Capiko 1
1
Juda mu Simeon Seyieko Adoni-bezek Tekelie
1Joshua siaketa sie, Israelkoe Jihova ketso di, “Hieko la supuonie rie kho di Kananko ze kegeituo ga?” 2Sitse Jihovae, “Judae themiako bu khotuo. Ae kijüu khapie uko dzie nu shüwate,” si. 3Sitse Juda puo dzürieu Simeon ki, “A ya chükeshü kijü nu khor di a ze Kananko ze kegeicie, silie ro hie rei sütuoi nie tsükeshü rüvietsa khorshütuo,” sishü. Süla Simeon puo ze kho. 4Siro Judae kho ru Jihovae Kananko tsiu Perizko khapie uko dzie nu shü; mu ukoe Bezek nunu mia nyie ker geiwa. 5Siro ukoe Bezek nu Adoni-bezek ngulie di puo ze kegei, tsiu ukoe Kananko mu Perizko biewa. 6Adoni-bezek-e tata; derei ukoe puo whuo vo di puo telie, di puo dziekrünie mu puo phikrünie dawa. 7Siro Adoni-bezek-e sie, “U dziekrü mu u phikrü dakewa kedi hiethenie a mizhü khronu khutie pacü vor; tsie we ae chükeshü tuoi Kepenuopfüe a gei chü lashüte,” isi. Ukoe puo ze Jerusalem nu vor, mu puoe sünunu siata.
Juda Yiekoe Jerusalem nu Hebron Penyükelie
8Siro Juda themiakoe Jerusalem whuo di süu lielie. Ukoe zhiecha pie süu biewa mu mi pie nadiu thewa. 9Süsie Juda themiakoe kijüthou rüna nu lhou keba Kananko, Negebko mu niakratsa kijüthou phi nu kebako ze kegeituoü tsu. 10Judae Hebron nu keba Kananmiako ze kegei (thiedzü Hebron za Kiriat-arba); sidi ukoe Sheshai, Ahiman mu Talmai penyüwa.
Othniel-e Debir Nadiu Penyükewa
11Sünunu Juda themiako vo Debir nadiu whuo, (Thiedzü Debir za Kiriat-sefer isiya), 12siro Kaleb-e sie, “Kehoupuorei Kiriat-sefer whuo di liekelieu a a nuopfü Aksa pie puo ki penyishütuo.” 13Sitse Kaleb siezeu Kenaz nuou Othniel-e süu lielie; süla Kaleb-e puo nuopfü Aksa khapie puo ki penyishü. 14Sitse puoe khunhie Othniel ki vor di puo puou ki lie puo chalienu di pu beilie; ru puoe puo gada geinu kerlie tse, Kaleb-e puo ketso di, “No kedipuo menguya ga?” 15Sitse puo sie, “Mhapuo pie a tsücie, no Negeb nu kijü keso huo kha a tsüshüte, derei Gulot-mayim#1:15 Süu Dzü Kenyiko. sa pie a tsücie.” Sitse Kaleb-e Gulot Peso-u mu Pekhro-u pie puo tsüshü.
Juda mu Benjamin Yieko Kuokelie
16Siro Mosa meiu Ken nuosenuoyieko, Juda themiako ze di kukuobo kelhou nadiu nunu Negeb nu keba Arad khieki Juda rayha nu kholie. Süsie uko vo Amalekko ze balie. 17Siro Judamiako uko dzürieu Simeon themiako ze vo Zefat nu keba Kananmiako dukhriwa tsiu rünau peka lotsowa. Süla nadi süu üse Horma idi kieta. 18Siro Juda themiakoe Gaza, Ashkelon, Ekron mu uko rüvieko sa lielie. 19Siro Jihovae Juda themiako ze tuo zo; mu ukoe kijüthou rünako lie phrelie, derei uko thezha nu keba themiako whuolie kenjüta, kekreilamonyü ukoe thegi bagei nyikecü la. 20Mosae pukeshü tuoi, Hebron pie Kaleb tsüwa, mu puoe sünunu Anak nuo thepfu seko whuowa. 21Derei Benjamin themiako we Jerusalem nu keba Jebusko whuowa mo, süla Jebusko thie ketso rei Jerusalem nu Benjaminko ze lhou tuota.
Josef Kinuko Bethel Penyükelie
22Josef kinuko rei kho Bethel whuo; mu Jihovae uko ze tuolie. 23Josef kinukoe mia huo ketseshü di Bethel rie (thiedzü we nadiu za Luz iya.) 24Sitse mha riekevokoe mia puo nadiu nunu parkezhü ngulie, ru ukoe puo ki, “N pezie rei nadiu nu lelieketuo chau thashü hieko kiecie, siro hieko n ngumezhieshütuo,” sishü. 25Süla puoe chau thapie uko kieshü; sitse le di nadiu nu themiako pete biewa; sirei themiau mu puo kinuko pete we kelashü di uko bu tuota. 26Sitse themiau Hitko kijü nu vo di rüna nadi puo chülie; sidi süu za pie Luz idi kielie, thie ketso rei theza süu kieya.
Manasseh mu Efraim Rüvieko
27Siro Manasseh yieko Bet-shian, Tanak, Dor, Ibliam, Megido rüna hako mu uko natseko nu lhou keba themiako whuowa mo sidi Kanankoe rüna hako nu lhou bata. 28Mu Israelkoe kuo sierlie tse, uko Kananko kemvü chü di uko bu mhachü, derei uko whuowa mo.
29Efraim yieko rei Gezer nu keba Kananko whuowa mo; sidi Kananmia Gezer nu uko donu lhou tuota.
Seyie Kekreiko Rüvie
30Zebulun yieko rei Kitron nu kelhouko morei Nahalol nu kelhou Kananko whuowa mo; derei uko kemvü chü uko bu mhachü.
31Asher yiemiako rei Ako, morei Sidon, morei Ahlab, morei Akzib, morei Helba, morei Afik mu Rehob nu kelhou Kananko whuowa mo; 32derei Asher themiako Kananmia khenu kelhouko donu balie, ukoe uko whuowa kemo la.
33Naftali themiako rei Bet-shemesh mu Bet-anat nu kelhou Kananko whuowa mo, derei Kananmia khenuko donu balie, di uko kemvü chü uko bu mhachü.
34Siro Amorkoe Danko whuo lapie kijüthou rüna nu shüwa, di ukoe uko bu razha nu tsur mvüta. 35Amorkoe Har-heres nu, siro Aijalon nu mu Shalbim nu rüdi mo balie, derei Josef kinuko kuo sierlie tse, uko kemvü chüpie uko bu mhachü. 36Amorko rieu ro Akrabim nu kekho chau, Sela nunu sede di sümho kho.
Currently Selected:
Capiko 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More