Johan 11
11
Lazar Se
1Mia puo za Lazar ükezhau Bethani nu lhou ru mhachülieta, hau Maria mu puo dzüriepfü Martha unie rünau. 2Maria hau tier kethengu pie Niepuu kenhe di puo tha pie puo phi sükeshüpfü; mu puo prüu Lazar mhachü zhü. 3Süla puo üpfünie dieyie ketsepie Jisu ki shü di, “Niepuu, no puo khrieyakezhau mhachüzhüte,” sishü. 4Jisu die hau sikelie ki sie “Kechü hau kesiashie monyü Ukepenuopfü zayie mu sü geinu Ukepenuopfü Nuou bu zayie chülieketuo la zo,” sita. 5Jisue Martha mu puo siezepfü tsiu Lazar uko khrie vor zo, 6siürei puo Lazar mhachü zhüketa dielieu sikelie sie rei zha kenie puo kebachüu nu ba sata.
7Süsienu puoe pethakelieko ki, “Úko Judia nu la vo khe,” sita. 8Sitse puoe pethakelieko sie, “Rabi, tsiedo kinu Judako sünunu ketsie pie n vatuoü sie ze, mu no sünu la votuo le?” 9Jisu sie, “Khunhie bavüdo kerekenie teiso baya mo üme? Süla khinhie gei tuoyakezhamia u phi mesüya mo, ue kijü kezieu nguyakezha la. 10Derei teizei nu tuoyakezhamia u phi mesüwaya, kezieu uko nou tuo kemo la.” 11Mha hako pukewa sie, puo uko ki, “Úko zeu Lazar zezhüte, derei a vo puo kesou lashütuo.” 12Sitse pethakelieko sie “Niepuu, puo zekezhü zo liro puo mhapuoreita lho,” sita. 13Jisu puo siaketa dze pu zo, derei ukoe puo zekezhü dze pu ükecü leta. 14Süla Jisu mezhükhro uko ki, “Lazar siate, 15mu nieko la a sünu ba mokecü a nei, nieko bu pelelieketuo la. Derei úko puo ki vo khe.” 16Sitse Thoma, Nuobi#11:16 Gk Didymus. ükezhau sie puo zeko ki, “Úko rei vo khe, puo ze sünu siashüketuo la.”
Jisu Rheilakesieu mu Kerheiu
17Siro Jisu vorlie tse, Lazar#11:17 Gk Puo. khrukewa zha diata ükecü silie. 18Bethani-e Jerusalem kepenuoki maildo kenie meseki ba, 19mu Judako kekra Martha mu Marianie prüu la unie nou thupeluotuoü vor ba. 20Siro Marthae Jisu vorkezhü sishü tse vo puo ze kese, derei Maria kinu ba zo. 21Sitse Martha sie Jisu ki, “Niepuu, no haki ba ro a prüu siatalie lhomu ru! 22Derei tsie zorei no Ukepenuopfü ki mhakehoupuo cha rei puo khashü zoketuo a si ba.” 23Jisu puo ki, “N prüu la sielietuo.” 24Martha puo ki, “U, thelanhie rheilakesieu nu puo rei rhei la sielieketuo a si ba.” 25Jisu puo ki, “A rheilakesieu mu kerheiu zo; kehoupuorei a pelekelieu siata zorei rhei lalie zotuo, 26mu kehoupuorei rhei keba nu a pelekelieu mhakipuorei siatalie lho. No hau pele zo mo?” 27Sitse hapfü sie puo ki, “U, Niepuu, no Khristau, Ukepenuopfü Nuou kijü nu vorketuou ükecü a pele tou zo.”
Jisu Krata
28Martha hau pukeshü sie la le puo siezepfü Maria noupu di puo ki, “Kepethau vorte mu puo n kie tha ho,” sishü. 29Mu puo süu sishü tse rükri puo ki vo. 30Süki Jisu rünau nu ler moluo, mu Martha ze kesekecü chüu nu tha zoluo. 31Puo kinu ba di puo nou thupeluo keba Judakoe Maria rükri sie tuoketa ngu. Sitse uko rei puo siemedzi vo, ukoe puo tuo mekhruchüu nu vo di kratuo üzhü nhiecü le. 32Maria vo Jisu chüu tsolie di puo ngulie tse tsu puo mhodzünu khoutoulie di sie, “Niepuu, no haki ba üro a prüu siatalie lhomu ru!” 33Siro Jisue Maria mu puo ze ketuo Judako kra ketuo ngushü di puo nou chütei vorta mu puo nou suothorta. 34Sidi puo sie, “Nieko puo pie kirapuo zhü ga?” Uko sie puo ki, “Niepuu, vor di mehocie,” sishü ru 35Jisu krata. 36Süla Judako sie, “Lere-i, puo kedipfü puo khrie vor shi ha!” si. 37Derei huomia sie, “Mhicieu mhi chü pevikeshüu, kesia nunu themia hau rei chü perhei lashü lho üme?” sita.
Lazar Chü Perheikelie
38Süsie Jisu puo nousuo phi di mekhru ki vor. Süu kecieki puo mu ketsie pie mekapie ba. 39Jisu sie, “Ketsieu phouwacie!” Sitse siaketau üpfü Martha sie, “Niepuu, puo menazhütatie, puo siaketa zha diate eru!” 40Sitse Jisu puo ki, “A n ki no pele liro, no Ukepenuopfü zayie ngutuo, ishü mo üme?” 41Süla uko ketsieu phouwa. Tsiu Jisu tosie di, “A puo, no a kecha rünyülieketa la a n thezieya. 42No a pfhe rünyü seiyakecü ae si, derei haki ketha krodiu bu noe a ketsekeshü pelelieketuo la a hau kepu zo.” 43Puo hau pushü di shie puo rhiechü di sie, “Lazar, parlie.” 44Sitse siaketau puo phi puo dzieko pfhe se kezipfü mu pfhe yopuo se puo zie kezipfü, di par thata. Jisu sie uko ki, “Puo phreishü di puo bu tuolie,” sishü.
Jisu gei Ngumvü do Rhükecü
(Mat 26:1-5; Mark 14:1-2; Luk 22:1-2)
45Süla Maria ze kevor Judamia kekra Jisue kedipuo chüshü shicü ngu, di puo pelelie. 46Derei süko huo Farisiko ki vo di Jisue kedipuo chüshü shicü pushü. 47Süla zievokezhako mu Farisiko vo mechükehouu kieshü di sie, “Úko kedipuo chü ro vi ta? Themia hau zasi kekra chüshü baketa la. 48We puo bu hi zo vo liro themia pete puo peletatie, mu Rommia vor rüsuokiu mu u seyie pekawatie,” sita. 49Derei uko donu Kaifa, sücie zievokezhatho chü kebau, sie, “Nieko mhale mo pie kizo ga? 50U themia pete pekakewau ki mia puo bu siaketawe vikuoketuo nieko le mo me?” 51Derei puo hau kepu puo thuo puo geinu monyü, sücie zievokezhatho chü keba ki ze Jisu bu seyieu la siashüketuo siedzedie pukeshü zo. 52Mu seyieu la rübei zomonyü cüre tuoketa Ukepenuopfü nuonuoko ze vor puo chülieketuo la. 53Süla sünhie yawinu uko puo dukhriwaketuo rhü tuota.
54Süla Jisue Judako donu mia mhingu chü sa mo di vo rayha kepenuoki Efraim ükecü rünau nu pethakelieko ze di sünu bata.
55Süki Judako Ciekevonyiu penuota, mu themia kekra thenyiu mhodzü u chü kemesaketuo la rüna nunu tuo Jerusalem nu vota. 56Sitse uko vo rüsuoki nu tha, mu Jisu pfhü di huoniehuo ki, “Nie kedipuo le ga? Puo thenyi nu vor lho zo die mu?” 57Sidi zievokezhako mu Farisiko Jisu telieketuo la puo kirapuo ba shi puo dze kesimia kehoupuo bu rei süu se uko ki punuta.
Currently Selected:
Johan 11: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More