Johan Kenieu 1
1
Kelukeshü
1Phichüu kinu thupie kedakeliepfü mu puo nuonuoko, ae ketho-u nunu khrieyakezhako ki shüya, mu a rübei zomonyü, ketho-u siyakezha pete rei nieko khrieya; 2kekreilamonyü ketho-u u nou baya mu kechachie u ze tuo zotuocü la.
3Ukepenuopfü u Puou mu Puou Nuo, Jisu Khrista bu theja, ngukemezhie mu noune khapie u tsü di ketho tsiu kekhrie nunu u ze baliecie.
Ketho mu Kekhrie
4N nuonuoko huomia ketho-u nunu u Puou u bu chülienukeshü mhiei tuoyakezha dze sikeshü ki kide a nei shi! 5Siro tsie we, kekhrie thenupfü, a n ki chaya, a thupie n ki shüzhükecü hau diekhakeshü kesa puorei mo, derei we sietsenu ngulieketa u bu huoniehuo khrielienukecüu zo. 6Siro kekhrie, puoca we puo diekhakeshüko nu tuokelie; sietse nu diekhakeshü silieketau sü hau zo, nie sünu tuoliecie.
7Mia setuoyakezha kekra par kijüu nu tuote, süko Jisu Khrista üse chüüphou chüpfü di lhoukecü phraya mo; themia sikecümia sü miakesemia mu Khrista ngumvümia zo. 8Tseiphrei balie, silie ro we mhatho chülieketako pejüwalie lho, derei süko la nie zhakhra ngu tseilietuo. 9Kehoupuorei Khrista kepetha dieu nu balie mo di keyie votayakezhamia Ukepenuopfü vie mo; kehoupuorei kepetha dieu nu bayakezhamia Puou mu Nuou nyite. 10Huomianie kepethadie hau se mo di nieko ki vorya ro, puo ze nie ki nu vo hie morei puo kelu rei hie, 11themia sikecümia keluyakezhamia puo mhatho kesuo kechüko ze puo chüta zo.
Thekhadie
12A mha kekra n ki thushüketuo ba zo ürei, a leshü mu kethudzü zomonyü a thuo n ki vor di mhotsou n ze kerüchükecü le ba, sidi u kenei bu tseilieketuo la.
13Kedakelie n siezepfü nuonuoko n kelushü ho.#1:13 Leshü kewe huo nu Amen icü sa.
Currently Selected:
Johan Kenieu 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More