Vaebulaniya 10
10
UKilisiti ye nambika ingʼwilifu
1Ukuteekela inambika kulingʼaana ni milagililwe gya Mose, gwe mwigisila hela gwa ngʼaani inofu idziikwadza, si ngʼaani dzila dze dzeene. Lwe lwene inambika dziidzila idzaateekelwaga umwaka nu mwaka, dzisikuvavaladza ukuhuma mu ndzanangifu avaanu avakumuhegelela uNguluvi ukwifuunya ukwakwe. 2Ngana avaanu avakwifuunya kwa Nguluvi vaavaliidzwe wugendela wa nambika idzo, ngali vasiginile ukuteekela. Pakuva ngali vaavaliidzwe ukuhuma mu ndzanangifu dzaawo nyakamwinga swe, kangi ngali vasiginile ukwipulika mu lwikagulo lwawo ukutigila, válimile indzanangifu. 3Nda haamu, inambika idzo idziiteekelwa umwaka nu mwaka dzikuviiwusa indzanangifu dzaawo, 4pakuva idanda iya ngʼambako ni ya mene, fisiiwodza indzanangifu dza vaanu.
5Lwe lwene uKilisiti pe aadzile pe naanyi, amulongiye uNguluvi ukutigila,
“Uveeve ulema inambika idza ndiimwa,
nambe wusembe wuwuvedzaga,
nda haamu, úgugelaniidze umuvili gwangu.
6Uveeve usaakeeliidzwe ni nambika,
nambe wusembe wa kuwodza indzanangifu dza vaanu.
7Neke ndilongage nditigilage,
‘Ve Nguluvi vanguave! Uneene ndili apa,
ukuta ndilimage imikeelelele gyako,
ngita kye lúsimbiilwe mu Wusimbe uWiimike wiimila wangu.’ ”#Ndzimbililo 40:6-8
8Ulwa kutala aalongile ukutigila, “Usaakeeliidzwe kangi ulema uwusembe wuwuvedzaga, ni nambika dza ndiimwa idza kuwodza indzanangifu dza vaanu,” nde luvedze uwusembe wonda uwo, waateekelwaga kulingʼaana ni milagililwe gya Mose. 9Neke alongage atigilage, “Ve Nguluvi vanguave! Uneene ndili apa, ukuta ndilimage imikeelelele gyako.” Kwe kutigila, uNguluvi awuhedziidze uwusembe wa lufingo ululovela nu kumuviika uYesu ukuvedza wusembe wa lufingo ulupiya. 10Pakuva uYesu Kilisiti aalimaga imikeelelele gya Nguluvi, atuhambwise tuvedzage viimike wugendela wa wusembe wa muvili gwakwe uwo, we awutawuwe nyakamwinga swe mu musika gonda.
11Kulingʼaana nu lufingo ululovela, avateekedzi vakumutovela iligendwa uNguluvi ikigono ni kigono pa kuteekela inambika dziidzila nyakoloofu, nde luvedze dzisiiwodza indzanangifu. 12Neke kangi uKilisiti iitawuwe nyakamwinga swe ukuvedza nambika, ukuta atuvaladze ukuhuma mu ndzanangifu dzeesu. Neke ahelelage ukwikala apoono pa luginiyo ku liwoko ilya kundiyo ilya Nguluvi. 13Umwene ali kukyanya uko, kwe iigina ukudzindila, ukufikila uNguluvi pe iivedza ávadelwidze avatavangwa vaakwe nu kuvaviika paanyi pa ndzayo dzaakwe.#Ndzimbililo 110:1; Vaebulaniya 1:13 14UYesu pe iitawuwe ukuvedza nambika nyakamwinga swe, avavaliidze ukuhuma mu ndzanangifu avaanu ve akuvahambusa vavedzage viimike mbeepali.
15Nayu Mubepo uMwimike iikoolela ukwesu imola idzi ukutigila, dza ndakyene pe iitigila,
16“UMutwa Nguluvi aatigiye, ‘Ulu lwe lufingo,
lwe ndilaafinga na vaanu vangu ifigono ifiikwadza.
Ndilaaviika imilagililwe gyangu mu numbula dzaawo,
nu kudzisimba mu luhala lwawo.’ ”
17Iilonga kangi iitigila,
“Sindiliiwuka nambi indzanangifu dzaawo, nambe malimo gaawo amaviifu.”#Yelemya 31:33-34
18Ngana uNguluvi avapyanile avaanu indzanangifu dzaawo, kusiisakulwa kangi ukuteekela uwusembe.
Ukwisungʼanidza mu lufuuwo
19Neke lino, nye vafuuwa vayanguanye, tuli nu wumasimike uwa kwingila aPiimike pa Piimike, pakuva uYesu aatawuwe idanda yaakwe. 20Kwe kutigila, uYesu átudinduliye ingʼaasi imiya iyikutusindika ku wuumi. Ingʼaasi iyo, yikutusindika kwa Nguluvi kugendela ilibupa lya mwenda,#Matayo 27:51; Vaebulaniya 9:3 kwe kutigila, umuvili gwa Yesu. 21Kangi twikwingila, pakuva tuli nu Muteekedzi uMuvina ye iikwimiila avaanu va Nguluvi. 22Wiimila wa idzo, tumuhegelelage uNguluvi ulunya numbula indzelu nu wumasimike mu lufuuwo lwesu, pakuva umwene átuvaliidze ulwikagulo lwesu wugendela wa danda ya Yesu nu kukalafya imivili gyesu nu lulenga ulunofu.#Mbalilo 19; Esekyeli 36:25 23Twimage sipi ngaya kugayawuka mu luhuuvilo lwe twinaka, pakuva uNguluvi ye aahuuviidze ali muhuuvilwa. 24Kangi tuhoodzage ngita kye tukwisungʼanidza yuufwe mwa yuufwe, ukuta twiyendage nu kulima inofu. 25Tutanage ukugileka imivedzehedze gyesu igya kulundana pamwinga ngita avaanu avangi kye válekile ukulundana. Nda haamu, tuginage ukunungʼuvalila ukwitanga yuufwe mwa yuufwe, pakuva twidzeela ukutigila, ikigono ikya kupiluka uMutwa Yesu kili biihi.
26Ngana twigina ukulima indzanangifu dadi, kuno twidzeela indakyene iya Nguluvi, apo kungaya wusembe uwungi uwukutuwodzehedza indzanangifu. 27Neke kangi kúsigaliye hela ukudzindila mu woogofi uluhigo lwa Nguluvi ulwikoogofya, nu mooto umukali uguhadza gukuvatipula avaanu vonda avatavangwa va Nguluvi. 28Umuunu ye aadzumbaga imilagililwe gya Mose, aakomwaga kingaya lusungu, ngana avoolesi vavili enewuli vadatu vóoleleliye ukutigila, ndakyene álimile ewo.#Lwiwuko 17:2-7 29Neke kangi muhoodzage ulwa muunu ye akumubeda uMuswamuve va Nguluvi, enewuli ye iiwona idanda ya lufingo lwa Nguluvi iyamuvaliidze ukuvedza si kiinu, enewuli ye akumuliga uMubepo uMwimike va lusungu. Asivagiye lupedzo lukomi hiilo? 30Pakuva twidzeela uNguluvi aalongile ukutigila, “Ukulumbila umukole ge malimo gangu, uneene ye mwene ye ndilaalumbila umukole.” Kangi lúsimbiilwe ukutigila, “UMutwa Nguluvi alavahomba avaanu vaakwe kulingʼaana na malimo gaawo.”#Lwiwuko 32:35-36 31Ndakyene lwikoogofya hiilo ukugwila mu mawoko ga Nguluvi ye ali muumi.
32Neke kangi mwiwukage umusika gwa kutala ugo, gwe mwamufuuwaga uKilisiti. Nde luvedze mwapumuswaga hiilo mu ngʼaani ndzoloofu, napo kangi mwigugumidzaga mu mumuko idzo. 33Umusika ugungi, mwapumuswaga nu kuligwa pa miiho ga vaanu voloofu. Kangi mwavanyamulilaga avayeenyo nu kuvatanga vala avaataangʼanaga ni mumuko dziidzo. 34Mwavawonelaga lusungu avayeenyo avaadindiilwe mu ndinde. Kangi umusika pe mwanyagwaga ifiinu fyenyo, mwidikilaga mu lukeelo, pakuva mwadzeelaga ukutigila, muli nafyo ifiinu ifinofu kulutila, kangi ifisiisila nambi.
35Wiimila wa ulo, mutanage ukuwuleka uwumasimike weenyo wa kumufuuwa uYesu, pakuva muhadza mwikwanukila uluwonolo ulukomi hiilo ukuhuma kwa Nguluvi. 36Mwigugumidzage mu mumuko idzo, ukuta mulimage imikeelelele gya Nguluvi, neke mwanukile dze avahuuviidze ukuvapeela. 37Pakuva lúsimbiilwe mu Wusimbe uWiimike ukutigila,
“Gúsigiye musika mudebe hiilo,
uyo ye iikwadza, alaadza, kangi asilaafuvalila.
38Umugolofu iinana wugendela wa lufuuwo.
Neke kangi umuunu uyo, ye iikangagila mu lufuuwo lwakwe,
uneene sindilaakeeledzwa nave nambi.”#Habakuki 2:3-4
39Neke kangi uneefwe tusili pamwinga na vaanu aviikangagila mu lufuuwo lwawo, nu kutipulwa. Nda haamu, uneefwe tuli pamwinga na avo avakumufuuwa uNguluvi nu kupokwa.
Currently Selected:
Vaebulaniya 10: BEZ
Highlight
Copy
Compare
Share
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved.
