Korintmiako Kerieu 1
1
1Paul, Ukepenuopfü medo nu, Khrista Jisu apostel chütuoü kielieketau, mu u siezeu Sosthene unie-e,
2Thupie Korint nu Ukepenuopfü kehouu, Khrista Jisu lanu chü kemesalieketa mu kemesako üdi kielieketako, tsiu kehourapuorei hie mu uko Niepuu üdi, u Niepuu Jisu Khrista za kielieketa peteko ki keshü:
3Ukepenuopfü u Puo mu Niepuu Jisu Khrista ngukemezhie mu noune bu nieko ze baliecie.
4A nieko la kethezie pie a Kepenuopfü tsü seiya, kekreilamonyü Ukepenuopfü ngukemezhie süu Khrista Jisu geinu pie nie tsü, 5puo geinu mha peteko nu, nie dieko nu mu mhasi pete nu rei nyilieketa la. 6Süusü Khrista zhapuu nieko donu ba chüsechüketa tuoi, 7nie u Niepu Jisu Khrista bu mia mhingu chüshüketuo pfhe keba ki ze mhaphruo kehoupuo nu rei rükreketa chülie lho. 8Puoe nie bu u Niepu Jisu Khrista zha nhie jota moketuo la puo thuo nie rüguose vo thela tsoshü zotuo. 9Ukepenuopfü sü dietho zo; puo nie bu u Niepu Jisu Khrista, puo Nuou ze kekrotho balieketuo la nie kielie.
Kehouu Nu u Rüla Kekreiketa
10Siro a siezedzürieko, a u Niepu Jisu Khrista za nu nie bu kenourhe di nie donu kepfükhowa molienu, tsiu nieko bu keze nou puo chü mu nie medo kerhe di keze puo chülienu chaya. 11Kekreilamonyü a siezedzürieko, nieko donu keprüli baketa Kloe kinumiako kinu silie. 12A sikelie die süusü, nieko mia puopuocü sie, “A Paul kitsa,” morei “A Apolo kitsa,” morei, “A Kefa kitsa,” morei “A Khrista kitsa,” isi bata üsi. 13Khrista chü phrowalie vi me? Paul nieko la krus geinu siashü me? Morei nie Paul za nu dzülupfülie me? 14A Krispa mu Gaya unie zo kemosie nieko miapuorei dzülu khashü kemo la, Ukepenuopfü thezieya, 15süla nieko miapuorei a za nu dzülupfülie ücü pulie kenjü. 16(A Stefana mu puo kikru dzülu kha sashü ho; derei süsie a kekreimia puorei dzülu khashücü lelie mo.) 17Khrista a ketsepie a bu mia dzülu khashünu mo derei dieliekeviu punushü, mu Khrista krus geinu siakeshü kekuou bie pejüwa moketuo la themia mhasi rei se pu mo.
Khristae Kepenuopfü Kekuou mu Mhasiu
18Kekreilamonyü krus dieu kataketuoko mhodzünu we kenya die zo, derei kelalieketa úko la we süu Ukepenuopfü kekuou zo. 19Süusü thupie kezhü,
“A mhakesimiako mhasi pekawatuo,
mu mhasimhale kenyithoko mhale chüpie kemethuo chüwatuo.”
20Mhakesimia kirapuo ba ga? Leshükesithoko kirapuo ba ga? Tsie phouu nu keprüli kesiko kirapuo ba ga? Ukepenuopfü kijüu mhasi pie kenya chü zowata mo üme? 21Süla Ukepenuopfü mhasi we kijüu u thuo u mhasi se Ukepenuopfü silie mo, kenya die üketa puo pupie mia kie di pelekeliemia kelalietuo ükecü Ukepenuopfü medota. 22Judako zasi ngu nyü mu Grikmiako mhasi pfhü, 23derei hie zowe, Khrista pie krus geinu goukewau se pethaya, süu Judako nei kemo die puo mu Judakemoko la kenya die puo zo, 24derei kielieketa Judako mu Grikmiako la zowe Khristae Ukepenuopfü kekuo mu Ukepenuopfü mhasiu zo. 25Kekreilamonyü Ukepenuopfü kenyae themia mhasiu ki mhasikuo, mu Ukepenuopfü thachümezie rei themia ki mecakuo zo.
26Siro a siezedzürieko, nieko thuo rei nie kiekelie dze rükrashücie: themia kitsa nu leshü ro nieko mia kekra mhakesimia mo, mia kekra kemecamia mo, mia kekra kevimia rei mo. 27Derei Ukepenuopfüe mhakesiko kengashüketuo la kijü nu mhasi kemoko kedaliete; mu Ukepenuopfüe kemecako kengashüketuo la kijü nu kethachüko kedaliete. 28Siro Ukepenuopfü kijü nu mha le pezhayakezhako bie pejüwaketuo la Kepenuopfüe mhapuorei kemo mhie di mia u le pecü mu u thiyakezhako kedaliete, 29sidi miapuorei#1:29 Gk Chüüphou puorei bu. bu Ukepenuopfü mhodzünu kemelha molieketuo la. 30Puoe Khrista Jisu geinu nie kerheiro bo-u zo, u la Ukepenuopfü kinu mhasi, siro miathokecü mu chü kemesakelie tsiu u rhakelieu chüte, 31mu siketuo la, süu thupie zhü, “Kehoupuorei kemholiekezhau bu Niepuu geinu kemholieliecie,” si.
Currently Selected:
Korintmiako Kerieu 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More