1 Hena Wakorintho 1
1
1Paulo, eitangwe kuoka mwondo wa Yesu Kristo hena lukundo lwa Izuwa, na Sosthene mundu‐wa‐hetu. 2Hena kanisa la Izuwa lioho ghati ya Korintho, wala weshenetijwa ghati ya Kristo Yesu, weitangwa kuoka weshenete, hamwe na wose weliitangia izina la Mzuri wetu Yesu Kristo handu hose, Mzuri wawo na wetu: 3Mvono henyu na luworo kufuma Izuwa Apa wetu na Mzuri Yesu Kristo.
4Namwanjela Izuwa wangu misi yose hena lwenyu, hena mvono wa Izuwa muingiwe ghati ya Kristo Yesu; 5ti ghati ya vindu vyose mumazijwa ghati yakwe, ghati ya kuteta kwose na ghati ya kutisiwa kwose: 6Sandu mburi yakwe Kristo idindijwe henyu: 7Mtano tomuduhukiwa kiingijo akeye; mukiuindia ujughuo wa Mzuri wetu Yesu Kristo; 8Eye enemdindija pia mtano kuidiwika, musilinganywe hena musi wa Mzuri wetu Yesu Kristo. 9Izuwa ni mwitikiji, na hena ye muitangwe kuingia ghati ya ulungano wa Mwana wakwe Yesu Kristo Mzuri wetu.
10Namsemba, wandwetu, hena Izina la Mzuri wetu Yesu Kristo, mutete wose kiteto kimwe, masioke matanyo henyu: nde ti mukurijwe hamwe ghati ya ngoro mwe na wuchili mwe. 11Amu mburi ietwe hangu wanga yenyu, wandwetu, na wandu wa Kloe, ti vilinganyo vioho henyu. 12Kiteto kyangu ni iki, Mundu ose wenyu eghamba, nimi wa Paulo: na mi wa Apolo: na mi wa Kefa: na mi wa Kristo. 13Kristo eghawika? Paulo ewanikwe hena lwenyu? kana mubatizwe ghati ya izina lakwe Paulo? 14Namwanjela Izuwa ti sibatizemi mundu wa henyu, nde Krispo na Gaio: 15mundu asighambe ti mubatizwe ghati ya izina langu. 16Nikawabatiza pia wa nyumba ya Stefanasi: sitisiwemi ti nibatize mundu ungiwa akeye. 17Amu Kristo teniingijeye nibatize, nde nitinde anjili: si hena kucha kwa viteto, msalaba wakwe Kristo usioke mhaya.
18Kake kiteto kya msalaba ni hena wala wekundie kuteka, utomode: kake hena uswi tukundie kukijwa ni zinya yakwe Izuwa. 19Amu itamiwe, Ninenyamara kucha kwawo wechee, na ng’eno yawo wenye ng’eno nineisua. 20Echee eohohi? mtami eohohi? mlelana wa masanga ama eohohi? Izuwa tekutomodisha kucha kwa masanga? 21Amu ikioka ti ghati ya kucha kwa Izuwa masanga hena kucha kwakwe tememtisiwe Izuwa, luokie luisejo lwa Izuwa hena kutomoda kwa kutinda awakije wala weitikija. 22Ikioka Wayahudi wekunda maluwano, na Wayonani weenda kucha: 23Kake uswi twamtinda Kristo ewanikwe, hena Wayahudi msadara na hena Mambare utomode: 24Nde hena wala weitangwa, na Wayahudi na Wayonani, Kristo zinya yakwe Izuwa, na kucha kwakwe Izuwa. 25Amu utomode wa Izuwa una kucha kukela wandu; na wunana wa Izuwa una zinya kukela wandu.
26Amu yoeni kuitangwa kwenyu, wandwetu, nize si weingi wechee hena muri, si weingi waaria, si weingi wenye nguma; 27Kake Izuwa esaghure vindu vitomode vya masanga, nesa awagere nguruna wala wechee: Izuwa akasaghura vindu vinana vya masanga, nesa avigere nguruna vindu vya zinya: 28Na vindu vifaa vya masanga, na vindu vidaiwe, evisaghure Izuwa, na vindu visioho, nesa aviteshe vindu vioho: 29Mwenye muri akeye asiwone kukuisisa msongorana wa Izuwa. 30Kake kufuma hakwe unywi muoho ghati ya Kristo Yesu, eye earehiwe hena uswi kucha kufuma hakwe Izuwa, na ngalo, na ushenetijo, na ukombolo; 31Nesa, sandu itamiwe, Ula ekuisisa, akuisise ghati ya Mzuri.
Currently Selected:
1 Hena Wakorintho 1: TAVETA
Highlight
Copy
Compare
Share
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
