1 Hena Wakorintho 7
7
1Na hena mburi ya vindu vila muvitamie: Ni kyedi mundu asikuware mche. 2Kake, amu ya mbuya, mundu ose aoke na mche wakwe mwenye, na mche ose aoke na mume wakwe mwenye. 3Mume amng’o lie mche sandu yambe: na huwo pia mche mume wakwe. 4Mche tenaye zinya wanga ya muri wakwe mwenye, nde mume: na huwo pia mume tenaye zinya wanga ya muri wakwe mwenye, nde mche. 5Mwe asimnyime mughenji, nde hena kuarehiana hena magheri, nesa mbone mwanya wa kuomba, na muokewa hamwe, Shetani asimgheshe amu ya kusakuswija kwenyu. 6Kake nakiteta iki hena kushigirra, si hena kuaghanya. 7Kake nikundie wandu wose waoke sa mi mwenye. Kake mundu ose ena kiingijo kyakwe mwenye kufuma hakwe Izuwa, mwe huwo na ungi huwo.
8Kake nawawurra wesimeaika na ngawiani, ni kyedi hawo wekiikaa si mi. 9Kake kwakicha tewena kukuswija, waaike: amu keba kuaika kukela kusha. 10Kake hena wala weidiwa kuaika nang’ola itanawo, si mi, nde Mzuri, Mche asitana na mume wakwe 11(kake ekitana, aikae esiaikwe, kana aarehiane na mume wakwe); na mume asimshighe mche wakwe. 12Kake wala weshighajike nawawurra mi, si Mzuri: Mundu wa hetu akeye ekioka na mche asiitikija, naye ekundie kuikaa naye, asimshighe. 13Na mche mwenye mume asiitikija, naye ekundie kuikaa naye, asimshighe mume wakwe. 14Amu mume asiitikija eshenetijwa ghati ya mche, na mche asiitikija eshenetijwa ghati ya mume: isioke huwo waana wenyu weneoka na ikwe; kake ingeriaha wesheneta. 15Kake kwakicha ula asiitikija etonga, atonge: mdwetu kana rumburia teohoye wuzoroni hena vindu sa ivi: kake Izuwa etuitanga ghati ya luworo. 16Amu nize watisiwa, mche we, ti unemkija mume wako? kana nize watisiwa, mume we, ti unemkija mche wako? 17Kake, sandu Mzuri emgawia mundu ose, na sandu Mzuri emwitanga mundu ose, huwo asele. Na iki naaghanya ghati ya makanisa mose. 18Mundu akeye eitangiwe ekitawanwa? asioke asitawanwe. Mundu eitangiwe esimetawanwa, na asitawanwe. 19Kutawanwa si kinducho, na kusatawanwa si kinducho; nde kumagura maaghanyo ma Izuwa. 20Mundu ose aikae ghati ya luitango lula eitangiwe. 21Uitangwe ukioka mzoro? isioke wukiwa hako: kake ukiidima kufuma wuzoroni, keba ukuhirie. 22Amu ula eitangwa ghati ya Mzuri, ekioka mzoro, ni esimzoro wakwe Mzuri: huwo nla eitangwe, ekioka esimzoro, ni mzoro wakwe Mzuri. 23Tuzoriwe na zora; musioke wazoro wa wandu. 24Wandwetu, mundu ose, ghati ya mikaiye eitangiwe, ghati ya ila aikae hena Mzuri.
25Na hena wala wesimeaika sina aghanyo la Mzuri: kake nang’ola mburi yangu, sa mwenye kuwona lusario lwa Mzuri kuoka mwitikiji. 26Hena lwa iyo naghamba ti iki ni kyedi amu ya wukiwa wa ingeriaha, ti ni kyedi mundu aoke sandu eikee. 27Wachungwa na mche? usiende kuchunguwa. Wachunguwa hena mche, usiende mche. 28Kake ukiaika, touketawe ng’oki; na ngale ekiaikwa, teketaye ng’oki. Kake wandu sa awa weneoka na wasi hena muri: na nikundie kumshighia. 29Kake naghamba iki, wandwetu, ti magheri maoka madongo, nesa too ingeriaha wala wena wache waoke sa wesina: 30na wala weiya, sa wasiiye; na wala weizihirwa, sa wasiizihirwe; na wala wezora, sa wesina kindu: 31na wala wemahiria masanga, sa wasimahirie muno: amu fwana ya masanga ama yavetia. 32Kake nikundie muoke wandu wesina mawukiwa. Ula esimeaika eviyoa vindu vya Mzuri, nize amwiseje Mzuri: 33Kake ula eidiwa kuaika eviyoa vindu vya masanga, nize amwiseje mche wakwe. 34Nawa hena kulelana ghati ya mche na ngale. Ula esimeaikwa eviyoa vindu vya Mzuri, nesa ashenete ghati ya muri na ghati ya ngoma; kake ula eaikwa eviyoa vindu vya masanga, nize amwiseje mume wakwe. 35Na nakiteta iki hena mbucha yenyu wenye; si nesa nimgere izero, nde hena kila kiwe, mbone kumtumikia Mzuri musina kuitalwa. 36Kake mundu ekigheshijia ti temketie nezo ngale wakwe, magheri makwe mekivetia, nawa ikioka ya kuwe, akete sandu ekundie; teketaye ng’oki; waaikane. 37Kake ula eimuka ekidinda ngoroni hakwe, asisingirijwe, nde ena zinya ghati ya kila ekikundie, na egura iki ngoroni hakwe, nikyo kumrinda ngale yakwe, eneketa nezo. 38Na huwo ula emwinga ngale wakwe aaikwe, eketa nezo; na ula esimwinge kuaikwa eneketa nezo kukela. 39Mche achungwa magheri mose mume wakwe eoho na moo; kake mume ekifwa, eidima kuaikwa na ula emkundie; nde ghati ya Mzuri. 40Kake keba kashi hena ye ekiikaa sandu eikee, hena mburi yangu: na naghamba pia ti nina Ngoma ya Izuwa.
Currently Selected:
1 Hena Wakorintho 7: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
