Johan 3
3
Jisu mu Nikodema
1Farisimia Nikodema ükecü puo tuo, puoe Judamia krüta chüya. 2Puo theva ze Jisu ki vor di puo ki, “Kepethau, no ha Ukepenuopfü kinu kevor kepethamia puo ükecü hie si ba; Ukepenuopfü u ze tuo kemosie miapuorei noe chükeshü zasi hako chülie kenjü zocü la.” 3Jisu sie puo ki, “A n ki pu toushütuo, penuo kesa la kemosie miapuorei Ukepenuopfü kedi ngukelie jü.” 4Nikodema sie puo ki, “Kimhiei di phichüketa ze mia puoe penuo lalietuo mu? Puo puo zuo va nu la le di penuolie vi me?” 5Jisu sie, “A n ki pu toushütuo, dzü mu Ruopfü nunu penuo la kemosie miapuorei Ukepenuopfü kedi nu lekelie jü zo. 6Chüüphou nunu penuokelie sü chüüphou zo, mu Ruopfü nunu penuokelie sü ruopfü zo. 7A n ki ‘No penuo kesa la morosuo bei’ ikeshü la n ngo hiecie. 8Tei rükhriese#3:8 Grik nu Teikhrie mu ruopfü icünie la die puo zo. puo thuo puo neira voya; no süu pfhe siya, derei no süu kirapuo nu vor shi morei kirapuo votaya shicü siya mo. Süla kehoupuorei Ruopfü nunu kepenuo rei sümhie zo.” 9Nikodema sie puo ki, “Kimhiei di silietuo mu?” 10Jisu sie puo ki, “No Israelmia kepetha puo chü tuo di mha hako si mo le?
11“A n ki pu toushütuo, hie si kebau puya mu hie kenguu dze zhapu chüya; sirei nieko miapuorei hie zhapuu lielieya mo. 12A kijüu dzeko kepu thuo rei nie pele moliro, kimhie di a teigei dzeko pu ro pelelietuo ga? 13Themia Nuou, teigei nu keker-u zo kemosie miapuorei teigei sie chie mo. 14Thiedzü Mosae rayha nunu tinyhü pie kesie tuoi, Themia Nuou rei mia bu puo piesie morosuo, 15süu geinu puo pelekelie kehoupuorei kechachie kerhei ngulieketuo la.
16“Siro Ukepenuopfü kijüu khriethor zo di puo Nuo pfuliu khashü zo, kekreilamonyü themia kehoupuorei puo pelekelieu kaüjüta mo di kechachie kerhei ngulieketuo la.
17“Siro kijüu bu jotatuo üdi Ukepenuopfü puo Nuo ketsepie kijü nu shü monyü, kijüu bu puo la kelakelie ngulieketuo la zo. 18Puo pelekeliemia pejolie lho; derei pelekemomia tsie rei pejopie bata zo, ue Ukepenuopfü Nuo pfuliu za nunu pelelie moketa la. 19Siro kepejo die süu, kezieu kijü nu vor, derei themiako kezieu ki rei kezeiu khriekuota, uko mhatho mezhü moketa la. 20Kehoupuorei mha kesuo chüyakezhamia kezieu ngumecüya, ue u mhatho kesuo kechüu thashü mia kie moketuo la. 21Derei ketho chüyakezha kehoupuorei u mhathoko Ukepenuopfü la chülie zo ücü pie pekieshüketuo la kezieu ki vorya.”
Johan Jisu Zhapu Kechü
22Süsie Jisu mu puoe pethakelieko tuose Judia kijü nu vor mu puoe uko ze sünu ba di mia dzülu khashü. 23Johan rei Salim kepenuoki Ainon nu dzü ba phikecü la dzülu khashü mia tsü ba; mu themiako puo ki vor di dzülupfülieya. 24Süki Johan tepie kedie chüwa moluo.
25Siro Johan-e pethakeliekoe Judamia puo ze u chü kemesakecü dze kepu tha. 26Süla uko Johan ki vor di puo ki, “Kepethau, mia puo Jordan rü khie niathutsa nu n ze ketuou, no puo zhapukechüu, harie, süu mia dzülu khashü tuote mu themia pete puo ki votazhie.” 27Sitse Johan sie, “Teigei nu khashü puo tsü kemosie miapuorei mhapuorei ngulie kenjü. 28‘A Khristau mo, derei puo mhodzü a ketsekeshü zo,’ isi di a hadzü pukeshü nieko thuo zorei a zhapu ba zo. 29Yasapfü sü Yasau vie zo. Yasau zeu tha di puo pfhe rünyü di puo pfhe sikeshü la puo nei phi thaya. Süla a kenei süu tseiliete. 30Puo zha miemieta morosuo derei a we cü miemieta morosuo.”#3:30 Mia huo Johan die pu hau khuso 36 ketso ücü leya.
Teigei nu Kevor-u
31Peso geinu kevor-u peteko mho zo, kijü nunu kepar-u kijüu vie zo, mu kijüu die puya, teigei nu kevor-u peteko mho-u zo. 32Puoe puo kesikenguko puya, derei miapuorei puo zhapu die lielie mo. 33Sirei kehoupuorei puo zhapu die liekelieu Ukepenuopfü ketho pu zo ükecü zasi vüpfülietaya. 34Ukepenuopfüe ketsekeshüu Ukepenuopfü die puya, puoe mejü mo zo di Ruopfüu khashüyakecü la. 35Puoue Nuou khrieya mu mha pete khapie puo tsüwate. 36Kehoupuorei Nuou pelekelieu kechachie kerhei bate, kehoupuorei Nuou die ze kemo-u kerhei ngu lho, derei Kepenuopfü noupfhüu puo gei bataya.
Currently Selected:
Johan 3: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More