Mathi 1
ANGAMIBSI

Mathi 1

1
Jisu Khrista Pfutsanuoko
(Luk 3:23-38)
1Abraham nuo David, David nuo Jisu Khrista pfutsanuoko za keru leshü.
2Abraham nuo Isak, Isak nuo Jakob, Jakob nuo Juda mu puo siezedzürieko, 3mu Tamarpfü geinu Juda nuo Perez mu Zera unie penuolie; siro Perez nuo Hezron, mu Hezron nuo Aram. 4Siro Aram nuo Aminadab, mu Aminadab nuo Nahshon, tsiu Nahshon nuo Salmon. 5Siro Rahabpfü geinu Salmon nuo Boaz penuolie, mu Ruthpfü geinu Boaz nuo Obed penuolie, siro Obed nuo Jese, 6mu Jese nuo Kediu David.
Siro Uria kimiapfü geinu David nuo Solomon penuolie, 7mu Solomon nuo Rehoboam mu Rehoboam nuo Abija; tsiu Abija nuo Asaf#1:7 Leshü Kewe keviko nu Asa iya., 8mu Asaf nuo Jehoshafat, siro Jehoshafat nuo Joram, mu Joram nuo Uzia, 9mu Uzia nuo Jotham, mu Jotham nuo Ahaz, siro Ahaz nuo Hezekia. 10Siro Hezekia nuo Manasseh mu Manasseh nuo Amos#1:10 Leshü Kewe keviko nu Amon iya. tsiu Amon nuo Josia, 11Siro uko te ze Babilon nu kevo mese ki Josia nuo Jekonia mu puo siezedzürieko penuolie.
12Siro uko te ze Babilon nu voketa sienu Jekonia nuo Salathiel penuolie, siro Salathiel nuo Zerubabel, 13mu Zerubabel nuo Abiud, mu Abiud nuo Eliakim, siro Eliakim nuo Azor. 14Azor nuo Zadok mu Zadok nuo Akim, siro Akim nuo Eliud, 15mu Eliud nuo Eliazar mu Eliazar nuo Mathan, siro Mathan nuo Jakob, 16mu Jakob nuo Maria nupfu Josef penuolie, mu Mariapfü geinu Jisu Khrista ükecüu penuolie.
17Süla Abraham nunu vo David ketso phou keredia, mu David nunu vo uko te ze Babilon nu kevo ketso phou keredia, mu sünu nu vo Khrista penuokelie ketso phou keredia.
Jisu Khrista Kepenuo
(Luk 2:1-7)
18Siro Jisu Khrista penuokecü hamhie. Puo zuo Maria bu Josef ze kerituoü kevakhase tuota, derei unie thenuthepfu chü lhouketa mhodzü süpfüe Kemesa Ruopfü geinu nuonipfü tuoketa silie. 19Siro puo nupfu Josef miathomia puo zocü la mechü mhodzü puo bu thetha pfü nyü mo di pekhre puo khawa nyüta. 20Sidi puo mha hau lekeba nu, puo mho geinu Niepu-u dieliemia puo puo ki vor di sie, “David nuo Josef, no Maria liepie n kimia chü michie hiecie, puo nuo lhoupfü kebayo Kemesa Ruopfü geinu zokecü la. 21Puo thepfunuomia puo penuolietuo, mu no puo za thopie Jisu chüliecie, kekreilamonyü puo puo themiako kephouma nunu uko kelalie zotuocü la” sita. 22Mha hako pete chüketa thiedzü Niepu-ue siedzekesiu geinu pupiekezhüu chü tseilieketuo la zo.
23“Harie, rüü phousepfü nuonipfülie di thepfunuomia puo penuolietuo,
mu uko puo za thopie Immanuel chütuo,”
mu Immanuel ca, “Ukepenuopfü u ze bate” isi. 24Süsie Josef cosierlie tse Niepuu dielieu puo ki pukeshü tuoi, süpfü liepie puo kimia chülie, 25derei puo puo nuoyo#1:25 Leshü Kewe keviko nu puo nuo nuorieu iya. penuolie kemochie puo kimia si mo; süsie nu unuoyo za pie Jisu chülie.

Angami Naga C.L. Bible © Bible Society of India, 2009. Used by permission. All rights reserved worldwide.

Learn More About KETHOLESHU (BSI)