sunsi nun Du Yesus deyok ati dib en uram etereransise asi sunci diboka talerandau ani, ukuryok ababyi talerandum ati, niryi sunsi kisal dakmasin.
3Ba, ukuryok ara niryi, “Bikting,” tenen dib en uram ton eterebtabakwinsin. Ara, nun Nai Imtamnyi bira kisok atonyi kurur ba, nun Du Yesus Kristus bira Er amwetam bunanyi kurur. Ba, nun Du Kristus bira kisok atonyi kurur ba, sun sal nang ara Er amwetam bun nang ato kunung. Ba, sun akenyi yabwe ara kisok ato nang kunung ba, nerabwe ara sun amwetam bunung. 4Sun sal nang ara, “Nun Nai Imtamnyi bisi molobkwayeb,” tenebingnyi kum, “Er Imtamnyi Uram ebmurubkwayeb,” tenebingnyi kum, sunci sun kisok kalubmangiryi, molobingnyei. Eda, sun kisok kaluna langakeibmangiryi, molobkwanung. Tonda, sun kisok kaluna langakeibmangiryi, Er Imtamnyi Uram ebmurubkwanung. Sal ara sun kisok kalubtingiryi molobting ura, sunci nun Du Yesus Kristus bira sal nang kisok atonyi bisi ina ngilikting. 5Ba, nerabwe ara, “Nun Nai Imtamnyi bisi molobkwayeb,” tenebingnyi kum, “Er Imtamnyi Uram ebmurubkwayeb,” tenebingnyi kum, sunci sun kisok kalubmangiryi, molobkwanung. Ati, sunci kisok kaluna langakeibmangiryi, molobingnyei. Tonda, sun kisok kaluna langakeibmangiryi, Er Imtamnyi Uram ebmurubingnyei. Nerabwe ara sun kisok kaluna langakeibtingiryi molobting ura, sunci sun akenyi yabwe ara nerabwe kisok ato nang asi ina ngilikting. Ara, sun kisok otong komdaraming nerabwe ara ina ngilikman dinyi kuboka sun damnyi komdaraming to, sun kisok kaluna langakeibmangiryi, moloramingnyi nerabwe ababyi neiktoto ina ngilikman dinyi kubting. 6Sun kisok kaluna kum nerabwe ara ina ngilikman dinyi kuraming ati ebman. Ato kun nerabwe ara, “Sal nang aryi kubde banung to milibtibyi,” teneraming ati, sun kisok otong ababyi kobdating se. Sun otong sekoka kobdangnyi nerabwe ton sun kisok kaluna kum nerabwe ababyi ara ina ngilingna dinyi kuraming ati, sunci sun kisok kalubkwanung ati ebman. 7Sal nang ara sun kisok kalubingyei. Sal nang ara Er Imtamnyi kurur to kisok ato nang kuraming deyok aryi, sunci sun kisok kalubingnyei. Tonda, sal nang ara, “Nunda Er Imtamnyi amwetam bunub,” tenen Er Imtamnyi mikib lak kibkwanung deyok aryi, sunci sun kisok kalubingyei. Ba, nerabwe ara, “Nunda nun akenyi yabwe amwetam bunub,” tenen sun akenyi yabwe mikib lak kibkwanung deyok aryi, sunci sun kisok kalubkwanung ato ebman. 8Er Imtamnyi biryi minob ura ninyi kikniamuryi, Erci ner asi minob kum kikniamwe. Tonda, ner ya cok aryi kuboka Erci sal kum kikniamwe. Eda, nun Nai biryi sal asi minob kiknibmou ura, Erci sal ya cok aryi kuboka ner kiknibmou. A deyok aryi, niryi, “Nerabwe ara sal nang mikib asi lak kibkwanung,” ebman. 9Ara, Er Imtamnyi biryi sal ab ner ab kiknibmouci, Erci, “Sal ara ner amwetam bunanyi kubdur,” tenen kum kiknibmou. Eda, Erci, “Ner ara sal amwetam bukwanung,” tenen sal ab ner ab kiknibmou. 10Ati, sun nerabwe ara sal amwetam buraming deyok aryi, sunci sun damnyi luknubdongobdangiryok, sun kisok kalubkwanung. Ara, sun nerabwe aryi, “Er Imtamnyi si weik eboka molobkwayeb,” tenebingyi kum, “Er Imtamnyi Uram ebmurubkwayeb,” tenebingnyi kum, sunci sun kisok kalubmangiryok, sun tenebmangnyi tok kunubkwanung. Tonda, sun nerabwe ara, “Er Imtamnyi Uram eryuryangan nang ina ngilikibyei,” tenen sun kisok kalubmangiryok, Er Imtamnyi si weik ebkwanung.
11Ba, nun Du Yesus biryi teleb tenesurur to, sun nerabwe ab sun sal nang ab ara yuk-yuk tingna kum kunung. Ara, sal kum kurante uca, ner ababyi kum kurante. Ba, nerabwe kum kuranting uca, sal ababyi kum kuranting ati ebman. 12Er Imtamnyi biryi ninyi kiknibmasou ba, Erci sal asi minob kiknibmou ura, sal ya cok aryi kuboka ner asi aminda kiknibmou. Ato ebman bok, sun sal nang yuk nang nirya ara sun kwin yabwe aryi deiriraming. Ara, yuma kobdob aryi sal ya cok aryi kuboka ner kiknibmou to, aminda ara nerabwe aryi kuboka sal deiriramnyi ani, ukuryok tuba deiriraming. A deyok aryi, niryi, “Sal ner ara yuk-yuk tingna kum kuraming,” ebmasin. Ba, a dinyi nirya kiknisururnyi bira nun Nai Imtamnyi tentok kurur. 13Ati, sunci sun kanya dam diboka tenebmunci wibdeibdarur. Nerabwe ara kisok kaluna kum uca Er Imtamnyi bisi molobting ara teleb dinyi do? Sunci, “Ato dinyi ara teleb do kum do?” tenen diboka lilibdate uca, sunci, “Ato kun dinyi ara teleb dinyi kuma,” eboka wibdeibdate ati ebmasin. 14Sun im dangna tukwe dangna nang nirya ara sun kanya dam yuk aryi ato tenen bingnub. “Sal nang ara sun kisok otong kum sekdatingnyi uca, cang otong borantingnyi ura, nerabwe ato kuranting. Ato kun dinyi ara alyi kimdeirin dinyi kurur.” Ninyi nirya ara a dinyi tenen bingnung. 15Ba, “Nerabwe ara cang otong boraming ara teleb dinyi kurur,” tenen ababyi ninyi nirya aryi bingnub. Er Imtamnyi biryi karebmou uca, otong cang dinyi ara nerabwe kisok kalun dinyi ato kurur. A deyok aryi, niryi, “Nerabwe ara cang otong boraming ara teleb dinyi kurur,” ebmasin. 16Ura, sun Korintus nang kankan asi ton nang aryi, “Ato kubde ban dinyi milina nun li,” eboka lulubdatingnyi ura, niryi sun ato kun nang asi ato ebmasin. “Nunda nun Du Yesus bisi wa irmilin nang nirya ara ato kubde ban dinyi miliramib. Tonda, nun Nai Imtamnyi biryi naboka bulubdeibsou nang ara dantam-dantam nirya buluramingnyi nang nirya ara ato kubde ban dinyi miliraming,” ebmasin.
“Nun Du Er tub ab ining ab yibde barandum ara ato-ato kuboka yibde barandarur,” eboka eterebmou uram
11:17-34
17Ni kwit yabwe. Niryi sunsi, “Ato-ato kubdarur,” en uram yuk-yuk ebtabakoka arukdeibkwinsin. Arukdeibkwinsin cok, niryi sunsi kisal dangsina uram ton kum ebtabakwinsin. Sunda dib tenen nang ara tonkwa bulurandum cok, sunci sun mamun asi teleb kum kurdeirirdarandum. Eda, sunci malyi kiminingdan dinyi akwe kimdeirirandum. A deyok aryi, niryi sunsi kisal dangsina uram kum ebtabakwinsin. 18Yuma kobdob ebkwinsin uram ara ato. Sunda dib tenen nang ara, “Er Imtamnyi si weik eboka molobkwayeb,” tenen neik dam buluryanmarum cok, sunci neik kanya bona kum uca buluryangarandum, se. Eda, sunci lulubdandoka yuk-yuk bongdarandum ati ni kekebmase. Ato eboka nukmasei uram kekebmasiryi, niryi, “Ton dinyi ara diba ati eboka nukmanei,” tenenun. Ba, “Yuk dinyi ara talyi ati eboka nukmanei darib,” tenenun. 19Nun Nai Imtamnyi biryi, “Ton nang ara dobdobkwan ba, yuk nang asi kum dobdobkwan ati lak kibdeibkwan,” tenesurur uca, sun Teleb Uram keken nang kankan ababyi ninyi yuk-yuk bongdaraming. Er Imtamnyi biryi, “Ninyi tenen dinyi ara yukto-yukto kurur ati lak kibdeibkwan,” tenesurur uca, ato kuboka yuk-yuk bongdana dinyi ara bisik sekmanto kum kurur ati ebman. 20Ura, sunci, “Nun Du Er tub ab ining ab yibkwayeb,” tenen buluryamunyi ura, sunci, “Nun Du biryi Erdamnyi karebdandoka nunsi lebdeibmasou,” tenen diboka kum teneirirandum. Ati, sunci nun Du Yesus Er tub ab ining ab diboka kum yirandum ati ebman. 21Sunci, “Yina yibtibyi se,” tenen talyi ati akwe yirandum ati ebman. Sunci, “Nunda dib tenen nang antaniboka nisintum yibkwayeb,” tenen kum yirandum. Eda, ton nang ara yuk nang asi dibde buna kum uca sun mining yina bobmarum asi minola yirsengnandum. Ba, yuk nang ara yin dinyi bona kum nang aminda aryi yamingnyi bok, yina tuba kum kubde ati, yina kum doyiraming. Ati, sunci nun Du Yesus Er tub ab ining ab diboka kum yirandum. Eda, ton nang aryi anggur du yung ilinto yibingnyi uca, walina taleraming ba, yuk nang ara roti kum yibingnyi ati kwaning atan tuba kurande. 22Sunda sun ai yuk-yuk tuba kurandumci, sun mining yina ur yibdarur. Ba, sun dib tenen nang yuk nang nirya ab tonkwa buluramunyi ba, yina talyi yibmunyei se. Eda, sunci sun dib tenen nang yuk nang ab tonkwa yibmunci, “Nun Du biryi nunsi lebdeibmasou,” tenebdarur. Talyi yibmunyi ura, sunci Er Imtamnyi biryi naboka bulubdeibsou nang asi ina ngilingnandum se. Ara, sunci talyi yibmunyi ura, sunci sun dib tenen nang kankan kuboka kwaning atan nang asi ina ngilingnandum se. Ati, niryi sunsi una ebkwansin do? Niryi sunsi kisal dakwansin do? Ato tenen kum.
23Ura, nun Du Yesus biryi nisi eterebmanou to, niryi ebmuruboka sunbabyi etereransise ani, ukuryok ababyi tamuboka eterebkwinsin. Ara, nun Du Yesus dibkwamwe uki tum berekmou kum bok, nun Du ab Er miliramnyi nang amolbaryi ab ai wekoka bulubmaici, yina tonkwa yibmai. Ara, lukunda kubmou ba, kikibkwamunyi biryi nun Du Yesus bisi kikibkwamwe bok, nun Du ab Er miliramnyi nang ab tonkwa kubmaici, yina yibmai. Yina yibkoi cok, nun Du biryi roti dobtalebmou. 24Roti dobtalebmouci, nun Du Yesus biryi Er Nai Imtamnyi bisi, “Ei, Ni Nai,” ebmou. Sirya ebmou ura, Erci a roti asi tobmouci, Er miliramnyi nang asi ato ebmou. “A roti ara Ni nong a kunum. Niryi Ni damnyi sunti karebdankwansin ati, sunci a roti asi doyibdobdarur,” ebmou. “Ati, aminda kubde binkwandum ababyi sunci Nisi teneibnumunci, roti asi toboka doyibde binkwandarur,” ebmou. 25Ura, roti sirya doyibmai ura, nun Du biryi neiktoto moyok dobtalebmouci, ato ebmou, “A moyok umbura aryi anggur du yung ara Ni ining a kunum. Niryi Ni ining sunti diksakwansin ati, sunci a anggur du yung asi doyibdarur,” ebmou. “Niryi sunti dibkwamasin biriman aryi Er Imtamnyi biryi sunsi mururdeirisin dinyi ukuryok dinyi karebkwansir,” ebmou. Ebmou cok, Erci, “A moyok biriman aryi Niryi antanirdeirin dinyi ukuryok dinyi kiklibdeiboka lak kibdeibmasin,” ebmou. Ati, Erci, “Sunci Nisi teneibnumunci, a moyok asi dobtaleboka yibde binkwandarur,” ebmou. 26Ati, sunci ato kuboka a roti ab anggur du yung ab yibde barandumci, sunci nun Du Yesus biti, “Nunti dibmasou,” tenen lak kibde binkwandum. Lak ebde baramunyi ani, nun Du Yesus tamuboka yankwande.
27Ati, unanyi-unaner ara nun Du Yesus bisi diboka kum teneibingiryok, roti ab anggur du yung ab talyi yiramingnyi ura, a nang ara nun Du Yesus Er nong ab Er ining ab ati, “Talyi dinyi aca,” tenen ina ngilingnamingiryi. 28Ati, nunci, “Nun Du bisi teneibkwayeb ati roti ab co du yung ab yibkwayeb,” tenebibiryi, nunci nun kanya asi kiknibdeiboka, “Nun Du bisi diboka teneinub do kum do?” tenebibiryi, yibkwanub. 29Unanyi-unaner ara nun Du Yesus bisi diboka kum teneibingiryi, roti ab co du yung talyi yiramingnyi nang ara wenen dinyi dobdobkwaming. A deyok aryi, nunci nun kanya asi kiknibdeibibiryi, yibkwanub ati ebman. 30Ni kwit yabwe. Sun kankan ninyi ilinto ara youn talerande. Tonda, ninyi ilinto ara mitang kuransir. Tonda, yuk nang ara sirya dibmang. A dinyi nirya ara wenesin dinyi kurur ati ebman. Ara, sunci nun Du Yesus bisi diboka kum teneirirandumci, roti ab co du yung ab talyi yirandum deyok aryi, wenesin dinyi sun dam yanmar uca, ninyi ilinto youn talerande ba, yuk nang sirya dibmang. 31Ba, sunci sun kanya asi kiknibdeiboka, “Nun Du bira nunti dibmasou ara diboka teneinub do kum do?” tenerdaramunyi uca, Er Imtamnyi biryi sunsi wenen dinyi kum karebkwansir. 32Er Imtamnyi bira nunda dib tenen nang asi wenen dinyi karebsici ababyi, Erci, “Sun malyi kurmurun nang asi iya wenen dinyi kareboka wenenun to wenebkwan,” tenen kum wenesurur. Eda, Erci, “Bitabdeibnyi uca, Ni uram kunubde biting,” tenen tiya wenen dinyi akwe karesurur.
33Ati, ni kwit yabwe dib tenen nang. Sunci, “Nun Du bisi teneibkwayeb ati roti ab co du yung ab yibkwayeb,” tenebmunyi uca, sunci sun kwit yabwe dib tenen nang dibde bukmunyi ura, antaniboka yibdarur. 34Ura, sun kankan asi ton nang ara kwaning atarante ura, a nang ara sun ai tuba kubingiryi, yibmangnyi ura, sunci sun dib tenen nang yuk nang kankan aryi yandoka nun Du Yesus Er tub ab ining ab tonkwa yibkwanung. Ati, sunci, “Nun Du Er tub ab ining ab talyi yibtibyi uca, Er Imtamnyi biryi nunda bulubmab nang wenebsicei,” tenen ato kubdarur.
Ura, ni Paulus sun dam sirya yanmanyi ura, niryi, “Ato-ato kubdarur,” eboka ebtabakwansin.
Currently Selected:
1Korintus Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
