Filipiko 1
1
Kelukeshü
1Khrista Jisu kituo chüketuo, Paul mu Timothi unie kinu: Khapie Khrista Jisu nu ketuo Filipi nu keba kemesako pete, tsiu kehou kepfheko mu dikonko ki keshü:
2Ukepenuopfü u Puou mu Niepuu Jisu Khrista kinu ngukemezhie mu noune bu nie ze baliecie.
Paul Filipiko la Chakecü
3A nieko rükrakelie metsei Ukepenuopfü thezie sei baya, 4nieko pete la a kecha metsei a nei siei di chaya, 5tse nunu vor tsie ketso dieliekevi mhatho nu nieko kekhoya tha zocü la. 6Siro nie donu mhatho kevi chü sedekeshüu chü zo tha Jisu Khrista zha nhie tseishütuo ücü a pele tou ba. 7A nieko dze sükemhie di lekecü puotou zo, kekreilamonyü nieko a nou ki tuo zo, nieko a kedie kechü ki rei tsiu dieliekeviu rüguokecü mu zhapu kechü pete nu nieko a ze kere di Ukepenuopfü kinu kevor ngukemezhieu kezakecümia phrecü la. 8Siro a Khrista Jisu kekhrieu se kiderei nieko pete menguya shi, Ukepenuopfü thuo a zhapu chülie vi. 9Siro a kechau sü mhasi mu mha pete le kho kekreikelie geinu nieko kekhrieu bu krakechü miemielie, 10di nieko bu mha kevitho-u si toulie, siro mesa mu pejolie kelhomia chü ba di Khrista zhau tsolieketuo, 11tsiu Jisu Khrista geinu voryakezha kemiatho siu bu nie tshulie di Ukepenuopfü bu thetshe mu zayie chülieketuou zo.
Khrista la Rhei Ketuo Zo
12A khrieko, hadzü a gei mhachüketako geinu dieliekeviu pu keyie pevi salie zo ükecü nieko bu silie nyü, 13sügeinu kedikiu kepfheko#1:13 Gk Kedikiu pete. tsiu kekreimia pete rei kedie kechü hau Khrista lanu zo ükecü si kemecie tsuoilieta zo; 14siro kedie kechü hau la u zemia kro puo bu Niepuu nu meteikuolie di thepfukuo mu michie mo di Ukepenuopfü dieu pulieta zo.
15Themia huo mia ngu u ro mu mia petsoukecü nou se Khrista pu petha tuoya, derei kekreiko we u noule kemezhü nunu siya. 16Themia hakoe kekhrie nunu Khrista pu pethaya, mu ukoe a dieliekeviu yapiekezha la a khapie hanu shükewa si ba; 17kekreiko we u thuo u zhazhü le di Khrista pu pethaya, u nou u tho chü di monyü a kedie chü keba mhonu a nou chü kemezhie sashütuo ükecü medoya. 18Süu kedipuo mu? Puo thuo kehoupuo zho nu rei, ketho nu rei puo meviva rei Khristau pu pethalieta zo, mu süu la a nei zo.
Uzo, mu a nei tuo zotuo, 19nieko kecha la mu Jisu Khrista Ruopfüu khruohikeshü geinu hau a shüphralieketuo puo ükecü a si baketa la. 20A merü mu mengu kebau sü a mhakipuorei thenga chütalie lho, derei rhei rei sia rei hadzü tuoi tsie rei thepfu se di Khrista bu a mo hau geinu zayie chü petuo zotuo. 21Kekreilamonyü a we rhei tuo rei Khrista la zo mu siatatuo rei mevikuocü zo. 22A bu chüüphou hau nu lhou za sa phituo üro süuwe a la puo si nguketuo mhatho chü saketuo zo; mu a kiu kedatie shi a si mote. 23A teshükecü kenie donu thate: a tuota di vo Khrista ze baketa mengu, süue vikuo zo; 24derei nieko la chüümo nu ba sa morosuokuo. 25Süla süu morosuo toukecü la, a nieko ze ba di nieko bu kepele nu vikehielie mu nieko neilieketuo a si bata zo, 26sidi nieko ki la kevor ki a bu rei nie Khrista Jisu geinu nie nei phalie kelho chü kebau nu nieko ze a neilieketuo la.
27Nie kelhou zho bu Khrista dieliekeviu ze kevazhü di lhou zolie, sidi a bu vor nieko ngu shierei morei vor mo di nie dze kesi zota rei, nieko ruopfü nu keze puo chü tsiu nie kele rei puo chü di nie rhiechü dieliekevi kepeleu whuo vokezhü a bu sicie, 28siro mhapuo nu rei nie kepetsoumia bu nie kedewa hie. Süko la we hauha uko pekawaketuo zasi zo, derei nie la we kelakelie zasi puo. Mu hauha Ukepenuopfü mhatho zo. 29Kekreilamonyü puoe nie ngumezhie di nie bu Khrista pelekelie rübei monyü puo la kemezhie reilie kevi kekuo kha nie tsüwate, 30nieko rei a thiedzü keperhie ketuo kenguu mu tsie rei a si zhü zokecü si kebau nu mia ze keperhie tuota zeru.
Currently Selected:
Filipiko 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More