Toukepra 1
1
Israelmiako Ijipt nu Kemezhiekecü
1Hako Israel nuo thepfuko Jakob ze Ijipt nu ketsurko za, u kikru u thetse sa: 2Reuben, Simeon, Levi mu Juda, 3Isakar, Zebulun mu Benjamin, 4Dan mu Naftali, Gad mu Asher. 5Jakob nuosenuoyie pete kesa mia hiethenie. Josef we uko mhodzü Ijipt nu tuota. 6Süsie Josef siata, puo siezedzürieko rei mu phou süu pete rei. 7Derei Israel nuosenuoyie we kruo philie mu zha philie; uko kra philie di kuo phita; sidi uko lhou kijü süu tshuta.
8Sükisü Ijipt mho kedi kesa Josef si kemo puo sier. 9Mu puoe puo themiako ki pu di sie, “Harie, Israelko ha u ki krathor mu kuothorte. 10Vorlie, úko uko gei u do vilie khe, uko kra philieta rei si momu, sidi terhü puo vor ro, uko u ngumvümia zeta di u perhie phir di u rüna nunu tata rei si momu.” 11Sidi thepie kemesi khapie uko gei shü di uko bu kemezhieketuo la uko mhatho niepuko khapie bawa, sidi uko Faro la mha khapie baketuo nadinie Pithom mu Ramese chü. 12Derei uko pese kra mu uko kruo miemieta mu uko kezapie meya miemie prata. Süla Ijiptmiakoe Israelmiako la merie bata. 13Ijiptmiae Israelko bu mhatho kere chü, 14mu uko bu nyorietsie chü tsiu lie nu mhatho neiüko chü di lhou kemezhie phita, tsiu mhatho pete nu uko bu mhatho keretho chü.
15Siro Ijipt nu kediue Ibrimia nuoze kethekepfünie, miapfü puo za Shifra mu kekreipfü za Pua, ki pu di sie, 16“Nnie Ibripfüko nuoze thekecü ki, nuokezechü nunu uko mehoshü di, thepfunuomiata ro puo dukhriwalie, derei thenunuomiata ro, perheishülie.” 17Derei nuoze kethekepfünie Ukepenuopfü khrüprei, süla Ijipt nu kediu unie ki diekhakeshü mhiei chü mo, sidi thepfunuoko rei perheishüshüta. 18Süla Ijipt nu kediu nuoze kethekepfünie kielie di unie ki, “Nnie thepfunuoko bu rei rheilie keba hau kedipuo chü bata ga?” 19Sitse nuoze kethekenie-e Faro ki, “Kekreilamonyü Ibrimiapfü sü Ijiptmiapfü mhie mo, ukoe mecamekhrocü la nuoze kethekemia kevor mhodzü unuo zelietaya.” 20Süla Ukepenuopfüe nuoze kethekenie gei vishü, sidi themiako kruolie mu kuo philie. 21Siro nuoze kethekenie Ukepenuopfü preicü la, puoe unie bu unie kikru nyilie. 22Süsie Faro puo themia peteko ki diekhashü, “Ibrimia thepfunuomia penuokelie pete kelhoupie Nail rüu nu shüwalie, derei thenunuomia we pete perheishülie.”
Currently Selected:
Toukepra 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More